1 Thessaloniker 2
2
Dit 2. Kapitel.
1For I wet sallew, lew Brödhern! van üs Ingang bi ju, dat di ek foriws wessen hed.
2Mar alhurwel wü tövoaren ledden ha, en forsmoait uden sen ön Filippi, (üs I wēt) wiär wü dag likwel blid ön üs Gott, om me gurt Gefår Gottes Evangilje bi ju tö forkindjigen.
3For üs Formåning hēd ek tö Forleiting wessen, ek me Ünrinheid, ek me Bedrog.
4Mar üs wü van Gott prowet uden sen, dat üs dit Evangilje önbetrut uden es, om dit tö prötjin, sa sprek wü, ek alliküs dat wü di Mensken håge wild, mar Gott, diär üs Hart prowet.
5For wü hå older omgingen me Falskheid, üs I wēt, nog me Gits tragtet. Gott es Tjüg!
6Wü ha uk ek Iär sågt bi di Lid, nogweder bi ju, of bi üdern.
7Wü hed üs Kristus Aposteler ju uk lastig ud küd; mar wü ha üs en Moder bi ju wessen, alliküs en Am hör Biärner pleget.
8Also hed wü Hartlest tö ju, en wiär wellig, ju ek alining dit Evangilje van Gott, mar uk üs Lewent hold metödilin, diärom, dat wü ju lew wonnen ha.
9I tänk, lew Brödhern! nog om üs Årbed en Meit; for Nagt en Dai årbed wü, dat wü Nemmen van ju lastig fål wild, en prötjet voar ju dit Evangilje.
10Diärtö sen I Tjugen, en Gott, hur hellig, en rogtfardig, en unskildjig wü wessen hå bi ju, diär glowig wiär.
11Alliküs i wēt, dat wü, üs en Våder sin Biärner, Arkjen van ju formånet en tröstet hå.
12En betjügt hå, dat I skel wördig wandele voar Gott, diär ju beröpen hed tö sin Rik, en tö sin Herrelkheid.
13Diärom danke wü uk langsen Gott, dat I, üs I di Forkindjiging van Gottes Urd fing, dit önnōm ek üs Mensken-Urd, mar, (alliküs dit wårelk es) üs Gottes Urd, wat uk wirket ön ju, diär glowig sen.
14For I sen Nåfölgers uden, lew Brödhern! van Gottes Geminte ön Judäa, ön Kristus Jesus, dat I alliksa ditsallew leden ha van ju Frindjer, alliküs ja van di Juden.
15Welk uk di Herr Jesus dit Lewent nommen ha, en jar ein Profeten, en hå üs forfölligt, en hage Gott ek, en sen alle Mensken töweder.
16Ja forhendere üs tö di Heiden tö sien, dat ja selig ud; omdat ja altid dit Måt van jar Send volmåke; for di Törn skel dag endlik aur jam kom.
17Mar wü, lew Brödhern! eter dat I üs en kurt Skür wånt ha van Ansegt, ek eter dit Hart, ha wü om sa vul moar hastet, ju Ansegt tö sen, me en gurt Forlangen.
18Diärom ha wü tö ju kom wild, (ik Paulus) jenlop, ja taumål, mar di Satan hēd üs forhendert.
19For hokken es üs Höp, of Frügged, of di Iären-Kron? Sen I dit uk ek voar üs Herr Jesus Kristus ön sin Tökomst.
20I sen ja üs Iär en üs Frügged.
Currently Selected:
1 Thessaloniker 2: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
