Filipper 4
4
Dit 4. Kapitel
1Nü da, min lew Brödhern eter min Forlangen, min Frügged en min Krōn, bestun sa ön din Herr, I Lewsten.
2Ik formåne di Evodian, en di Syntyche, dat ja jens Sens ön di Herr sen.
3Jå ik bed uk di, min tru Helper, stūn dös Wüffen bi, diär me mi streden ha foar dit Evangilje, me Clemens en din üdern van min Helpers, huns Nomer skrewwen stun ön dit Bok van-t Lewent.
4Frügge ju langsen ön di Herr, en wederom si ik: Frügge ju.
5Let ju Beskidenheid bi alle Mensken bekänt ud. Di Herr es naibi.
6Wis ek ängstelk besörrigt, mar let ön alle Dingen ju Bodig en Wenskin me Danksien bekänt ud voar Gott.
7En di Fred van Gott, diär bowen allen Forstand geid, bewåre ju Hart en Sen ön Kristus Jesus.
8Firder, lew Brödhern! wat wårhaftig es, wat iärbar es, wat rogtfârdig es, al wat rin es, wat lewlik es, wat wel klinget, en meskin en Dögt es, munt en Low es, betänk dit Alles.
9Wat I uk lirt, en fingen, en hjert en sen ha van mi, dit dö; da wel Gottes Fred me ju wis.
10En ik sen vul blid ön di Herr, dat I weder wakker uden sen, foar mi tö sörgin; alhurwel I uk aft mi betågt hå, mar I sag jit nin Kands diärtö.
11Ik si dit, ek dat ik Gebrek hed hå; for ik hå-t lirt, me min Låg töfred tö wisen.
12Ik kjen lig, en ik kjen hōg wis. Ik kjen mi ön alle Dingen skekke en eter ark Wis, bid sat tö wisen, en Hunger tö liden, bid aurflödig tö haen, en Wånt lid.
13Ik formai Alles dör Kristus, diär mi Kraft jewt.
14I hå dag wel diärön dön, dat I ju min Bedrüwwing sa önnommen hå.
15En uk I, Filipper! wet, dat ik van dit Evangiljes jest Begen of ön, üs ik van Macedonien ofreiset, nin Geminte mi wat medilet hed, om diäraur Rekening aur Ütjewten en Innemmen tö måkin, üs I alining.
16For uk ön Thessalonik stjürt I tö min Bedârf eter dat ik nödig hed, jen lop, en da weder jenlop.
17Hat es ek sa, dat ik di Gaw sjuk, mar ik sjuk di Frügt, dat di ön ju Rekening aurflödig es.
18For ik hå Alles, en hå-t aurleidig. Ik ha volâp, sönt ik van Epafroditus dit fing, wat I mi stjürt hå, üs en dâlk Hârm, en lewlik Åfer, sa üs-t Gott håget.
19O min lewwer Gott iw ju dag volâp tö ju Bedârf ön Noad eter sin Rikdom ön di Herligheid, ön Kristus Jesus.
20Üs Herr Gott en üs Våder wis Iär van Ewigheid tö Ewigheid. Amen.
21Gröt alle Helligen ön Kristus Jesus. Di Brödhern, diär bi mi sen, gröt ju.
22Alle Helligen gröt ju, en voarskel danen van di Kaisers Hüs.
23Ăśs Herr Jesus Kristus sin Gnad wis me ju al. Amen.
Currently Selected:
Filipper 4: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
