2 Korɛnt Munu 3
3
Ko a Kazambale va nyanama dɛrɛ pazannu nya
(Fw 34:28–35; Gal 3:18–29)
1Ka léé, ko nwa ko tɔbɔle nya é ziin? Taa, ko mawe a a gi léé, kobo tɔbɔsɛbɛ pa ka lɛ ziaa? Taa, ko mawe a a gi léé, ka ko tɔbɔsɛbɛ pa mi bɛnu lɛ ziaa? bélé fɛan zo lé mi kenu mawe ke a gi, a zoo? 2’Kaanu ɛ ke kolé sɛbɛ nya, sɛbɛ lé é ke é gyɛle ko bli gi, a nya; sɛbɛ lé munu faa a dɔɔ, ’té wa ta fé, a nya. 3’Kaanu ɛ ke Krist lé sɛbɛ wéiin lé, ko panyanama a gyɛ, a nya; wo ’ka a gyɛ lɛ nankréyi nya lo; naa, wa gyɛ Bale yuɛmale Léli nya. Wo ’ka a gyɛ lɛ gɔlɛfén ta lo; naa, wa gyɛ mi nɛfén ɛ ta, ka blinu gi.
4Krist lé we ma lé ko bli a Kazambale lɛ, amalé ko we fé ’bɛ zo. 5Maa ’ka a fena léé, kobozen é bɔa ko ’wuogibɔrɔmawe do kɛlɛle lɛ, bélé fɛan zo lé éé sié kobozen va, a zo lo; naa, ko bɔle we kɛlɛle lɛ éé sié Kazambale ɛ va. 6Yé é bɔ ko va é ziin yé ko bɔ kɛlɛle lɛ gipawe dɛrɛ gi nyanamapazannu nya léli yɛrama, naa, sɛbɛ yɛrama kaan lo; sɛbɛ éé fɛ gya, yé Léli éé fɛ bélié.
7Bale va nyanama lé ke bélidɔwe nya, ’té é ke é gyɛle sɛbɛwɔlɛnu nya gɔlɛ ta bɛ, alé we pélisia fuasan nya, dɔlé ’té éé mi gya. Fuasan ’ko é Moizi yara bi fɔɔ yé Izraɛl munu ’ka bɔa a yara naginile lɛ lo, dɔlé ’té fuasan ’ko ’ka mɔnfɛ nya lo. 8Dé ’bɛ a ’bɛ zo, Bale va nyanama lé éé Léli Sauun no nii? ’Bɛlé fuasan ’ka mini lɛ koɛ ta loo? 9Bale va nyanama lé éé we dɔa mi nwiin, dé ’bɛlé fuasan ana, ’té Bale va nyanama lé éé mi kɛla tegele, ’té ’bɛlé fuasan mini. 10Weboen nya, fɛ lé alé fuasan ke é vinin, ’bɛ ’ka fuasan nya é dɛrɛ lo, fuasan do mini a ta, azama. 11Dé giéfɛ lé fuasan ana ’naan, ’té fɛ lé é dan vo lɛ ana, ’té ’bɛlé fuasan ’ka dan mini lɛ a ta loo?
12Ko bli a ’bɛ zo we lɛ, amalé ko we fé ko fuu nya ko ta, 13yé ko ’ka sɔné buaan ko yara bélé Moizi a kɛlɛ fɛan zo, a zo lo. É sɔné bua é yara, léé, té Izraɛl munu yuɛ é vɔ fuasan lé ke giéfɛ nya, a ta lo. 14Naa, wo tɔné gi kɛlɛ é yuyu fɔɔ yi ’ko nya, ’té sɔné duo ana, bléyian va lé wo ke Gipawe Kwa ta fena, a bléyi va, ’té é ’ka é sile lo, naa, dé mi a Krist gi, ’té é a é sile ’bɛzan ta. 15Fɔɔ yi ’ko nya, dé wa Moizi lé sɛbɛ ta fena, é a bélé fɛan zo lé sɔné a é zénle wo bli ta, a zo, 16naa, dé mi nɔla Mizan va, sɔné éé sié a ta. 17Mizan lé wa fe bɛ, Bale Léli lé, yé fɛana lé Mizan Léli ke, ana lé mi a éboma. 18Yé sɔné ’ka ko yara lo amalé ko Mizan lé fuasan yé tegele bélé fɛan zo lé mi é ’é yara yé vlinvlin gi, a zo. ’Bɛ zo lé, Mizan Léli éé goo ko dɔbɛ nɔlale nya, ’té éé kolé fuasan taa paan, fɔɔ yé kolé fuasan é kɛlɛ bélé Mizan zé zo.
Currently Selected:
2 Korɛnt Munu 3: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
