Bélidɔwesɛbɛ Fiézan 21
21
Mi lé wo ’ka a gyɛzan ye lɛ lo
(Mi N 35:30–34)
1Tɛrɛ lé Gakelebale, kalé Bale a nɔna ka lɛ kazé nya, dé ka bɔ ana, dé ka migale ye féi yé ka ’ka a gyɛzan dɔɔa lo, 2ka va mi segelenu valé kalé weblezannu wo dan da lɛ yé wo dan mi gana valé a zi flanu méléna dan lɛ. 3Fla lé é ke mi gana lɛ é pu é mini a fla koɛnu ta, dé wa gi dɔɔ, fla ’ko ta mi segelenu é dan diridané do si lɛ. Diridané lé é ’ka tan nyanama pa lɛ lo yé wo ’ka tan yili vɔ lɛ a bɔrɔ ma lo, yee lé wo dan a si lɛ. 4Wo dan go lɛ diridané ’ko nya, ’yi lé ke yifaama yorona, ’té é ’ka bélié lo, ’té wo ’ka féi paan a sɔnɔ lo, ana; ’bɛna lé wo dan diridané ’ko bɔrɔ yéli lɛ, ’yi ’ko va. 5’Bɛ zuo, Lévi kulunu, Balebanzannu, wo dan bié lɛ; naa, Gakelebale, kalé Bale wo si a va ’é bɔle valé mi drɔɔ vole Gakelebale tɔ nya we ma, yé wo ɛ zavɔwe faa valé mituowe faa yuɛ gi boo. 6Fla lé mi gana ke a lɛ é pu é mini fla koɛnu ta, a ta mi segelenu faa é dan wo bɛ ma fɔli lɛ, diridané lé wa bɔrɔ yéli ’yi lé éé yoroan, a va bɛ, a ta loru. 7Yé wo dan a fe lɛ léé: Ko bɛ ’ka nyɛ ’ko zana lɛ lo, yé ko yuɛ ’ka a nyɛ zanana ye lɛ lo. 8Oo, Gakelebale, ilé munu Izraɛl lé i wo tabo, ’i wo ma we vo; té i mi ’ko nyɛ lé we dɔ ilé munu Izraɛl nwiin lo; dé wa fe a zo, ’té mi ’ko nyɛ ’ka wo nwiinwe nya lo. 9We lé ke tegele Gakelebale yuɛ gi, ’bɛ kɛlɛle nya lé mi lé we ’ka a nwiin lo, ka dan a nyɛ sia lɛ tɛrɛ la.
Lomu lé wa kun guli ma
(2 BDWS 20:14)
10Dé ka go guli dan lɛ ka nyanézannu va, dé Gakelebale wo pa ka lee, yé ka wo si luu nya, 11dé i dan le nɔnɔmi do ye lɛ wo va, yé é sɔ i lɛ léé, bé si i na nyaa? 12Dé é kɛlɛ a zo, i dan da lɛ a nya ilé kɔn gi. É dan é nwin puiɛ lɛ yé é sɔnéwɔlɛnu so; 13wa kun sɔan nya é ta, é dan bɛ si lɛ é ta, é dan vo lɛ ilé kɔn gi yé é dan é ti valé é bu wuvɔ lɛ moné do. ’Bɛ zuo ’i go a va; é dan kɛlɛ lɛ izé nya yé é dan kɛlɛ lɛ i na nya. 14’Bɛ zuo dé é ’ka sɔ lɛ i lɛ é dɛrɛ lo, ’i daan a ma yé ’é go fɛana sɔ a lɛ, ana; bii a sɛrɛ, amalé a se ’ka i lɛ léé, bé dan gɔɔli va lo, yé a se ’ka i lɛ léé, bé kɛlɛ a lɛ bélé luu zo lo.
Négɔné vininzan lé zarafɛ
(2 MNzfs 21:2–4)
15Dé mi do na a fié, yé a do sɔ a lɛ yé a do ’ka sɔ lɛ a lɛ lo, dé a benu kɛlɛ yé a be vininzan a le lé é ’ka sɔ lɛ a lɛ lo, ’bɛlé né nya, 16dé é a élé fuafɛnu gulina é benu ma, le lé é ’ka sɔ lɛ a lɛ lo, té ’é ’bɛlé né dɔna nɔ ’é sɔlɛle lé né lɛ lo. 17Naa, le lé é ’ka sɔ lɛ a lɛ lo, é a lé é ’bɛlé né dɔɔ é be vininzan nya, yé é ’bɛzé taa nɔ gɔnɔ fié; a be ’ko a alé pɛniɛlané nya, amalé mi be vinin lé se a a lɛ.
Mi lɛgama benu
(Fw 20:12; 2 Sam 18:14–15)
18Dé mi do be a, yé é ’ka mi zin nya lo, yé é a wemaplɛplɛzan nya, dé é ’ka tɔné dɔa é ti valé é bu dére lɛ lo, dé wo we lɛdɔ a gi faa yé é ’ka wo lɛdɔama duowo lo, 19a ti valé a bu a si yé ’wo da a nya fla mi segelenu va, wolé flagɔrɔ ’léé. 20Wo dan a fe lɛ fla mi segelenu lɛ léé: Ko be lé ke ’ko, é ’ka mi zin nya lo yé alé we ma a plɛplɛ; é ’ka é tɔné dɔa ko dére lɛ lo; ébo no wevɔnle valé nwɛ tanle lɛ. 21Yé alé flamunu faa é dan gɔlɛ vuli lɛ a va yé é ga. ’Bɛ zo lé ka wenaané si ka méléna, Izraɛl munu faa lé a ’male valé kanale we gi.
22Mi lé é ’é gyɛwe kɛlɛ yé wa gyɛ a dunle nya yili ma, 23té tu é kini a gale ma yili ma lo; naa, a yi duo nya, ’ka a pa, naa, mi lé wa dun yili ma é a balepamafɛ nya Kazambale yuɛ gi, azama; tɛrɛ lé Gakelebale, kalé Bale a nɔ ka lɛ tɔnɔfɛ nya, té ka a tiri dɔ lo.
Currently Selected:
Bélidɔwesɛbɛ Fiézan 21: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
