Fwile 19
19
Kazambale da Sinai gɔ nwiin
(Wbz 5:4–5; LvS 68:8–9; Ébr 12:18–24)
1Wo sile Éjipiti tɛrɛ la zuo moné yaa, Izraɛl lé nénu bɔ Sinai bwi la ’bɛ yi nya. 2Wo si Réfidim aan wo, wo bɔ Sinai bwi la yé wo sɔkɔnnu dɔ bwi la; Izraɛl nyana ’bɛna, gɔ ’ko yara. 3Moizi gɔ gié Kazambale vazia, yé Gakelebale a laa gɔ nwiin yé é léé: ’I we fe Jakɔb lé munu, Izraɛl munu lɛ léma: 4We lé maa kɛlɛ Éjipiti munu lɛ, yé maa ka si gola bɛanu la yé maa da ka nya an va fɛan zo ’ko, ka a ye. 5Tɛrɛ faa a anzé nya, amalé sin, dé ka tɔné dɔ an dére lɛ, dé ka anlé gipawe tawe kɛlɛ, ka dan kɛlɛ lɛ anzé nya bɛnnu faa méléna; 6ka dan kɛlɛ lɛ an banbɛn nya, bɛn sauun nya. Dérenu lé i dan a fe lɛ Izraɛl lé nénu lɛ, wo lé ke bɛ.
7Moizi da munu va mi segelenu laa lɛ, yé é dére ’konu fe wo lɛ, Gakelebale a fe fɛan zo, a zo. 8Munu faa lé a lɛ léé: We faa lé Gakelebale a fe, ko dan a kɛlɛ lɛ. Moizi go munu dére fe lɛ Gakelebale lɛ. 9Gakelebale lé Moizi lɛ léé: Maa dan da lɛ i va lati borozan gi, munu lé anlé wefele i lɛ ’male we gi yé wo bli é vo i lɛ yifaama. Moizi munu dére fe Gakelebale lɛ.
10Gakelebale lé Moizi lɛ léé: ’I go munu va; ’i wo kɛlɛ é zima kyɔ valé tɛlɛ; ’wo ’wolé sɔnu zuru ma. 11’Wo ’wo ma’lɛrɛ yi yaazan lé we ma ma; naa, a yi yaazan nya, maa Gakelebale é dan zun lɛ munu faa yuɛ va Sinai gɔ nwiin. 12’I glɛ dɔ gɔ zi munu lee, yé bé fe léé, ’wo yuɛ pa wobozen va léé, té wo gɔ gié lo, té wo bɛ mane a glɛ ma lo. Miomian é bɛ mane gɔ ma, wo dan we lɛdɔ lɛ a gi gale nya. 13Wo ’ka dan ’wo bɛ mane lɛ azan ma lo, naa, wo dan gɔlɛ vuli lɛ a va, dé ’bɛ kaan lo, wo dan a fɔn lɛ sawɔlɛ nya; dé é a mi nyaoo, dé é a wi nyaoo, é ’ka dan vo lɛ é yuɛma lo. Dé béli we, wo dan bié lɛ gɔ sɔnɔ. 14Moizi gɔ zun munu vazia, é wo kɛlɛ é zima, yé wo ’wolé sɔnu zuru. 15É lé munu lɛ léé: ’Kabo ma’lɛrɛ yi yaazan lé we ma; té ka yia le do kpen va lo.
16A yi yaazan nya bladi, zagele ban, ’té lɛɛ yuɛ wuo éé vɔa, yé lati borozan zun gɔ ma; béli we plɛplɛ; yé kana zén munu faa lé wo ke sɔkɔndɔna, wo gi. 17Moizi munu si sɔkɔndɔna, keele Kazambale nya we gi; yé wo dɔ gɔ nyana ma. 18Gakelebale zun kyɛ méléna, amalé kyɛgoi sɔɔla Sinai gɔ ta; kyɛgoi ’ko nwa bélé pɔrɔ bli kyɛgoi zo, ’té gɔ faa ma éé nyɔɔn‐an plɛplɛ.
19Béli wele gi é go gyɛle nya, ’té éé goo gyɛle nya. Moizi éé we fé, ’té Kazambale a zi paan dére biéle nya. 20’Bɛ zo lé Gakelebale zun yé é da Sinai gɔ nwiin; Gakelebale Moizi laa léé, ’é da gɔ nwiin. Yé Moizi gɔ gié.
21Gakelebale lé Moizi lɛ léé: ’I zun, bé fe munu lɛ léé, té wo glɛ kini Gakelebale naginile we gi lo, dé wo va mi kiɛre é da ga. 22Balebanzannu lé woo biéan Gakelebale va, ’wobo kɛlɛ é zima é ziin, dé Gakelebale é da wo gyɛ. 23Moizi lé Gakelebale lɛ léé: Munu ’ka bɔa Sinai gɔ giéle lɛ lo, naa, bii a yi ga ko lee kpaklaa a fele nya an lɛ léé, maa glɛ dɔ gɔ zi, yé maa a kɛlɛ sauun. 24Gakelebale lé a lɛ léé: ’I go, ’i zun; ’bɛ zuo ’i da é ziin Arɔn nya; naa, Balebanzannu koo, munu koo, té wo glɛ kini dale maa Gakelebale vazia we gi lo, dé an da wo gyɛ. 25Moizi gɔ zun munu vazia, yé é we ’konu fe wo lɛ.
Currently Selected:
Fwile 19: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
