1 Kolɛntikalu 11

1 # 1 Kolɛntikalu 4.16; Filipikalu 3.17. Ài yi suma m̀ ma iwo ǹ'i ǹ sumala Masa Tɔɔmasenin ma teme.

Kun masiliko limaniyajama tɛma

2Ǹ'ài matɔɔla, kamasɔlɔn ài y'ài hangili tola ǹ nɔ ko bɛ lɔ ka laana wolu latelen, ǹ n'ài kalanna minu la. 3Kɛɛ ǹ'a fɛ ài y'a lɔn ko kɛ́ bɛ kuntii le Masa Tɔɔmasenin ne, moso fana kuntii le a kɛ́ le, ado Masa Tɔɔmasenin kuntii le Ala le. 4Ni kɛ́ suu suu vɛ kɛla Ala dalila niwotɛ kelaya kɛla, k'a talan a kun masilinin, wo tii vɛ aa Kuntii dɔɔya. 5Ni do moso suu suu vɛ kɛla Ala dalila niwotɛ kelaya kɛla, k'a talan a kun masilinin tɛ, wo tii vɛ aa kuntii dɔɔya, k'a kɛ iwo a kun linin vɛ. 6Ni moso min t'a kun masilila, wo vɛ kɛla, fɔ a a kunsi tɛɛ a ma. Kɛɛ komi kunsitɛɛko ni kunliko yi maloya le le moso ma, wo lɔ, fɔ a a kun masili. 7Kɛ́ man kan k'a kun masili, kamasɔlɔn a ladannin Ala sawula le lɔ Ala ya magbiliyali jiyako lɔ. Moso do yi kɛ́ ya magbiliyali le jiyala. 8Kamasɔlɔn kɛ́ bɔnin tɛ moso lɔ, moso le bɔnin kɛ́ lɔ. 9Ado kɛ́ la ma dan moso ya ko lɔ, moso le ladannin kɛ́ ya ko lɔ. 10Wo le n'a kɛla, moso ka kan k'a kun masili ka wo kɛ tɔɔmase le k'a jiya ko a yi dɔ le ya seetiiya kɔlɔ, ka bɛn mɛlɛkalu ya ko ma. 11Wo bɛ n'a kɛ, mɔ Tii ya kafonɲɔɔya lɔ, moso tɛ se kɛla ni kɛ́ tɛ, kɛ́ fana tɛ se kɛla ni moso tɛ. 12Kamasɔlɔn moso ladannin ka bɔ kɛ́ lɔ teme, kɛ́ sɔlɔnnin ka bɔ moso lɔ ten ne. Ado fen bɛ bɔnin Ala le lɔ.

13Àilu gbu yi wo lakɔlɔsi, ni a bɛnyine k'a fɔ ko moso yi Ala dali k'a talan a kun masilinin tɛ. 14Hali dunuɲakolu kɛɲa gbu, wo y'ài lalɔnnila ko ni kɛ́ kunsi ka jaanya, wo y'a lamaloyako le le, 15kɛɛ ni moso kunsi ka jaanya, wo y'a ɲalɔkɛnɛyako le le, kɛlɛ? Kamasɔlɔn kunsi jaan dinin a ma a kun masiliko le lɔ. 16Ni mɔɔ dɔ y'a fɛ ka sɔsɔyali kɛ ka bɛn ko wo ma, laana gbɛlɛ tɛ mɔ bolo, kumatɛ Ala ya limaniyajamalu ma.

Mɔ Tii ya dɔnni laban

Matiyu 26.26-29; Malɛkɛ 14.22-25; Luka 22.14-20

17Ǹ'i jamali minu di boloma yi ne, ǹ tɛnala sena ài matɔɔla wo ma. Kamasɔlɔn ài vɛ ài ladɛnna, wo tɛ kɛla ka bɛn koɲuma ma, mafɔ koyon. 18A kunfɔlɔ lɔ, ǹ n'a mɛnna ko ài vɛ ài ladɛnna kotan ka kɛ limaniyajama le, falanɲɔɔya yi donna ài tɛma. Ǹ layine wo la dɔni ne. 19Tuɲa le, fɔ lɔtalali yi don ài wotɛ, fɔsa mɔɔ sɔvɛlu yi se lɔnna ài tɛma. 20Ài vɛ kɛla ài ladɛnna kotan fɔsa ài hangili yi to mɔ Tii ya dɔnni laban nɔ, ài tɛ dɔnni wo kɛla a kɛɲa bɛlɛ ma. 21Kamasɔlɔn ài vɛ kɛla dɔnni kɛla waate min nɔ, ài kelenkelenna bɛ y'ài latelejala k'a ta nii kunan dɔn. Wo le y'a kɛla, a dɔlu kɔɔntɔ yi tola k'a talan gbɛ v'a dɔlu mina. 22A yi di vɛ? Bon tɛ ài bolo, ài yi dɔnni kɛ k'i min tɛɛminja? Jalasa ài y'a fɛ ka Ala ya limaniyajama lafeya ka bolokolonnu lamaloya? Ǹ'i mindɛ fɔ ài yɛ wo lɔ? Ǹ'ài matɔɔ wo lɔ? Ǹ tɛ wo kɛ feu!

23Kamasɔlɔn ǹ na kalan min sɔlɔnna mɔ Tii la, ǹ'i wo le lasena ài ma: Ai ka mɔ Tii Isa janva su min nɔ, a ka bulu ta 24ka balika bɔ Ala yɛ, ka bulu lɔkalikali. A do vɛɛ: «Ǹ falikolo le min ne, min dinin àiya ko lɔ. Ài yi min kɛ k'ài hangili to ǹ nɔ.» 25Wo boloɲa kelen ma, dɔnni bannin, Isa ka jiyafɛ fana ta, lɛzɛnji tɛɛ min nɔ. A vɛɛ: «Jiyafɛ min yi salatikan kula tɔɔmase le le ǹ jeli bɔnko fɛ. Ài vɛ kɛla wo minna waate o waate, ài yi wo kɛ k'ài hangili to ǹ nɔ.» 26Kamasɔlɔn ni ài ka bulu min dɔn, k'ài min jiyafɛ min nɔ waate o waate, ài yi mɔ Tii ya sayako le lasena, haan fɔɔ a v'i kɔseila lon min na.

27Wo le y'a ma, ni mɔɔ min ka mɔ Tii ya bulu dɔn, niwotɛ k'i min aa jiyafɛ lɔ boloɲa kɛwon ma, wo tii vɛ kiti bila a jɛlɛ la ka bɛn mɔ Tii falikolo ni a jeli ma. 28Wo lɔ saa, mɔɔ kelenkelenna bɛ ka kan k'a jɛlɛ lakɔlɔsi kunfɔlɔ le, jani a yi bulu wo dɔn, ani k'i min jiyafɛ wo lɔ. 29Kamasɔlɔn mɔɔ min vɛ dɔnni kɛla ani k'i min boloɲa wo ma, k'a talan a ma mɔ Tii falikolo jate, wo tii yi kiti le bilala a jɛlɛ la. 30Wo le n'a kɛla, fangandannu ni jangalotɔlu vɛ wala ài tɛma, ani ài dɔlu fana vɛ sa. 31Ni mɔ do ka mɔ jɛlɛ lakɔlɔsi kunfɔlɔ le, mɔ ma yi tangale kiti suu wo ma. 32Ni do mɔ k'a ye ko mɔ Tii vɛ kiti bila mɔ la, a yi mɔ makolo le la, fɔsa mɔ la kana tɔn dunuɲamɔɔlu fɛ.

33Wo lɔ saa, m̀ badenmalu, ni ài k'ài ladɛn fɔsa ài hangili yi to mɔ Tii ya dɔnni laban nɔ, ài ɲɔɔ makɔnɔ. 34Ni kɔɔn ka kɛ mɔɔ min na, fɔ wo tii yi dɔnni kɛ aa bon na kunfɔlɔ le, fɔsa àiya ladɛn kana kɛ sabu le, ài yi kiti bila ài jɛlɛ la. M̀'ɛ nala ài fɛlɔ waate min nɔ, ǹ kɛtɔ ko tɔlu ɲabɔla.

Currently Selected:

1 Kolɛntikalu 11: MBT2023

Highlight

Copy