Bélidɔwesɛbɛ Fiézan 7
7
’Wo Kanaannu sɛrɛ tata
(Fw 34:10–17; LvS 106:34–39; 1 Jn 5:21)
1Tɛrɛ lé ka dan a si lɛ kazé nya bɛ, dé Gakelebale kalé Bale ka bɔ ana, é dan bɛn kiɛre bin lɛ ka ’lɛ; bɛn lɛ sɔrafié lé wo blɛn mini ka lɛ, yé wolé plɛplɛ mini ka lɛ, woo lé; Étinu koo, Giigazinu koo, Amorénu koo, Kanaannu koo, Férézinu koo, Éévinu koo, Jébusinu koo, woo lé. 2Dé Gakelebale, kalé Bale wo pa ka lee yé ka wo kele, ’ka wo gyɛ tata; té ka gi pa do wo nya lo; té ka wo ma we vo lo. 3Té ka mariazé kɛlɛ munu ’konu nya lo; té ka ka lunu nɔ wo benu lɛ lo; té ka wo lunu si ka benu nanu nya lo; 4dé ka kɛlɛ, wo dan ka benu ’wuo sɛrɛ lɛ an ma, yé wo dan bale bɛnu bɔ lɛ, yé maa Gakelebale bli é dan fli lɛ ka ma; maa dan ka kulu ga lɛ do ’té. 5We lé ka dan a kɛlɛ lɛ wo vazia, yee lé ke ’ko: ka dan wolé yobannanu zana lɛ a gi, ka dan wolé yowɔlɛnu sɛrɛ lɛ, ka dan wolé miyilinu yéli lɛ, yé ka dan wolé yonu kyɛ ble lɛ.
6Naa, ka a munu lé Gakelebale, kalé Bale wo pa é yɛrama ézé nya, wo nya; Gakelebale, kalé Bale ka si bɛnnu faa lé wo ke tɛrɛ la, wo va, ka kɛlɛle azé nya we gi. 7É ’ka kɛlɛ lɛ léé, ka kiɛre mini bɛn bɛnu faa ta, bɛwemalé Gakelebale é buvɔ ka ma yé é ka si a va lo, naa, ka ’léé a kiéné é mini bɛn bɛnu faa ta. 8Naa, ka sɔ Gakelebale lɛ é wo, yé é sɔ a lɛ léé, ébo ’nyɔɔn ka tranu lɛ fɛan zo, ’é ’bɛ lɛ sɔɔ, bɛwemalé Gakelebale ka si luu gi, é ka si Éjipitimunu nwiinzan Faraɔn lee yé é ka si ana é bɛ plɛplɛ nya. 9Amalé, ka gi dɔɔ léé, Gakelebale, kalé Bale ɛ ke Bale nya; yarapawela Bale ’ko, munu lé é sɔ wo lɛ, ’té wo alé bélidɔwenu kɛla, éé dɔa élé gipawe ta, yé a nyanai éé zén‐é wo ta fɔɔ yé é bɔ wo kulu wuru soruzan ma. 10Naa, munu lé a za ke wo gi, é dan é lɛdɔ lɛ wo gi, yé ’é wo gyɛ zamaga nya. É ’ka dan mɔn lɛ lo; é dan é lɛdɔ lɛ ’é zapazan gi ’té. 11Bɛwemalé, a sɔnnénu valé alé bélidɔwenu valé ka gɔnɔlawenu lé maa wo gɔɔn ka lɛ kyɔ, ’ka wo lɛdɔma yé ’ka wo ta tawo.
Drɔɔvolenu
(Lév 26:3–13; 2 BDWS 28:1–14)
12Dé ka tɔné dɔ dére ’konu lɛ, dé ka wo lɛdɔma yé ka wo ta tawo, gipawe valé nyanai zénle lé ébo ’nyɔɔn ka tranu lɛ wo ma, é dan dɔ lɛ a ta plɛplɛ. 13É dan ka lɔrɔ pa lɛ; é dan ka drɔɔ vo lɛ yé é dan ka fan lɛ; nénu lé wo bɔn ke wo bunu ma, é dan wo drɔɔ vo lɛ yé é dan kalé féifɛ drɔɔ vo lɛ; kalé ’sa koo, kalé dɔrɔ dɛrɛ valé kalé nyɔnɔ koo, kalé dirinu valé kalé trubɛnu lé né yaale koo, é dan wo faa drɔɔ vo lɛ, tɛrɛ lé ébo ’nyɔɔn ka tranu lɛ léé, é dan a nɔ lɛ ka lɛ, a ta. 14É dan ka drɔɔ vo lɛ yé é mini bɛnnu faa ta; sɔngɔné valé sɔnle ’ka dan kɛlɛ lɛ ka va lo; sɔnwinu ’ka dan kɛlɛ lɛ kalé trubɛnu va lo. 15Gakelebale é dan gyɛ faa si lɛ ka ma baa; Éjipiti tɛrɛ la gyɛ naanénu lé ka wo dɔɔ, é ’ka dan ka gyɛ lɛ wo do kpen nya lo, naa, é dan ka zapamunu faa gyɛ lɛ wo nya.
16Bɛnnu faa lé Gakelebale, kalé Bale é dan wo pa lɛ ka lee, ’ka wo gyɛ; té ka nyanai zén wo ta lo, té ka wolé balenu bɔ lo, naa, é dan kɛlɛ lɛ ka kunsan nya, ’bɛzama. 17Dé ka dan fe lɛ ka bli gi léé, bɛn ’konu kiɛre mini ko ta, ko dan wo bin lɛ kaa? 18Té ka kana lo. We lé Gakelebale, kalé Bale a kɛlɛ Faraɔn valé Éjipiti munu faa lɛ, a sele ’é dɔ ka gi ma. 19Gidanwenu blɛn lé wo kɛlɛ ka yuɛ va koo, gyɛzorowenu valé weblɛnblɛnnu koo, Gakelebale bɛ plɛplɛ lé ke é soile koo, we ’konu faa lé ka wo ye ka sile Éjipiti tɛrɛ la bléyi va, wo sele ’é dɔ ka gi ma; ’bɛ zo lé Gakelebale kalé Bale é dan a kɛlɛ lɛ, munu faa lé ka a kanana wo lee, wo lɛ. 20’Bɛ ta loru, dé mi kenu vo yé wo yɔɔ ka lee, Gakelebale, kalé Bale é dan gyebenu pa lɛ wo lɛ zia fɔɔ yé wo zamaga wo. 21Té di é kini ka gi wolé we ma lo; naa, Gakelebale, kalé Bale a ka méléna. É a Bale blɛn valé mitadanmawe kɛlɛ Bale nya. 22Gakelebale, kalé Bale é dan bɛn ’konu bin lɛ ka ’lɛ sɛné sɛné; ka ’ka bɔalɛ léé, ka wo faa gyɛ é nya do lo, dé bwi gi winu ’léé gi é da gyɛ yé wo wenyané kɛlɛ ka lɛ. 23Gakelebale, kalé Bale é dan bɛn ’konu pa lɛ ka lee; é dan wo fwila lɛ fɔɔ yé é wo gyɛ tata. 24É dan wo nwiinzannu pa lɛ ka lee, yé ka dan wo tɔ ta saan lɛ tɛrɛ la; wo va mi do kpen ’ka bɔa dɔle lɛ ka ma plɛplɛ lo, fɔɔ yé ka wo faa kulu ga. 25Wolé miyilinu lé ke wolé balenu nya, ka dan wo kyɛ ble lɛ. Té ka bli é bɔ wo ma gɔɔlifu valé wo ma kyan ma lo, té ka a si lo, dé é da kɛlɛ ka kunsan nya; wa bélé bo zo Gakelebale, kalé Bale yuɛ gi. 26Té ka da ’bɛzofɛ nya kalé kɔn gi lo; dé ka kɛlɛ, ’té bale a é pale ka ma bélé yee fɛnu zo; ’ka serele bo fɛ ’konu ma, ’ka wo ye bélé bo zo, naa, bale pamafɛ lé.
Currently Selected:
Bélidɔwesɛbɛ Fiézan 7: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
