1 Korent munu 12
12
Kazambale Léli lé blɛnu lé we
(Rom 12:3–8; Éf 4:4–12; 1 Pi 4:10–11)
1An bwenu, maa ’ka a va léé, ka vo ka tanyila Kazambale Léli lé blɛnu lé we gi lo. 2Ka a gi dɔɔ léé, dé ka a yobanmunu nya, ka nyi si léé, wo go ka nya bobogyɛ miyilinu zuo; dé wo go fɛofɛana wo go ka nya ’bɛna. 3Bɛwemalé maa lé ka lɛ wéiin léé, dé mi a wefena Kazambale Léli nya, é ’ka bɔa a fele lɛ léé: Jézu a balepamazan nya, lo; yé dé mi ’ka wefena Léli Sauun nya lo, é ’ka bɔa a fele lɛ léé, Jézu a Mizan nya, lo.
4Kazambale Léli lé blɛ gɔnɔ a di, naa, Kazambale Léli duo lé; 5Bale va nyanama gɔnɔ a di, naa, Mizan duo lé; 6Bale lé we kɛlɛle gɔnɔ a di, naa, Kazambale duo ɛ nyanama faa paan munu faa gi.
7Kazambale éé blɛ gulian mi faa do do ma é Léli nya, munu faa lé a gi tɔnɔ yele we ma. 8Kazambale Léli éé wedɔɔdére no mi do lɛ, yé éé gikinidére no mi do lɛ Kazambale Léli duo nya, 9yé éé blipale no mi do lɛ Kazambale Léli duo nya, yé éé mi béli blɛnu kɛla mi do lɛ Kazambale Léli duo nya, 10yé éé gyɛzorowenu kɛlɛle blɛ kɛla mi do lɛ, yé éé balelawe fele no mi do lɛ, yé éé léli gɔnɔ dɔɔle no mi do lɛ, yé éé dére gɔnɔ kiɛre vɔle no mi do lɛ, yé é danamla kɛlɛle no mi do lɛ. 11Naa, Kazambale Léli do kpen duo ɛ blɛ ’konu faa kɛla, yé éé wo gulian munu faa do do ma élé blibɔmawe yɛrama.
12Mi kɔlɛ a do, yé a vafɛnu a di. Mi kɔlɛvafɛnu a dioo, naa, wo faa a kɔlɛ do kpen nya. A zo duo lé Krist zé ke. 13Kazambale Léli do kpen nya lé wo kaa faa batizéwo kɛlɛle kɔlɛ do kpen nya we ma; dé ko a Grɛkinu nyaoo, dé ko a luu nyaoo, dé ko a miné nyaoo, yee Léli do kpen lé kaa faa a mini bélé ’yi zo.
14A zo lé mi kɔlɛ ’ka kɔlɛvafɛ do saa nya lo; a vafɛnu a di. 15Dé gane a fe léé: Maa ’ka bɛ nya lo, amalé maa ’ka kɔlɛ va lo, bɛwemalé é ’ka kɔlɛ va loo? 16Yé dé tɔné a fe léé: Maa ’ka yuɛ nya lo, amalé maa ’ka kɔlɛ va lo, bɛwemalé é ’ka kɔlɛ va loo? 17Dé kɔlɛ faa kɛlɛ yuɛ saa nya, ’té mi é dan we ’ma lɛ kaa? Dé kɔlɛ faa kɛlɛ tɔné saa nya, ’té mi é dan fɛ gin si lɛ kaa? 18Naa, webozen nya, Kazambale mi kɔlɛvafɛnu faa do do pa mi kɔlɛ ma bélé fɛan zo lé é sɔ a lɛ, a zo. 19Dé wo faa kɛlɛ kɔlɛvafɛ do kpen nya, ’té kɔlɛ bozen éé kɛla kyɛɛn? 20Naa, sin, kɔlɛvafɛnu a di, yé kɔlɛ a do kpen. 21Mi yuɛ ’ka bɔa a fele lɛ mi bɛ lɛ léé: An mawe ’ka i gi lo lo; yé mi ’wuo ’ka bɔa a fele lɛ mi ganenu lɛ léé: An mawe ’ka ka gi lo lo. 22Naa, kɔlɛvafɛnu lé woo wo yé fɛ tɔɔtɔɔnu nya, kɔlɛ mawe a wo gi blɛn, 23yé kɔlɛvafɛnu lé é dɔ ko gi léé, wolé we ’ka blɛn kɔlɛ va lo, ko wolé we kɛla blɛn é minini. A zo lé kɔlɛvafɛnu lé wo ’ka é nɔnɔmi lo, ko wo tɔ bɔa, 24yé wo lé wo ke é nɔnɔmi, wo mawe ’ka wo tɔbɔle gi lo. Kazambale mi kɔlɛ bɛ pa do kɔlɛvafɛnu lé wolé we ’ka blɛn lo, wo tɔbɔle we gi, 25té kɔlɛvafɛnu é kini ékema lo we ma, naa, ’wo ’wo ke ma we kɛlɛ. 26Yé dé kɔlɛvafɛ do a nyané blena, ’té kɔlɛvafɛnu faa éé nyané blé a va. Yé dé wo kɔlɛvafɛ do tɔ bɔ, ’té kɔlɛvafɛnu faa gi éé nanaan a va.
27Ka a Krist kɔlɛ nya, yé ka a a kɔlɛvafɛ do donu nya. 28Yé Kazambale munu dɔ léglizi gi ’ko zo: a vininzannu a nwunvɔzannu nya; a fiézannu a balelayemunu nya; a yaazannu a wepaamigizannu nya; ’bɛ zuo, munu lé, gyɛzorowe kɛlɛle blɛ ke wo lee; ’bɛ zuo, munu lé, mi bélile koo, bɔle mi va koo, kɛlɛle mi ’lɛzannu nya koo, dére kiɛre vɔle koo, ’bɛ blɛnu ke wo lee, woo lé. 29Munu faa a nwunvɔzannu nyaa? Wo faa a balelayezannu nyaa? Wo faa a wepaamigizannu nyaa? 30Gyɛzorowe kɛlɛle blɛ a wo faa lee? Mi béli blɛ a wo faa lee? Wo faa éé we fé dére kiɛre gii? Wo faa a danamla kɛlɛzannu nyaa?
31Ka bli ’é bɔ blɛnu va blɛ zima kaiinu ma ma.
Sɔlɛle lé we
(Mt 22:36–40; Rom 13:8–10; 1 Jn 4:7–12)
Yé zi lé é ke é zima é mini zi pɔnénu faa ta, maa dan a nagɔɔn lɛ ka lɛ.
Currently Selected:
1 Korent munu 12: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
