2 Kolɛntikalu 9
9
Mumininnu madɛmɛnko
1Ka bɛn mumininnu madɛmɛnko ma, kun t'a la k'a fɔ ko ǹ'i wo ko sɛvɛ ài ma. 2Kamasɔlɔn ǹ k'a lɔn wo miliya ɲuma le ài la, ado ǹ'ài matɔɔla Masaduwanikalu ɲakɔlɔ ka bɛn wo ma. Ǹ n'a fɔla ai yɛ, ǹ ko, ka ta salon ma, àilu Akayikalu vɛ ài lɔbɛn madɛmɛliko wo lɔ. Ài sɔnjanin ko wo le teme, wo vɛ mɔɔ siyama lɔsun madɛmɛliko lɔ. 3Wo bɛ n'a kɛ, ǹ'i mɔ badenma minu lataala ài ma fɔsa maa matɔɔli ka bɛn ài ma kana kɛ kofuun ne, ani ài lɔbɛnnin yi kɛ madɛmɛliko lɔ iwo ǹ n'a fɔla teme. 4Niwotɛ, ni mɔɔ dɔlu ka na ǹ fɛ ka bɔ Masaduwani k'a ye ko ài lɔbɛnnin tɛ, m'i maloyale, kumatɛ àilu ma, kamasɔlɔn mɔ layine ài la kosɛvɛ. 5Wo le y'a ma, ǹ k'a ye ko a fisayayine ǹ'a fɔ mɔ badenma minu yɛ k'a magbeleya ko ai yi taa ǹ ɲa ài fɛlɔ, fɔsa ài yi bololadɛnko ɲabɔ min lahedi tanin ài bolo. Wo vɛ kɛla, ǹ kɛtɔ niilifen wo lɔbɛnnin talanna, ài na min dila lafɛlɛ boloma, min ma kɛ diyanigbeyako le.
M'i niilifen di sawa boloma
6Ài k'a lɔn ne ko ni mɔɔ min ka malosi dɔni falin, wo tii fana kɛtɔ malo dɔni ne kalila. Kɛɛ do, ni mɔɔ min ka malosi siyama falin, wo tii kɛtɔ malo siyama ne kalila. 7Wo le y'a ma, ài kelenkelenna bɛ yi niilifen di iwo ài n'a latɛɛla teme ài josokun nɔ. A do kà kɛ ɲakɔlɔsili boloma, niwotɛ diyanigbeyako. Kamasɔlɔn mɔɔ min yi niilifen dila sawa boloma, wo tii le diyanin Ala yɛ. 8A see yi Ala yɛ ka nɛɛma suu bɛ dɔ kɛ ài yɛ bɛlɛbɛlɛ kɛ, fɔsa waate bɛ ani ko bɛ lɔ, ài mako la yi ɲia, ani a dɔ yi to lala àiya seetiiya kɔkan koɲuma suu bɛ kɛko lɔ. 9A do sɛvɛnin tan ne kitabu kɔnɔ, ko:
«A v'a bolo fɔlin ka bolokolonnu sɔ,
aa telenmandeya totɔle a ma habadan.»
10Wo lɔ saa, Ala min yi sɛnɛfensi dila sɛnɛkɛba ma, ka bulu di a ma a balo le, ale le kɛtɔ àiya sɛnɛfensi lawalala, k'ài kɛkolu lasawati minu bɔnin àiya telenmandeya lɔ. 11A do kɛtɔ ài labanayala boloɲa bɛ ma, fɔsa ài bolo yi fɔlin waate bɛ. Ado mɔɔ siyama kɛtɔ balika bɔla Ala yɛ ka bɛn àiya niilifennu ma, m'i minu lasena ai ma. 12Kamasɔlɔn ài yi baale min kɛla niilifen wolu le, wo tɛnala danna mumininnu mako laɲiako la dein, mafɔ a kɛtɔ sabu le le mɔɔ siyama kɛtɔ balika bɔla Ala yɛ kosɛvɛ. 13Àiya baale wo sabu la, mɔɔlu kɛtɔ magbiliyali dila Ala ma, ka bɛn àiya kannabato ma, min yi Masa Tɔɔmasenin ya Samakan Kein labɔla gbɛ la. Ai kɛtɔ magbiliyali dila kɔtunun ka bɛn àiya niilifen wolu ma, ai yi minu lɔtalala i ɲɔɔ wotɛ, ailu ni dɔlu bɛ. 14Ai do kɛtɔ Ala dalila ài yɛ k'ài kanu bubale ka bɛn Ala ya nɛɛma makawanin wo ma min kɛnin ài yɛ. 15Tanuli yi Ala yɛ aa niilifen ya ko lɔ, min ɲɔɔzii tɛ.
Currently Selected:
2 Kolɛntikalu 9: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
