Fwile 18
18
Jétro da Moizi va
(Fw 2:15–22; 4:18–26)
1We faa lé Kazambale a kɛlɛ Moizi valé alé munu Izraɛl pli zi, Madian lé balebanzan, Jétro, Moizi na ti a ’ma; é a ’ma léé, Gakelebale Izraɛl munu si Éjipiti tɛrɛ la. 2Moizi na Séfora lé é a pa zia, Moizi na ti Jétro a si, 3yé é Séfora be fiénu si é ziin; wa do laan Gɛɛsom, naa, Moizi léé: Maa nyanaan bɛntɛrɛ la; 4wa koɛ laan Éliézɛɛ, naa, Moizi léé: An ti lé Bale bɔ an va yé é an so Faraɔn lé gwɔun lee. 5Moizi na ti Jétro koo, Moizi benu valé a na koo, wo da fɛana lé wo ke é nyanale bwi gi, ana, Kazambale lé gɔ wuo. 6Yé é we pa Moizi lɛ zia léé: Maa, i na ti Jétro, maa a dana i va, ko valé i na valé é be fiénu nya.
7Moizi go é na ti si lɛ zia, yé é dia é bli la, yé é a tuu gyɛ. Wo wo ke sina laa, yé wo wɔra Moizi lé sɔkɔn wuo. 8We faa lé Gakelebale a kɛlɛ Faraɔn valé Éjipiti munu lɛ Izraɛl pli zi koo, nyanénu lé wa ble zia koo, Gakelebale wo si we gi fɛan zo koo, Moizi a zuo faa fe é na ti lɛ. 9Wezin faa lé Gakelebale a kɛlɛ Izraɛl lɛ, Jétro gi nana a we ma, yé a gi nana léé, Gakelebale Izraɛl si Éjipiti munu lee. 10Yé Jétro léé: Gakelebale lé é ka si Éjipiti munu valé Faraɔn lee, yee lé é munu si Éjipiti munu lee, ’wa drɔɔ vo ma. 11Maa gi dɔɔ sin léé, Gakelebale a blɛn é mini balenu faa ta; naa, Éjipiti munu lé wenaané dia wobo la. 12Moizi na ti Jétro Bale ban, balebanwi lé wa kyɛ blé, a nya, yé é saraka bo Kazambale lɛ. Arɔn valé Izraɛl lé mi segelenu faa da a banwi ble lɛ Moizi na ti va, Kazambale yuɛ va.
Jétro we pla Moizi lɛ
(WGV 12:5; 27:9; 2 BDWS 16:18–20)
13’Bɛ é tu kini, Moizi nyana munu lé we blele we gi, yé munu dɔ a ’lɛ, é sia bladi fɔɔ yé nyanadi pa. 14We faa lé Moizi ke a kɛlɛna munu lɛ, Moizi na ti a ye, yé é léé: Mɛ lé bé kɛlɛ munu ’ko lɛɛ? Mɛmalé i nyana i do yé munu faa dɔ i ’lɛ, é sia bladi fɔɔ yé nyanadi pa a zoo? 15Moizi lé é na ti lɛ léé: Munu éé dan maa va we laale Kazambale lee we gi. 16Dé we bɔ wo méléna, woo dan maa va; yé maa wolé we blé yé maa wo bɔn‐in kinié Kazambale lé bélidɔwenu valé a sɔnnénu ma. 17A na ti lé a lɛ léé: We lé i ke a kɛlɛna, é ’ka zima lo. 18I dan fuu si lɛ ibo ta; yé i dan munu ’ko fuu si lɛ ’wo ta é ziin; naa, we ’ko mini ilé plɛplɛ ta; i ’ka bɔa we ’ko faa kɛlɛle lɛ i do lo. 19Sin, ’i tɔné dɔ an lɛ; maa dan we do pla lɛ i lɛ, yé Kazambale ’é kɛlɛ i va ma. ’I danamla kɛlɛ munu lɛ Kazambale yara yé ’i go wolé we nya Kazambale va. 20’I Bale sɔnnénu valé alé bélidɔwenu paa munu gi; zi lé é a lé wo a ta tawo, ’bɛ valé we lé é a lé wa kɛlɛ, ’i wo bɔn‐in kini a nya. 21’I munu vabo, yé munu lé woo we kɛla ’wo zua, ’té woo kanaan Kazambale lee, ’té wa mi wéiinnu nya, ’té wo bli bɔle fɛ ma za paan, ’i wo si munu va; ’i wo dɔ munu wuru soru soru koo, mi yɔ soru soru koo, mi yɔ fié wɔlɛ vu vu koo, mi vu vu koo, wo nwiinzannu nya. 22’Wo munu lé we ble yifaama ma; ’wo da we blɛnnu nya i va ma, yé ’wo we kiénénu ble ’woboan, yé ilé kɔné bɛn ke ’é si wo bɔle i va nya. 23’I ’bɛ kɛlɛ, yé dé Kazambale we do fe i lɛ yé i bɛ ’é sɔ ’bɛ kɛlɛle nya yé munu ’ko é dan bɔ lɛ ’wo gona gi nanale nya.
24Moizi é tɔné dɔ é na ti dére lɛ, yé we lé é a fe a lɛ é a faa kɛlɛ. 25Yé munu lé a yara a wo yara léé, wo wo dɔ minwiinzanu nya, Moizi wo si Izraɛl faa va, yé é wo dɔ mi wuru soru soru nwiinzannu koo, mi yɔ soru soru nwiinzannu koo, mi yɔ fié wɔlɛ vu vu nwiinzannu koo, mi vu vu nwiinzannu koo, wo nya. 26Woo munu lé we blé yifaama; woo dan we plɛplɛnu nya Moizi va, ’té woo we kiénénu blé ’woboan.
27Moizi zi nɔ é na ti Jétro lɛ, yé é go élé tɛrɛ la.
Currently Selected:
Fwile 18: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
