Fwile 21
21
Bélidɔwe bɛnu
(2 BDWS 15:12–18; 21:10–14)
1Bélidɔwenu lé i dan wo nɔ lɛ munu lɛ, wo lé ke ’ko:
2Dé i Ébru mi lɔ luu nya, é dan nyanama pa lɛ lɛɛ suiɛdo; naa, a lɛɛ sɔrafiézan nya é dan vo lɛ éboma yé é ’ka dan gɔɔli nɔ lɛ lo. 3Dé é wɔra luu gi é do, é dan bɔra lɛ é do; dé a na a, wo dan bɔra lɛ ’bɛ nya. 4Dé azan le nɔ a lɛ, yé é négɔnénu valé nélomu yaa a ma, le koo, alé nénu koo, wa azan zé nya, yé gɔnézan é dan bɔra lɛ é do. 5Dé luu a fe léé, ézan koo, é na koo, élé nénu koo, wo sɔ ’é lɛ, é ’ka a va léé, é bɔra lo, 6’té azan é dan da lɛ a nya Kazambale ’lɛ; yé dé duoli léé, dé duoli vɔgiyili léé, é dan bié lɛ a ma, yé azan é dan a tɔné fɔn lɛ foroné nya, yé luu é dan vo lɛ alé nyanama pana lɛɛfaama.
7Dé mi do é lu dan luu nya, é ’ka dan bɔra lɛ bélé luunu éé bɔraan fɛan zo, a zo lo. 8Dé é dɔ a lɔzan gi léé, é dan a si lɛ é na nya, ’bɛ zuo dé é ’ka sɔ lɛ a lɛ lo, é a lé é zi nɔ léé, ’wa tabo, naa, a se ’ka a lɛ léé, é a dan bɛnnu lee lo, élé gi kɛlɛle a lɛ zuo. 9Dé é dɔ a gi léé, ’é a nɔ é be lɛ, é a lé é a kɛlɛ a lɛ bélé mi a kɛla ébo lu lɛ fɛan zo, a zo. 10Dé ’bɛ le bɛ si, fɛblele koo, sɔnu koo, yigyɛle a va koo, té a na vininzan é kele a do kpen ma lo. 11Dé é ’ka we yaanu ’ko kɛla é na vininzan lɛ lo, a se a lezan lɛ léé, ’é si a va é pla, ’té é ’ka alé gɔɔli bɔraan lo.
12Mi lé é mi tuo yé é ga, wo dan ga dɔ lɛ a nwiin. 13Dé é ’ka nyana lɛ a ’lɛ é kyɛn a gyɛle we ma lo, yé Bale a gyɛ a lee é pla, maa dan a ta yɔɔna kɛlɛ lɛ. 14Naa, dé mi do we kɛlɛ é punmazan lɛ é naané yé é a gyɛ gi kinile nya, dé é go an bannaoo, ka dan a si lɛ ’bɛna yé ka gyɛ.
15Mi lé é é ti bla, taa, dé a bu léé, wo dan ga dɔ lɛ a nwiin.
16Mi lé é mi sia kyeen nya, dé é a dan‐oo, dé é vo a leeoo, wo dan ga dɔ lɛ a nwiin.
17Mi lé é bale pa é ti valé é bu ma, wo dan ga dɔ lɛ a nwiin.
18Dé munu we sia, dé wo va mi do gɔlɛ duun é bɔluzan lɛ, taa, dé é fɔlɛ duun a lɛ, yé é ’ka ga lɛ lo, naa, yé é vo é yiale, 19wo ’ka dan we lɛdɔ lɛ fɛduunzan gi lo, ’té dé a koɛ é bɔa nwale lɛ yé é tawo élé yili ma. Naa, alé nyanama lé é sɛrɛ a gyɛ gi bɛ, é dan a banwo lɛ, yé é dan gyɛ pa lɛ a ma fɔɔ yé é béli.
20Dé mi do élé luu bla yili nya, dé gɔné léé, dé le léé, yé luu ga a lee, wo dan we lɛdɔ lɛ azan gi. 21Naa, dé é vo é yuɛma yi do yi fié, wo ’ka dan we lɛ dɔ lɛ azan gi lo; alé gɔɔli mafɛ lé.
22Dé munu we sia yé wo vɔ bɔnzan lee, yé né so a ma za ma, yé we bɛ ’ka bɔ lɛ lo, le zana é dan ban dɔ lɛ wo nwiin, yé wo dan a banwo lɛ weblezannu yuɛ va. 23Naa, dé we bɛ bɔ, dé lezan ga, ’wo lezan gyɛzan gyɛ ma; 24’wo yuɛ lɛgi pa yuɛ nya; ’wo suiɛ lɛgi pa suiɛ nya; ’wo bɛ lɛgi pa bɛ nya; ’wo gane lɛgi pa gane nya, 25’wo mi kyɛblele lɛgi pa mi kyɛblele nya; ’wo mi tuole lɛgi pa mi tuole nya; ’wo nyɛ dɔle mi gi lɛgi pa nyɛ dɔle mi gi nya.
26Dé luugɔné léé, dé luudané léé, dé azan fɛ duun a yuɛ lɛ yé a yuɛ sɛrɛ, é dan a vo lɛ éboma a yuɛ ma ban nya. 27Dé luugɔné léé, dé luudané léé, dé azan a suiɛ so, é dan a vo lɛ éboma, a suiɛ ma ban nya.
28Dé gɔné léé, dé le léé, dé dirigɔné a gyɛ é béli nya yé é ga, wo dan dirigɔné gyɛ lɛ gɔlɛ nya yé é ga. Wo ’ka dan a wi ble lɛ lo, yé wo ’ka dan ga dɔ lɛ dirigɔnézan nwiin lo. 29Naa, dé dirigɔné a kɛla é kyɛn, yé wa fe azan lɛ yé é ’ka é yuɛ pa lɛ a va lo, dé dirigɔné le gyɛ, dé é gɔné gyɛ, wo dan gɔlɛ vuli lɛ dirigɔné va yé wo dan we lɛdɔ lɛ azan gi ga nya. 30Dé wo ban dɔ dirigɔnézan nwiin a tabole we ma, é dan a ban faa wo lɛ. 31Dé mi be léé, dé mi lu léé, dé dirigɔné a gyɛ, wo dan belidɔwe ’ko tawe kɛlɛ lɛ. 32Naa, dé dirigɔné mi lé luu gyɛ, dé gɔné léé, dé le léé, wo dan gɔɔlifu sikla yɔ do wɔlɛ vu nɔ lɛ luuzan lɛ, yé wo dan dirigɔné gyɛ lɛ gɔlɛ nya yé é ga.
33Dé mi do ’yiguru lɛ vo é sole, taa, dé mi do ’yiguru bo yé é ’ka a lɛ tan lɛ lo, dé dirigɔné léé, dé sokofale léé, dé é vɔ a gi, 34’yiguruzan é dan wi ma gɔɔli nɔ lɛ azan lɛ yé wi gale ’é vo ’yiguruzan lɛ.
35Dé mi do lé dirigɔné é mi bɛ lé dirigɔné gyɛ é béli nya yé é ga, dirigɔné lé ke é yuɛma, wo dan a dan lɛ yé wo a ma gɔɔli guli; wo dan dirigɔné gale wi guli lɛ é ziin. 36Naa, dé wa gi dɔɔ léé, dirigɔné a kɛla é kyɛn, yé azan ’ka é yuɛ paan a va lo, dirigɔnézan ’ko é dan dirigɔné do nɔ lɛ dirigɔné pa gi, yé dirigɔné gale ’é vo yee ɛ lɛ.
Currently Selected:
Fwile 21: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
