2 Korɛnt Munu 4
4
Fɛwezan a tɛrɛbɔ gi
(1 Ts 2:1–6; 2 Tim 2:8–11)
1Ko nyanama ’ko ye Bale lé nyanai zénle ko ta nya, amalé dé ko a pana ko fuu ’ka sié ko ta lo. 2Yaragyɛwenu lé wo ’bɛnu kɛla kyeen gi, ko sɔn vɔa ’bɛnu ma. Ko giébɛ ’ka gi kinile yɛrama lo, yé ko ’ka we ke sié Kazambale Dére va lo. Naa, ko webozen fé, amalé ko kobo ma we zin fé munu faa lé wevasibli lɛ, Kazambale yuɛ va. 3Yé dé kolé Wenéné a é ziin é yɔɔle, ’té é a é yɔɔle munu lé wa gona zamaga wona, wo ɛ ma. 4Wo bli ’ka we lɛ lo, bléyi ’ko vamunu lé bale wolé wedɔɔle san wo lee, amale Krist lé ke Kazambale bɔmazan nya, alé fua tɔbɔle lé Wenéné lé ke bélé kyɛsan zo, wo ’ka a dɔɔa lo. 5Ko ’ka kobozen lé we fena lo; Mizan Jézu Krist lé we lé ko ke a fena, yé ko léé, ko a ka wuozannu nya Jézu lé we ma. 6Kazambale lé é a fe léé: San ’é bi gunutinu va ma, yee Bale duo lé, ’élé san bi ko bli gi yé é ko va kini, yé Bale lé fuasan lé ko yé Krist yara, é ko bɔn‐in dɔ ko ma yé mi bɛnu a gi dɔɔ ko ma.
7Fɛwezan ’ko, é a ko tɛrɛbɔnu gi, léé, munu a gi dɔɔ léé, plɛplɛ boen ’ko éé sié Kazambale va; é ’ka sié ko va lo. 8Ko a é tunule bɛ faa ma, naa, wo ’ka ko kele lɛ lo; ko a kleblele gi, naa, ko bli a we lɛ duowo; 9woo nyané paan ko ta, naa, ko ’ka é vole ko do lo; woo ko boo, naa, ko ’ka gaan lo; 10ko Jézu gale ’léé dɔɔ ko kɔlɛ gi, Jézu lé bélile nagɔɔnle ko kɔlɛ gi we ma. 11Naa, ko lé ko ke é yuɛma, ko a yifaama é nɔle gale lɛ Jézu lé we ma, Jézu lé bélile nagɔɔnle kolé gakɔlɛ gi we ma.
12’Ko zo lé ga éé nyanama paan ko gi, ’té bélile éé nyanama paan ka gi. 13Mi lé é a gyɛ sɛbɛ gi léé: Maa bli vo a lɛ, amalé maa a fe, bli lé ke azan gi, yee bli duo ɛ ke ko gi, amalé ko é ziin, ko pa a ta, bɛwemalé ko we fé. 14Ko a gi dɔɔ léé, mian é Mizan Jézu nwa gamunu va, ’bɛzan é dan ko nwa lɛ é ziin Jézu va, yé é dan é ziin ko valé kanu bɔra lɛ é yara. 15Naa, kalé we ma lé we ’konu faa ke bɔna, yé Bale lé zin kɛlɛle gi gyɛle lé we ma lé mi kiɛre kiɛre é dan Kazambale bɔ vɔ lɛ, yé ’bɛ é dan Bale tɔ bɔ lɛ.
Ko tawoo blipale nya
(Fil 1:23; 1 Pi 1:6–9; 1 Jn 3:2–3)
16Bɛwemalé ko fuu ’ka sié ko ta lo. Dé ko kɔlɛ a gana ko maoo, mi lé é ke ko gi, ’té éé nɔlaan é boroné nya yi faa do do ma. 17Kolé klenu ’ka we do nya lo yé wo dan nyaa lɛ laoɛ. Wo ma tɔnɔ é dan kɛlɛ lɛ fuasan lé ke fɛ boen nya, ’té a glɛ ’ka lo, a nya. É gié mi lé gi bɔrɔle faa ta. 18Yé é ziin, fɛnu lé mi éé ’bɛnu yé é yuɛ nya, ko ’ka ko yuɛ vɔa ’bɛnu ta lo, ko yuɛ vɔa fɛnu lé mi ’ka wo yé é yuɛ nya lo, wo ɛ ta; naa, yuɛyefɛnu a giéfɛnu nya yé fɛnu lé mi ’ka wo yé é yuɛ nya lo, wo dan vo lɛ ana lɛɛfaama, a glɛ ’ka lo, azama.
Currently Selected:
2 Korɛnt Munu 4: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
