Fwile 40
40
Sɔkɔn dɔle
(Fw 39:32–43; Lév 8; Mi N 7)
1Gakelebale we fe Moizi lɛ yé é léé: 2Moné vinin lé yi vininzan nya, i dan zén‐ékevasɔkɔn dɔ lɛ. 3I dan wenayefɛ pagikɛsu dɔra lɛ a gi, yé i dan kɛsu ta bua lɛ élé sɔ nya. 4I dan da lɛ tablé nya yé bé ta fɛnu faa pa ’wo pana. I dan da lɛ kyan fintran nya yé i dan alé bɔnénu ma’lɛrɛ lɛ. 5Balebanna lé wa kɛlɛ kyan nya, ’té woo lasikɔrɔ no a ta bɛ, i dan ’bɛ dɔra lɛ wenayefɛ pagikɛsu ’lɛ, yé i dan sɔkɔn lɛtansɔ dun lɛ sɔkɔn ’léé. 6Balebanna lé woo balebanwi kyɛ blé a ta, i dan a dɔra lɛ zén‐ékevasɔkɔn ’léé. 7I dan ’wolikana dɔra lɛ zén‐ékevasɔkɔn valé balebanna méléna, yé ’i ’yi zén a gi. 8I dan gɔrɔ bo lɛ fɛnu faa zi, yé ’i gɔrɔ lɛtansɔ dun gɔrɔ ’léé. 9Nyɔnɔ lé wa zén‐é mi ta, i dan a si lɛ yé bé zén sɔkɔn valé é gifɛnu faa ta, yé ’i bɛ pla yee valé élé nyanamapafɛnu faa ta; yé a ’lɛ é dan dɔ lɛ. 10Nyɔnɔ lé wa zén‐é mi ta, i dan a zén lɛ balebanna lé woo balebanwi kyɛ blé ana, a ta, yé ’i bɛ pla balebanna ta; yé balebanna ’lɛ é dan dɔ lɛ. 11Nyɔnɔ lé wa zén‐é mi ta, i dan a zén lɛ ’wolikana valé é gane ta, yé i dan i bɛ pla lɛ a ta Bale zé nya. 12I dan Arɔn valé é benu bié lɛ zén‐ékevasɔkɔn ’léé, yé i dan wo zuru lɛ ’yi nya. 13I dan balelasɔ zén lɛ Arɔn ta, i dan nyɔnɔ zén lɛ a ta, yé i dan i bɛ pla lɛ a ta, alé balebannyanama pale an lɛ we gi. 14I dan Arɔn benu bié lɛ, yé i dan varɔ bɛ grɔgrɔ zén lɛ wo ta, 15yé i dan nyɔnɔ zén lɛ wo ta, i nyɔnɔ zén wo ti ta fɛan zo, a zo, wolé balebannyanama pale an lɛ we gi. Nyɔnɔ zénle wo ta ’ko, ’bɛ é dan balebannyanama pale kɛlɛ lɛ wo kulunu zé nya sɔbɛla we nya lɛɛfaama, a glɛ ’ka lo.
16We faa lé Gakelebale a fe Moizi lɛ, Moizi a kɛlɛ. É a kɛlɛ ’kyɛ. 17Lɛɛ fiézan gi, moné vininzan lé yi vinin nya, wo sɔkɔ dɔ. 18Moizi sɔkɔn dɔ, é a ganevɔgifɛnu dɔra, yé é yilifeenu dɔ, yé é wo sɛedɔmayilinu wɔra wo gi yé é wɛyilinu dɔ. 19É sɔkɔn tabuafɛ bua é ta, yé é ’bɛ ta loru tabuafɛ bua é ta é ziin, Gakelebale a fe Moizi lɛ fɛan zo, a zo. 20É wenayefɛ si yé é a dɔra kyankɛsu gi. É kɛsu siyilinu wɔra, yé é nyanai zén mi la nyanana dɔra kɛsu ta loru. 21É go kyankɛsu nya sɔkɔn gi; é kɔnmikɛlɛsɔ dun yé é wenayefɛ pagikɛsu ta yɔɔ a nya, Gakelebale a fe Moizi lɛ fɛan zo, a zo. 22É tablé dɔra zén‐ékevasɔkɔn gi, sɔkɔn lé yirinwana bɛbolazia kɔnmikɛlɛsɔ ’lɛzia; 23yé é burunu pla a ta ’wo bale nya, Gakelebalé ’lɛ, Gakelebale a fe Moizi lɛ fɛan zo, a zo. 24Yé é fintran dɔra zén‐ékevasɔkɔn gi, tablé yara, sɔkɔn lé yirinwana bɛyilazia; 25yé é fintran lé bɔnénu ma’lɛrɛ Gakelebale ’lɛ, Gakelebale a fe Moizi lɛ fɛan zo, a zo. 26Balebanna lé wa kɛlɛ kyan nya, é a dɔra zén‐ékevasɔkɔn gi, kɔnmikɛlɛsɔ ’lɛzia; 27yé é lasikɔrɔ ginzan kyɛ ble a ta, Gakelebale a fe Moizi lɛ fɛan zo, a zo. 28É sɔkɔn lɛtansɔ dun sɔkɔn ’léé. 29Balebanna lé woo balebanwi kyɛ blé a ta, é a dɔra zén‐ékevasɔkɔn ’léé; yé é balebanwi kyɛ ble a ta, yé é Bale blan nɔ a ta, Gakelebale a fe Moizi lɛ fɛan zo, a zo. 30É ’wolikana dɔra zén‐ékevasɔkɔn valé balebanna méléna, yé é ’yi zén a gi, munu zurule we ma; 31Moizi koo, Arɔn koo, é benu koo, wo ’wo bɛnu valé ’wo ganenu zuru ’bɛna; 32dé wo wɔra zén‐ékevasɔkɔn gi yé wo bié balebanna ma, wo zuru, Gakelebale a fe Moizi lɛ fɛan zo, a zo. 33É gɔrɔ bo sɔkɔn valé balebanna zi, yé é gɔrɔ lɛtansɔ dun gɔrɔ ’léé. ’Bɛ zo lé Moizi nyanama pale lɛ sɔɔ.
Gakelebale lé fuasan sɔkɔn fan
(Mi N 9:15–23; 1 MNw 8:10–12)
34Yé lati bua zén‐ékevasɔkɔn ta, yé Gakelebale lé fuasan sɔkɔn fan. 35Lati vo zén‐ékevasɔkɔn ta, yé Gakelebale lé fuasan sɔkɔn fan, amalé Moizi ’ka bɔa wɔrale lɛ zén‐ékevasɔkɔn gi lo.
36Izraɛl lé nénu lé tawole faa gi, dé lati si sɔkɔn ta, woo zi sian. 37Dé lati ’ka tan nwa lɛ lo, wo ’ka zi sian lo, fɔɔ ’té lati nwa é wo. 38Gakelebale lé lati a sɔkɔn ta é yiéyi; yé kyɛ a a ta é béli, Izraɛl lé munu faa yuɛ va, wolé tawole faa gi.
Currently Selected:
Fwile 40: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
