Markus 13
13
Dit 13. Capitel.
1En diär hi üt di Tempel ging, sprok jen van sin Lirlings tö höm: Meister, lukke, wat hok Stin, en watfoar Begning dit es?
2En Jesus swåret, en said tö jam: Sjogst dü wel di hile gurt Begning? Ek en Stin wel er üp di üder bliw, diär ek skel ofbreken ud.
3En diär hi üp di Ölibârig seet lik aurvoar di Tempel, fråget Petrus, en Jakobus, en Johannes, en Andreas höm alining.
4Si üüs, wan wel dit Alles ske? En /wat/ wel dit Teken wiis, wan dit Alles tö föllig komt?
5Jesus swåret jam, en begent tö sien: Nem ju ön Agt, dat er ju Nemmen forfört.
6For diär wel Vulen kom ön min Noom en si: Ik sen Christus, en wel Vulen forför.
7Wan I tö hiren fo van Krig en Oarlef, da fürgt ju ek, for hat mut Alles geske. Mar di Jend es jit ek kjemmen.
8Wan dit jen Volk apstånt tögen dit üder Volk, en dit jen Könningrik tögen dit üder Könningrik apstånt; en wan er Öördsjilwin hen en weder es, en jür Tid en Forfirels sen. Dit es di Begen van di Noad.
9Mar se I voar ju sallew tö. For ja wel ju aurlöwere ön di Råd en on di Synagogen: en I skel slain ud, en I mut henfört ud voar Vögeder en Könninger om min wel, tö en Tjügnis aur jam.
10En dit Evangilje mut jest prötjet ud, voar alle Volken.
11Wan ja ju nü henför en aurlöwere wel, da sörge ek tövoaren, wat I si skel, en betäänk ju ek, mar wat ju tö di Stünd iwen ud, dit spreek. For I sen-t ek, diär spreek, mar di hellig Geist.
12En di jen Brödher wel di üder Brödher aurlöwere tö di Doad, en di Vader sin Seen; en di Biärner wel jam apsäät tögen di Aaldern; en wel jam tö di Doad forhelp.
13En I skel håtet ud van arkjen om min Nooms wel. Mar hokken üthârdet tö Jend, di skel selig ud.
14Wan I di Grūl van di Forwösting tö sen fo, hur van di Profet Daniel said heed, dat er stånt, diär-er ek henhjert; da flögt, al hokken ön Judäa es, üp di Bariger.
15En hokken üp Tåk es, di kom ek diäl ön-t Hüs, en kom ek iin, om wat ön sin Hüs tö hålin.
16En hokken üp Eker es, di kir ek weder om, om sin Kloader tö hålin.
17Mar we di Wüffen, diär üp Wei sen, en diär Süg ha ön di Dågen.
18Bed dag, dat ju Flögt ek ske mai ön Wunterem.
19For ön di Dagen skel er sa-n Bedrüwwing wiis, üs-er van tö voaren jit older wessen heed, van Warlds Begen of ön tö nü tö, welk Gott skåben heed; en üs-er uk ek weder ud skel.
20En wan di Herr dös Dågen ek forkort hed, da kam-er niin Mensk fri; mar om di Ütwäleten jar wel, diär hi ütkwoart heed, heed hi di Dagen forkort.
21Wan-er da hokken tö ju said: Sé, hjir es Christus, diär es er, üs I se; da skel I dit ek liiw.
22For diär wel falsk Christussen, en falsk Profeten âpstun, diär Teken en Wunder forrogt, om tö forleitin, wan-t mögelk wiär, uk di Ütwäleten.
23Mar nem I ju ön Agt. Betäänk, ik hå-t ju Alles tövoaren said.
24Mar ön di Dågen eter di Bedrüwwing wel Sen en Mūn jår Skiin forlees.
25En di Stiärner wel van Hemmel fål; en di Kraften, diär ön Hemmel sen, skel forskåket ud.
26En da wel ja di Menskenseen kommen se ön di Wolken me gurt Kraft en Herligheid.
27En da wel hi sin Engeler stjür, en wel sin Ütwäleten forsåmle van al vjur Winden, van Wârlds Jend tö dit Bütterst van di Hemmel.
28Lir en Gliknis van di Figenboom. Wan di Saft ön di Twiggen träängt, en di Twiggen ütsprit, en Bleden fo: da weet I, dat di Sommer nai es.
29Alliksa, wan I sé, dat sok Teken geske, da weet I, dat et nai voar Dür es.
30Wårelk, ik si ju: Dit Geslegt wel ek forgung, tö dat dit Alles ske.
31Hemmel en Öörd wel forgung; mar min Uurd skel ek forgung.
32Mar /van/ di Dai en Stünd weet-er Nemmen wat, nog weder di Engeler ön Hemmel, of di Seen; mar di Våder alining.
33Se tö, wåke en bödige; for I weet ek, wan-t Tid es.
34Alliküs en Mensk, diär ön Bütlönd reiset, en forlet sin Hüs, en jåw sin Knegter Magt, en ark sin Werk, en gebod di Dürwagter, dat hi wåke skuld.
35Sa wåke nü (for I weet ek, wan di Hüsherr komt, of hi ön Indjnem komt, of om Mednagt, of om di Hoankräden, of ön di Miärensstünd):
36Om dat hi ek ünforsens hastig komt, en ju ön Slip fent.
37Mar wat ik ju si, dit si ik ju al: Wåke!
Currently Selected:
Markus 13: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
