Bélidɔwesɛbɛ Fiézan 13
13
Bale bɛ bɔle ma we lɛdɔle
(Mt 24:24; 2 Ts 2:5–12)
1-2Dé balelayezan do nwa ka méléna, ɛɛ, dé nyɛgyɛzan lé, dé tɔmase do léé, ɛɛ, dé we blɛnblɛn lé, dé é a fe ka lɛ yé a lɛ sɔɔ weboen nya, yé ’bɛ zuo é lé ka lɛ léé, kaa go bale bɛnu zuo, kaa wo bɔ, ’té ka ’ka balenu ’ko dɔɔa lo, 3té ka tɔné dɔ balelayezan ’ko valé nyɛgyɛzan ’ko dére lɛ lo; naa, Gakelebale, kalé Bale a ka gi danna, dé ka Gakelebale, kalé Bale lɔrɔ paan ka bli faa valé kaboen faa nyaa? a gi dɔɔle we gi. 4’Ka go Gakelebale, kalé Bale ɛ zuo, yé ’ka kana yee ɛ lee; ’ka a sɔnnénu pa, ’ka a dére lɛdɔma, ’ka a bɔ, yé ’ka buvɔ yee ɛ ma. 5Ka ’bɛ balelayezan valé ’bɛ nyɛgyɛzan gyɛ, naa, é a ka nwana Gakelebale, kalé Bale lé é ka si luu gi Éjipiti tɛrɛ la, a ma, yé zi lé Gakelebale, kalé Bale a gɔɔn ka lɛ, é a a va léé, ’é ka si ’bɛ zi ta. ’Ka a gyɛ yé ’bɛ zo lé wenaané si ka méléna.
6Dé i bu lé négɔné léé, dé i be léé, dé i lu léé, i na lé ka yiaan a nya saa do la, dé ’bɛ léé, i béé lé é sɔ i lɛ bélé ibozen zo, dé ’bɛ léé, dé wo va mi do da kyeen gi yé é lé i lɛ léé, kaa go, kaa bale bɛ bɔ, dé é a bale lé bii valé i tinu ’ka a dɔɔa é kyɛn lo, a nya, 7dé wa ka zi munu lé balenu nya, dé wa ka sɔnɔoo, dé wa baaoo, é sia tɛrɛ glɛ do ma yé é bɔ tɛrɛ glɛ koɛ ma, dé é a fe ka lɛ léé, ’wo go ’bɛ balenu bɔ, 8té ka a nyi si a lɛ lo, té ka tɔné dɔ a lɛ lo; té ka nyanai é zén a ta lo, té bé vo lo, té bé ta yɔɔ lo. 9’Bé gyɛ; bii ɛ i bɛ nwa é vinin a gyɛle we gi, yé ’bɛ zuo munu faa é pa i va; 10’ka gɔlɛ vuli a va yé é ga, é a kwa kulina léé, ’é ka si Gakelebale, kalé Bale lé é ka si luu gi Éjipiti tɛrɛ la, a zuo, ’bɛzama. 11’Wa kɛlɛ a zo, Izraɛl munu faa lé a we ’male valé kanale we gi, yé wo ’ka ’bɛ zo wenaané kɛla ka méléna é dɛrɛ lo.
12Flanu lé Gakelebale, kalé Bale a nɔ ka lɛ ka nyanalaflanu nya bɛ, dé ka wo va fla do tawe ’ma léé, 13mi sɛrɛlenu nwa wo méléna, yé wo flamunu ’wuo sɛrɛ a fele nya léé, kaa go, kaa bale bɛnu bɔ, ’té ka ’ka ’bɛ balenu dɔɔa lo, 14’ka we ’ko zuoi kuli; ’ka a va gini, ’ka we gi laa é zima. Dé we ’ko a a zo weboen nya, dé wa gi dɔɔ é zima, dé wo bozowe ’ko kɛlɛ ka va weboen nya, 15é a lé ka fla ’ko la munu gyɛ gwɔun nya, ’ka bale pa fla ’ko valé é tafɛnu faa ma, yé ’ka winu gyɛ gwɔun nya. 16’Ka gulizarafɛnu faa zun dɔ fla vuun la, yé ’ka wo kyɛ ble, woo valé fla nya, Gakelebale, kalé Bale ’lɛ. Fla ’ko é dan vo lɛ é ’bin nya lɛɛfaama, té wa pa é pa gi monomono lo. 17Fɛ lé wo bale pa a ma bɛ, té a do kpen é vo ka lee lo, Gakelebale bli dɔralale koo, alé nyanai zénle ka ta valé zin kɛlɛle ka lɛ koo, ka fanle koo, wo faa we gi, é ’ébo ’nyɔɔn ka tranu lɛ fɛan zo, a zo. 18Dé ka Gakelebale, kalé Bale dére ’ma, yé a sɔnnénu lé maa wo gɔɔn ka lɛ kyɔ, dé ka wo pa, yé we lé é ke é drɔle Gakelebale, kalé Bale yuɛ gi, dé ka ’bɛ kɛlɛ, Gakelebale é dan we ’konu faa kɛlɛ lɛ ka lɛ.
Currently Selected:
Bélidɔwesɛbɛ Fiézan 13: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
