1 Korinther 15
15
Dit 15. Kapitel.
1Ik wel ju tö tänken help, lew Brödhem! om dit Evangilje, wat ik ju forkindjigt ha, wat I uk önnommen hå, horön I uk stun.
2Hurdör I uk selig ud, wan I ju diärbi sa hoald, üs ik ju dit forkindjigt ha, wan I üders di Glow ek foriws önnommen ha.
3For ik ha ju foar-t jest iwen, wat ik uk fingen hå, dat Kristus stürwen es foar üs Send, na di Skreft.
4En dat hi begrewen es, en dat hi weder apstönden es üp di träd Dai na di Skreft.
5En dat hi sen uden es van Kefas, diärüp van di twellew.
6Diärüp es hi sen uden van moar üs füf höndert Brödhem üp jenlop, van danen jit vulen lewwe, mar Sommen sen ofskäd.
7Diärna es hi van Jakobus sen, diärüp van alle Aposteler.
8Tolēst es hi uk van mi üs Jen, diär bütten di Tid, tökjemmen es, sen uden.
9For ik sen di ringst van di Aposteler, sa dat ik ek wert sen, en Apostel nämt tö uden, diärom dat ik Gotts Geminte forfölligt hå.
10Mar van Gottes Gnad sen ik, wat ik sen, en sin Gnad ön mi es ek foriws wessen; mar ik hå vul moar arbed, üs di Üdern al; dag ek ik, mar Gottes Gnad, diär ön mi es.
11Hat mai nü mi, of jam wis, sa prötje wü, en sa hå I liwt.
12Mar wan Kristus forkindjigt ud, dat hi van Doaden apstönden es; hur kjen da Sommen mung ju si, dat er nin Apstunen van Doaden es.
13Mar es dit Apstunen van Doaden nönt, da es Kristus uk ek apstönden.
14Mar es Kristus ek apstönden, da es üs Prötji foriws, da es uk ju Glow foriws.
15En da wåd wü uk befünden üs falsk Tjügen, aurdat wü tögen Gott tjügt hed, dat hi Kristus apwäkt hed, welk hi ek apwäkt hed, wil di Doaden ek apstun.
16For wan de Doaden ek apstun, da es Kristus uk ek apstönden.
17Mar es Kristus ek âpstönden, da es ju Glow foriws; da sen ju jit ön ju Send.
18Da sen uk danen forlesen, diär ön Kristus ofskäd sen.
19Höpe wü alining ön dit Lewent üp Kristus, da sen wü di elendigsten van alle Mensken.
20Mar nü es Kristus apstönden van Doaden, en di Jestfrügt uden van danen, diär inslöppen sen.
21For wil dör jen Mensk di Doad, en dör jen Mensk dit Apstunen van Doaden komt.
22For alliküs ja ön Adam al sterrew, sa wel ja uk ön Kristus al lewendig måket ud.
23Mar ark ön sin Ordning. Di Jestfrügt Kristus; diärna danen, diär Kristus töhir ön sin Tökomst.
24Diärüp komt di Jend, wan hi dit Rik Gott en di Vader auriwen hed, wan hi al Herskep, en Obrigheid, en Gewalt tö non måket hēd.
25Mar hi mut üs Könning herske, tödat hi al sin Finder önder sin Fet leid hēd.
26Di lēst Find, diär betwüngen ud, es di Doad.
27For hi hēd höm alle Dinge onder sin Fet leid. Dag wan hi said, dat höm alle Dinge önderdån sen, da est ipenbår, dat di diär ek me töhjert, welk höm alle Dinge önderdånig måket hēd.
28Mar wan höm alle Dinge önderdånig sen, da skel uk di Seen sallew di önderdånig wis, diär höm alle Dinge önderdånig måket hēd, omdat Gott es Alles ön Allen.
29Wat mund üders dânen måke, welk sik dope let foar di Doaden, wan abslut di Doaden ek apstun? Hurom let ja jam (sik) döpe foar di Doaden?
30En hurom stun wü alle Dagen ön Gefår?
31Ik se di Doad dågligs voar min Ogen, dit betjüg ik bi üs Iär, welk ik hå ön üs Herr Jesus Kristus.
32Wan ik üp Mensken-Wis ön Efesus me di wild Besten fogten hå, wat helpt mi dit, wan di Doaden ek apstun? Let üs it en drink, for miären sen wü doad.
33Let ju ek forför. Arig Slader fordârewt di gud Skek.
34Ud dag jenlop rogt wäken, en forsendigt ju ek. For Sommen wet nönt van Gott. Dit si ik tö ju Beskåming.
35Wan er hokken si måt: Hurdelling skel di Doaden apstun? En me watfoar en Likhäm skel ja kom?
36Dü Nar, wat du säst, ud ek lewendig, want ek sterrewt.
37En wat dü säst, es ek di Likhäm, diär ud skel, mar en bloat Kurn, al üs-t voarfalt, nämelk Weten, of jen van di Üdern.
38Mar Gott jewt höm en Likham, alliküs hi wel, en ark van sin Sit sin ein Likham.
39Al di Flesk es ek ditsallew Flēsk; mar en Üder Flesk ha di Mensken, en Üder di Kreiter, en Üder di Fesk, en Üder di Vüggeler.
40En diär sen hemmelske Likhämen, en ördig Likhämen, mar en Üder Herrelkheid ha di hemmelsken, en Üder di ördigen.
41En Üder Klårheid hēd di Sen, en Üder Klårheid hed di Mun, en Üder Klårheid hå di Stjären, for di jen Stjärs Klårheid es forskellig van di Üder sin.
42Alliksa dit Apstunen van Doaden. Di Likhäm ud ütsän ön Forwesing, en skel ünforweselk apstun.
43Hat ud ütsän ön Üniär, en hat skel apstun ön Herrelkheid. Hat ud ütsän ön Swakheid, en skel apstun ön Kraft.
44Diär ud en natürelk Likhäm ütsän, en diär skel en geistelk Likhäm apstun. Hed em en natürelk Likhäm, da hed em uk en geistelk Likhäm.
45Alliküs er skrewwen stånt: Di jest Mensk Adam wåd en lewendig Sil, en di lest Adam wåd en Geist, diär lewendig måket.
46Dag es di geistelk Likhäm ek di jest, mar di natürelk, diärnå di geistelk.
47Di jest Mensk es van di Örd, ördisk; di Üder es van Hemmel.
48Sadelling üs di ördisk es, alliksa sen uk di ördisken; en sadelling üs di hemmelsk es, sa sen uk di hemmelsken.
49En alliküs wü dit Bild van di Ordisk drain hå, sa skel wü uk dit Bild van dit Hemmelsk drai.
50Mar ik si diärvan, lew Brödhem! dat Flesk en Blöd Gottes Könningrik ek arwe kjen, en dit Forweselk arewt ek dit Ünforweselk.
51Betänk! Ik si ju en Hjemmelkheid: Wü skel ek al inslip, mar wü skel al forwandelt ud.
52En dit wel skor on jen Ogenblek kom, me di lēst Basun. For da skel di Basun skal, en di Doaden skel apstun ünforweselk, en wü skel forwandelt ud.
53For döt Forweselk mut dit Ünforweselk önti, en dit Sterwelik mut Ünsterwelikheid önti.
54Mar wan dit Forweselk dit Ünforweselk önteid, en dit Sterwelik di Ünsterwelikheid önteid, da komt dit Urd tö folling, wat er skrewwen stånt:
55Di Doad es apslöken ön di Sīg. Doad, hur es din Prot? Hel! hur es din Aurwenning?
56Mar di Prot tö di Doad es di Send, en di Kraft van di Send es di Wet.
57Mar Gott se Dank, diär üs di Sīg iwen hed dör üs Herr Jesus Kristus.
58Diärom, min lew Brödhem! wis standhaftig, ünbewegelk, en nem stidigs tö ön di Herr sin Werk, for üs I wel wet, da es ju Arbed ek foriws ön di Herr.
Currently Selected:
1 Korinther 15: NFNT
Highlight
Copy
Compare
Share
Want to have your highlights saved across all your devices? Sign up or sign in
Translated by Peter Michael Clemens (1804-1870)
