2 Kolɛntikalu 5

Maa habadan bonnu

1Mɔ falikolo min yi mɔ kan dunuɲa, wo kɛyine iwo faani tooda. Mɔ k'a lɔn ne ko ni wo ka tiɲa lon min na, habadan bon yi mɔ bolo haijɛnɛ, mɔɔ bolo ma min lɔ, mafɔ Ala gbugbu. 2Kɛɛ damanda m'i faani tooda min kɔlɔ dunuɲa, m'i wunɛ le la, kamasɔlɔn a lɔɔ yi mɔ la k'a fɔ m'i maa haijɛnɛ bon sɔlɔn. 3Ni mɔ ka wo sɔlɔn, mɔ fali makolon tɛnala tola. 4Kamasɔlɔn damanda m'i dunuɲa faani tooda min kɔlɔ, m'i wunɛla doni ba le kɔlɔ. A tɛ k'a fɔ saya lɔɔ le yi mɔ la, kɛɛ m'i haijɛnɛ fali kula sɔlɔnko le lɔ, fɔsa niimaya yi see sɔlɔn fen sata ma. 5Min na mɔ lɔbɛnna dailu min kanma, wo le Ala gbugbu le, ale min na Nii Sɛnɛyanin dila mɔ ma iwo tɔima ka bɛn koɲuma natɔlu ma.

6Wo le n'a kɛla, lanaya yi mɔ josokun nɔ waate bɛ. Mɔ k'a lɔn ne ko damanda mɔ falikolo yi mɔ kan dunuɲa, mɔ majaanyine mɔ Tii la. 7M'i taamana limaniya le boloma, ɲala yeni tɛ. 8Tuɲa le, lanaya yi mɔ josokun nɔ. A do tɛɛ diyale mɔ yɛ ka bɔ falikolo min nɔ ka taa to mɔ Tii fɛlɔ. 9Wo le y'a ma, ni mɔ ka to falikolo min nɔ o, ni mɔ ka taa mɔ Tii fɛlɔ o, m'i mɔ lɔjala maa ko yi diya mɔ Tii yɛ. 10#Lɔmukalu 14.10.Kamasɔlɔn, fɔ mɔ kelenkelenna bɛ yi mɔ kun labɔ Masa Tɔɔmasenin ɲakɔlɔ kititɛɛya lɔ, fɔsa mɔ na ko ko si kɛla dunuɲa mɔ falikolo lɔ, koɲuma o, koyon o, m'i wo sala sɔlɔn.

Masa Tɔɔmasenin ya wotɛbɛn baale

11Komi m'i mɔ Tii ɲasiyanɲɛko kalama, wo lɔ, m'i mɔ lɔjala ka mɔɔlu lakunfa. Kɛɛ Ala gbu ka mɔ kɛɲa lɔn, ado ǹ layine a la ko àilu fana ka mɔ kɛɲa lɔn ài josokun nɔ. 12A tɛ k'a fɔ ko m'i mɔ lɔjala ka mɔ jɛlɛ matɔɔ ài ɲana kɔtunun, kɛɛ m'i dailu le dila ài ma fɔsa ài ɲalɔ yi kɛnɛya maa ko lɔ. Wo vɛ kɛla, ài yi sene mɔɔlu javila minu tɛ mɔɔ josokɔnɔko jatela, mafɔ k'ai fannɔbuɲa fen yentalu ya ko lɔ. 13Ni mɔ ka kɛ hangilindan ne, wo kɛnin Ala le yɛ. Kɛɛ ni hangili ɲuma ka kɛ mɔ la, wo kɛnin àilu le yɛ. 14Kamasɔlɔn Masa Tɔɔmasenin ya kanundeya le yi mɔ lamalala. Mɔ do v'a ɲaye ko kɛ́ kelen ne sanin bɛ ya ko lɔ. Wo ma, bɛ fɛ y'aa saya la. 15A do sanin bɛ le ya ko lɔ, fɔsa mɔɔ minu y'ai nii la, wolu kana ai jɛlɛkanu siya lataama butu, mafɔ Masa Tɔɔmasenin ya siya, ale min sanin aiya ko lɔ k'a wuli kɔtunun.

16Wo ma yi ne, mɔ tɛ mɔɔ mɔɔ si jatela butu mɔɔnivinya boloma. Hali mɔ tɛɛ Masa Tɔɔmasenin jatela boloɲa wo le ma kɔlɔman ne, kɛɛ tandainɔ, mɔ tɛ a jatela ten butu. 17Ni mɔɔ min ka kɛ Masa Tɔɔmasenin ya kafonɲɔɔya lɔ, wo tii vɛ kɛ dannifen kula le. Ko kɔlɔlu vɛ tunun, ado ko kulalu le yi je butu. 18Wo bɛ bɔnin Ala le lɔ. A na mɔ ni ale gbu wotɛbɛnna Masa Tɔɔmasenin ne sabu la, ka wotɛbɛn baale kalifa mɔ la. 19Kamasɔlɔn Ala tɛɛ baalela Masa Tɔɔmasenin nɔ ka ale ni dunuɲamɔɔlu wotɛbɛn. A ma aiya julumbulu jate wo kɔ. A do ka wotɛbɛn samakan wo kalifa mɔ la.

20Ǹu le taanin kɛla Masa Tɔɔmasenin ɲa le, ka kɛ iwo Ala yi ǹu le labaalela mɔɔlu kiliko lɔ. M'ài madiyala Masa Tɔɔmasenin tɔɔ lɔ, mɔ vɛɛ: «Àilu ni Ala wotɛ yi bɛn!» 21Masa Tɔɔmasenin ma julumbu foi ta, kɛɛ Ala na maa julumbu doni lala ale le kun, fɔsa m'i kɛ telenmande le Ala ɲakɔlɔ aa kafonɲɔɔya lɔ.

Currently Selected:

2 Kolɛntikalu 5: MBT2023

Highlight

Copy