Bélidɔwesɛbɛ Fiézan 6
6
Gakelebale sɔnné pale
(LvS 119:1–8)
1Bale sɔnnénu lé Gakelebale, kalé Bale a fe léé, maa a paa ka gi, wo valé bélidɔwenu valé ka gɔnɔlawenu nya, wo lé ke ’ko. É léé, maa wo paa ka gi yé ka wo ta tawo, tɛrɛ lé ka dan a si lɛ kazé nya, a ta. 2Dé ka kana Gakelebale, kalé Bale lee, bélidɔwenu faa valé gɔnɔlawenu faa lé maa a gɔɔn ka lɛ, dé ka wo lɛdɔma, ka koo, ka benu koo, ka benu é benu koo, dé ka wo lɛdɔma kalé tɛrɛla faa gi, ka dan mɔn lɛ tɛrɛ la. 3Amalé, Izraɛl munu, ’ka tɔné dɔ wo lɛ, yé ’ka wo ta tawo é zima, ka gi nanale valé ka fanle we ma, Gakelebale, ka tranu lé Bale a fe fɛan zo, a zo, ’té é a fe é wo léé, é dan tɛrɛ nyɔnɔzan nɔ lɛ ka lɛ bɛ.
4Izraɛl munu, ’ka tɔné dɔ. Gakelebale, kolé Bale do kpen ɛ ke Gakelebale nya.
5’Ka Gakelebale, kalé Bale lɔrɔ pa, ka bli faa koo, kaboen faa koo, kalé plɛplɛ faa koo, wo nya. 6Bélidɔwe ’konu lé maa wo nɔ ka lɛ kyɔ, ’wo vo ka bli gi ma. 7’Ka wo paa kalé nénu gi; dé ka a kalé kɔn gioo, dé ka a ta laoo, dé ka yiaoo, dé ka nwaoo, ’ka wo glewo. 8’Ka wo yere ka bɛ ma tɔmase nya, ’ka wo polu dɔ ka ’wuo ma yé é vo é plale ka yarapɛ la. 9’Ka wo gyɛ kalé duolivɔgiyili valé kalé duoli ma.
10Tɛrɛ lé Gakelebale, kalé Bale ébo ’nyɔɔn ka tranu Abraam valé Izak valé Jakɔb lɛ léé, é dan a nɔ lɛ ka lɛ, é dan go lɛ ka nya ana. Fla blɛn zinnu lé ka ’ka wo pa lɛ lo, ka dan nyana lɛ wo ta; 11kɔnnu lé wo ke é fanle fɛ zin gɔnɔ faa lé ka ’ka wo téé lɛ lo, wo nya, wo dan kɛlɛ lɛ kazé nya; ’yiguru lé ka ’ka wo bo lɛ lo koo, dɔrɔféinu lé ka ’ka wo pa lɛ lo koo, ɔliviyilinu lé ka ’ka wo suru lɛ lo koo, wo dan kɛlɛ lɛ kazé nya. 12Dé ka fɛ ble yé ka kan, ’ka yuɛ pa kabozen va; té ka gi é san Gakelebale lé é ka si luu gi Éjipiti tɛrɛ la, a ma lo. 13’Ka kana Gakelebale, kalé Bale lee, ’ka a bɔ, ’ka bale ’nyɔɔn a tɔ nya. 14Munu lé ka dan nyana lɛ wo méléna bɛ, té ka go wolé balenu zuo lo; 15naa, Gakelebale, kalé Bale é a maawo Bale nya ka méléna. A bli é dan fli lɛ ka ma yé é dan ka si lɛ tɛrɛ la tata. 16Té ka Gakelebale, kalé Bale gi dan, fɛan zo lé ka a kɛlɛ Masa, a zo lo. 17Gakelebale, kalé Bale sɔnnénu koo, alé gɔnɔlawenu koo, alé bélidɔwenu koo, ’té é wo gɔɔn ka lɛ bɛ, ’ka wo ta tawo. 18We lé é ke tegele valé é zima Gakelebale yuɛ gi, ’ka ’bɛ kɛlɛ, ka gi nanale valé ka wɔrale we gi, tɛrɛ zima lé Gakelebale ébo ’nyɔɔn ka tranu lɛ léé, é dan a nɔ lɛ ka lɛ bɛ, a ta, 19’té dé é ka nyanézannu faa bin ka ’lɛ, Gakelebale a fe fɛan zo, a zo.
20Dé yi do bɔ, dé ka be do a laa ka lee léé, weplalenu valé bélidɔwenu valé ka gɔnɔlawenu lé Gakelebale, kolé Bale a gɔɔn ka lɛ, wo gi lé nɔɔ? 21ka dan a fe lɛ ka be lɛ léé: Ko a é vinin Faraɔn lé luu nya Éjipiti tɛrɛ la, yé Gakelebale ko si Éjipiti tɛrɛ la é bɛ plɛplɛ nya. 22Gakelebale gyɛzorowenu valé tadanmawe blɛnblɛnnu kɛlɛ ko yuɛ va, Éjipiti tɛrɛ koo, Faraɔn koo, alé kɔngimunu koo, wo lɛ; 23é ko si ’bɛna yé é da ko nya, tɛrɛ lé ébo ’nyɔɔn ko tranu lɛ léé, é dan a nɔ lɛ ko lɛ, a ta. 24Gakelebale lé ko lɛ léé, ’ko bélidɔwe ’konu lɛdɔma yé ’ko kana yee Gakelebale, kolé Bale lee, ko gi nanale yifaama we gi, yé é ko vo é yuɛma, fɛan zo lé é a kɛlɛ kyɔ, a zo. 25Dé ko bélidɔwe ’konu lɛdɔma é zima, Gakelebale kolé Bale yuɛ va, é a fe ko lɛ fɛan zo, a zo, é dan ko ye lɛ mi tegelenu nya.
Currently Selected:
Bélidɔwesɛbɛ Fiézan 6: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
