1 Korent munu 11
11
1’Ka an zuosona, bélé fɛan zo lé an Krist zuosonaan, a zo.
É a lé lomu é fɛ dɔ ’wo ’wuo ma
(Éf 5:22–24; 1 Tim 2:8–14)
2An sele a ka gi yifaama, yé we faa lé maa a paa ka gi, ka a tawona wo ta ’kyɛ, amalé maa ka tɔ zin fé.
3Naa, é sɔ an lɛ duowo léé, ka we ’ko dɔɔ, léé: Krist a mi faa zan nya, yé gɔné a le zan nya, yé Kazambale a Krist zan nya. 4Dé é a gɔnéogɔnéan nya, dé é a bazorona, dé é a balelawe fena, ’té fɛ a é wɔrale a ’wuo ma, ’té é a ézan gyɛna yara nya. 5Lomu zé a é yɛrama. Dé é a leolean nya, dé é a bazorona, dé é a balelawe fena, dé fɛ ’ka é dɔle a ’wuo ma lo, ’té é a ézan gyɛna yara nya. É a bélé fɛan zo lé a nwin a é puiɛle tata, a zo. 6Naa, dé fɛ ’ka é dɔle le ’wuo ma lo, ’wa nwin bɔi. Dé a bɔile valé a puiɛle tata a gya yara nya, ’é fɛ dɔ é ’wuo ma. 7Kazambale gɔné kɛlɛ bélé ébozen zo, é tɔbɔfɛ nya, amalé é ’ka lé é é ’wuo ta yɔɔ lo. Naa, le a gɔné tɔbɔfɛ nya. 8Gɔné ’ka si lɛ le gi lo, naa, le ɛ si gɔné gi. 9Yé wo ’ka gɔné kɛlɛ lɛ le lé we ma lo; naa, wo le ɛ kɛlɛ gɔné lé we ma. 10Bɛwemalé, é a lé le é fɛ dɔ é ’wuo ma se lé é ke a wuo, a tɔmase nya, lanjenu lé we ma. 11Naa, dé wa Mizan lé munu nya, fɛan zo lé gɔné mawe a le gi, a zo duo lé le mawe a gɔné gi. 12Fɛan zo lé le si gɔné gi, a zo duo lé le éé gɔné yaan, yé Kazambale ɛ wo faa paan zia. 13É dɔ ka gi kaa? Dé le a bazorona Kazambale lɛ é ’wuo ma pla nya, ’bɛ a é zimaa? 14Ka ’ka a gi dɔɔa ka bli gi léé, gɔné nwin tuule zuu a yaragyɛwe nya loo? 15Naa, dé é a le zé nya, nwin tuule zuu éé ’bɛ nyɛɛan. Bale nwin nɔ a lɛ a tayɔɔfɛ nya. 16Dé é sɔ mian lɛ léé, éé zavɔa we ’ko ma, kozé kɛlɛbɛ ’ka ’bɛ nya lo. Kazambale lé léglizigimunu é ziin, wozé kɛlɛbɛ ’ka ’bɛ nya lo.
Mizan lé fɛ blele lé we
(Mt 26:26–28; Mk 14:22–25; Lk 22:19–20)
17Wenu lé maa a wo plana ka lɛ ’ko, a do lé maa a gona a fena, ’bɛ ’ka ka tɔzinféwe nya lo. Yee lé ke léé, ka zénle ékeva ’ka goo munu nya wezin va lo; éé goo wo nya we lɛrɛlɛrɛ va. 18A vininzan lé ke ’ko: maa a ’ma léé, dé ka zén ékeva ka gɔnɔ a é bɔile a gi, yé é dɔ an gi léé, we lé maa a ’ma bɛ, a ke a a zo. 19Yé é a lé ka gi é bɔi, yé ’bɛ nya lé munu é dan mi zinnu dɔɔ lɛ. 20Ka zénle ékeva ’ko, ’bɛ a kabo zé ɛ nya, ka ’ka a kɛlɛna Mizan lé fɛ blele we ma lo. 21Naa, dé ka a fɛ blena, ka ’ka ka ke lɛbɛn‐é lo, ka faa do do kabozen lé fɛ blé, ’té nwɛ éé mi ke gya, ’té lɔrɔ éé mi ke gya. 22Kalé kɔnnu ’ka loo? Ka ’ka bɔaléé, ka fɛ ble yé ka fɛ mini kalé kɔn gi loo? Taa, ka Kazambale lé léglizi yé boafɛ nyaa? Yé ka a gi nyanégyɛzannu gya yara nyaa? Ka léé, maa fe nɔɔ? Maa ka tɔ zin fee? Gba. We ’ko gi, maa ’ka ka tɔ zin fena lo.
23We lé maa a paa ka gi bɛ, Mizan ɛ gɔɔn an lɛ. Yee lé ke ’ko: yian nya lé wo dan Mizan Jézu pa lɛ munu lee, é buru si, 24yé é Bale bɔ vɔ yé é a bɔi yé é léé: An kɔlɛ lé wa bɔi ka lɛ, yee lé ke ko. ’Ka we ’ko kɛlɛ an sele dɔle ka gi we ma. 25’Bɛ zo duo lé, fɛblele zuo, é ’yiminikana si yé é léé: Fɛ lé ke kana ’ko gi, an nyɛ lé é gipawe dɔ plɛplɛ, yee lé. Dé ka a fɛ minina a gi yian nya, ’ka we ’ko kɛlɛ an sele dɔle ka gi we ma. 26Dé ka a buru ’ko blena yian nya, dé ka a kana ’ko gifɛ minina yian nya, ’té Mizan gale lé we lé ka ke a fena, fɔɔ yé é da.
27Bɛwemalé dé mian alé Mizan lé buru blele valé kanagifɛ minile yara kaan lo, dé é buru ’ko ble, dé é ’yi mini kana ’ko gi, ’té é Mizan kɔlɛ valé a nyɛ sɔnné sɛrɛ. 28Bɛwemalé mi faa do do ’é bɔn‐in dan ébo lé we ma, ’bɛ zuo yé ’é buru ble yé ’é kanagifɛ mini. 29Aléwemalé dé mian é buru ’ko ble yé é Mizan lé kana ’ko gifɛ mini, ’té é ’ka Mizan kɔlɛ lé we gi maan lo, é we dɔ ébo nwiin.
30’Bɛ we ’ko ma lé gyɛgyɛmunu valé gyɛamamunu a ka va kiɛre, yé mi kenu ga é ziin. 31Naa, dé é kɛlɛ léé, kaa kaabo lé we ble, wo ’ka dan kaalé we ble lɛ lo. 32Naa, dé Mizan kaalé we ble, ’té é we lɛdɔ ɛ wo kaa gi, léé, té wo ga dɔ kaa nwiin tɛrɛlamunu nya ékeva lo. 33Bɛwemalé, an bwenu, dé ka zén ékeva Mizan lé fɛ blele we gi, ’ka ka ke lɛbɛn. 34Dé lɔrɔ a mi do gyɛna, ’é fɛ ble ébo lé kɔn ’léé ma, té ka zén ékeva we dɔle kabo nwiin we ma lo ma.
Dé an bɔ ka va faa, maa dan we pɔnénu yuɛ gi bo lɛ.
Currently Selected:
1 Korent munu 11: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
