Fwile 39
39
Wo Balelasɔnu kɛlɛ
(Fw 28:2–14)
1Sɔnu lé munu a zén ’wo ta yé wo go nyanama pa fɛna sauun na, ’bɛnu koo, Arɔn lé balelasɔnu koo, wo wo kɛlɛ glayivayou sɔ koo, galunaa sɔ koo, sɔ sɔɔn koo, wo nya, Gakelebale a fe Moizi lɛ fɛan zo, a zo.
2Wo éfɔdi kɛlɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya. 3Wo kyan gyɛ lɛlɛné, yé wa fee bo kyanbale kenekenene nya yé wo pɛɛ gyɛ a nya, sɔ lé a yuɛɛ ke glayivayou valé galunaa valé sɔɔn koo, a ta, yé wo pɛɛ gyɛ a nya lɛnsɔ zima ta é ziin; wa yuɛɛ la gɔrɔ la. 4Wa gɔnu kɛlɛ a bɛapa ta yé ’bɛ éfɔdi kun ékema, ’bɛ zo lé wo éfɔdi kun ékema é lɔlu fié ma. 5Wo éfɔdi nyanama pa fɛan zo, wo bɔn‐in kunsɔ kɛlɛ yee duo zo yé wa dɔ a ta; wa kɛlɛ kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya, Gakelebale a fe Moizi lɛ fɛan zo, a zo. 6Wo ɔnisigɔlɛ vɔ kyan gi yé wo Izraɛl benu tɔ guru vɔ wo ta, woo guru vɔa bɛmazéné ma fɛan zo, a zo. 7Wo wo pla éfɔdi bɛapa gɔnu ta, Izraɛl benu seledɔmigifɛ nya, Gakelebale a fe Moizi lɛ fɛan zo, a zo.
8Wo éfɔdi nyanama pa fɛan zo, wo golɛgiweblefɛ kɛlɛ yee duo zo, kyan koo, glayivayou kununu valé galunaa kununu valé kununu sɔɔn koo, lɛn nénéle sɔ zima koo, wo nya, ’té wo yuɛ la a é gɔrɔlale. 9Golɛgiweblefɛ a é sun nya, é boro nya; a sangi a bɛlaa nya do, yé a ’wuola a bɛlaa nya do; é a é boro nya. 10Wa ’lɛrɛ golɛ wezan bale ziɛn nya: a bale vininzan a saadwanégɔlɛ koo, topazégɔlɛ koo, émérodégɔlɛ koo, wo nya; 11a bale fiézan a ɛsikabuklégɔlɛ koo, safiigɔlɛ koo, diamangɔlɛ koo, wo nya; 12a bale yaazan a opalgɔlɛ koo, agatégɔlɛ koo, amétiségɔlɛ koo, wo nya; 13a bale ziɛnzan a krisolitégɔlɛ koo, ɔnisigɔlɛ koo, jasipégɔlɛ koo, wo nya. Wo gɔlɛwezannu ’ko vɔ ’wo vɔgikyan gi. 14Wa vu ta fié, Izraɛl benu tɔnu yɛrama; wo guru vɔ wo ta, bélé woo bɛmazéné ta guru vɔa fɛan zo, a zo, bɛn vu ta fié tɔ a wo ta do do. 15Wo gɔgɔbale kenenenu kɛlɛ kyan tegele nya, yé wa tan bale nya. 16Wo kyanvɔgifɛ fié valé kyankpɔwɔlɛné fié kɛlɛ, yé wo yee kyan kpɔwɔlɛné fié vɔ golɛgiweblefɛ sun fié ta. 17Wo kyanbale fié vɔ kpɔwɔlɛné fié gi golɛgiweblefɛ sun fié ta; 18yé wo kyanbale fié zɔ polu dɔ, é vɔgifɛ fié lé wa pla éfɔdi bɛapa gɔ fié ta, wo ma. 19Wo kyankpɔwɔlɛné fié kɛlɛ é ziin, yé wo wo vɔ golɛgiweblefɛ wuozan lé ke éfɔdi ma zia, a sun fié ma. 20Wo kyankpɔwɔlɛné fié kɛlɛ é ziin, yé wo wo vɔ éfɔdi lé bɛapa gɔ fié wuo, a ’lɛ zia, fɛ vɔle é ké ’lééna sɔnɔ, éfɔdi lé bɔn‐in kunsɔ ta loru. 21Wo glayivayou bale polu dɔ golɛgiweblefɛ lé kpɔwɔlɛnu valé éfɔdi lé kpɔwɔlɛnu ma, golɛgiweblefɛ kɛlɛle éfɔdi lé bɔn‐in kunsɔ ta loru we ma, ’té é ’ka sié a ta lo, fɛan zo lé Gakelebale a fe Moizi lɛ, a zo.
22Wo éfɔdi lé varɔ kɛlɛ, wa tan glayivayou sɔ saa nya. 23Wo varɔ ’wuo ’léé pa é méléna, bélé gulidan varɔ ’wuo ’léé zo, yé wo sɔbɛ béé a lɔlu ’léé, té varɔ é fia lo we gi. 24Wo grénadéyili poro fotonu kɛlɛ lɛn nénéle nya, ’té wo yuɛ a glayivayou valé galunaa valé sɔɔn, yé wo wo dun varɔ ’léé; 25wo pannénu kɛlɛ kyan tegele nya, yé wo pannénu dun grénadéyili poro méléna varɔ ’léé faa na, grénadéyili poro méléna; 26kyanpanné do, grénadéyili poro do, kyanpanné do, grénadéyili poro do, wa dun varɔ ’léé faa na, balebannyanama pale we ma, Gakelebale a fe Moizi lɛ fɛan zo, a zo.
27Wo lɛnsɔ zima tan yé wa kini varɔ bɛ grɔgrɔ nya Arɔn valé é benu zé nya; 28nɔɔn lé wa kɛlɛ lɛnsɔ zima nya koo, wo ’lɛrɛkoro lé wa kɛlɛ lɛnsɔ zima nya koo, kyɛkoto lé wa kini lɛn nénéle sɔ zima nya koo, 29bɔn‐in kunsɔ lé wa kini lɛn nénénle sɔ zima nya, ’té wo pɛɛ gyɛ a ta bɛ, ’té a yuɛɛ a glayivayou valé galunaa valé sɔɔn, ’bɛ bɔn‐in kunsɔ ’ko koo, wo wo kɛlɛ, Gakelebale a fe Moizi lɛ fɛan zo, a zo.
30Wo kyan tegele gyɛ lɛlɛné, balelanɔɔn ta kyan nya, yé wo sɛbɛ gyɛ a ta, woo bɛmazéné ta guru vɔa fɛan zo, a zo, léé: Gakelebale sauun zé lé. 31Wa dɔ nɔɔn ta loru glayivayou bale nya, Gakelebale a fe Moizi lɛ fɛan zo, a zo.
Wo ’wolé nyanama gɔɔn Moizi lɛ
32’Bɛ zo lé wo zén‐ékevasɔkɔn ma nyanama faa lɛ sɔɔ. We lé Gakelebale a fe Moizi lɛ, Izraɛl lé nénu a faa kɛlɛ; wa kɛlɛ a zo.
33Wo da zén‐ékevasɔkɔn nya Moizi va; wo da sɔkɔn valé a mafɛnu faa nya; nyawɛnnénu koo, yilifeenu koo, sɛedɔmayilinu koo, wɛyilinu valé ’wo ganevɔgifɛnu koo, 34sɔkɔn tabuafɛ lé ke ’blagɔné kɔlɛ lé wa vɔ zéri’yi va, a nya, ’bɛ koo, a tabuafɛ lé ke dofɛn kɔlɛ nya, ’bɛ koo, kɔnmikɛlɛsɔ koo, 35wenayefɛ pagikɛsu valé é siyilinu koo, nyanai zé mi la nyanana koo, 36tablé valé é ma nyanamapafɛnu valé Bale ’lɛburunu koo, 37kyan tegele fintran valé alé bɔnénu, ’té wo ma a é ’lɛrɛle, wo valé fintran ma nyanamapafɛnu valé alé nyɔnɔ koo, 38balebanna lé wa kɛlɛ kyan nya koo, nyɔnɔ lé wa zén‐é mi ta valé lasikɔrɔ ginzan koo, sɔkɔn lɛtansɔ koo, 39balebanna lé wa kɛlɛ zéné nya, é valé élé kɔrané valé é siyilinu valé é ma nyanamapafɛnu faa koo, ’wolikana valé é gane koo, 40gɔrɔ lé sɔnu koo, a mélénayilinu koo, a vɔgifɛnu koo, gɔrɔ lɛtansɔ koo, a balenu valé a kunfɛnu koo, sɔkɔn gi nyanamapafɛnu faa koo, 41sɔnu lé woo wo zén‐é ’wo ta yé wo nyanama pa fɛna sauun na koo, balebanzan Arɔn lé balelasɔnu koo, sɔnu lé a benu a zén ’wo ta balebannyanama pale we ma koo, wo da wo faa nya.
42Izraɛl lé nénu nyanama ’konu faa pa, yé we faa lé Gakelebale a fe Moizi lɛ, wa lɛdɔma. 43Moizi nyanama faa nagini; yé bé ye, wa kɛlɛ Gakelebale dére yɛrama, wa kɛlɛ ’kyɛ. Yé Moizi wo drɔɔ vo.
Currently Selected:
Fwile 39: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
