1 Kolɛntikalu 10

Lailikan ka bɛn joo batoko ma

1M̀ badenmalu, ǹ'a fɛ k'ài hangili bila ko dɔ lɔ, min na kɛla mɔ bemanu la minu tɛɛ Nabi Musa kɔ. Ala ka sanbiliya lajɛlɛ ai kunma ka siya jiya ai la, ani ai bɛ ka kɔɔji tɛɛ duu jalan kɔkan. 2Ai bɛ ka makoli sɔlɔn sanbiliya ni kɔɔji lɔ ka don Nabi Musa ya kafonɲɔɔya lɔ. 3Ai bɛ ka balo suu kelen ne dɔn min dinin tɛɛ ai ma Ala bolo. 4Ai bɛ ka ji kelen min, Ala ka min labɔ falakolo lɔ. Ado Masa Tɔɔmasenin taanin kɛla falakolo wo le le, min tɛɛ ai salanna. 5Kɛɛ ai fanba ya ko ma diya Ala yɛ. Wo lɔ, ai siyama ka faa k'ai sulu jɛzɛn fuwa lɔ.

6Ko wolu ka kɛ misali le le mɔ yɛ, fɔsa koyonkɛ lɔɔ kana mɔ mina, iwo a ka wolu mina teme. 7Ài kà kɛ joosɔba le iwo ai dɔlu k'a kɛ teme. A sɛvɛnin kitabu kɔnɔ tan ne, ko: «Jama k'i sii dɔnnikɛko lɔ, ani k'i min ka ban k'i wuli ka dannatimin tolon kɛ.» 8Mɔ kà kanukɛ iwo ai dɔlu k'a kɛ teme. Wo le do ka kɛ sabu le, mɔɔ waa muan ni sawa (23 000) ka faa jama tɛma tele kelen kɔlɔ. 9Mɔ kà Masa Tɔɔmasenin lɔsuma iwo ai dɔlu k'a kɛ teme, salu do k'ai kin k'ai faa. 10Ài kà kunnɔkuma fɔ iwo ai dɔlu k'a kɛ teme, niitamɛlɛka do k'ai halaki.

11Ko minu na kɛla ai la, wolu kɛnin misali le le k'ai sɛvɛ mɔ laliko lɔ, ǹu minu yi waate laban min nɔ. 12Wo lɔ, ni a yi mɔɔ min kɔnɔ ko a lɔyine kili, wo tii y'alama, a kan'i ben. 13Lɔsumani suu suu ma ài lasɔlɔn ba bene, mafɔ min suu deinin adamadennu lasɔlɔnna. Ala do yi lanande le le. A tɛnala diɲala ài lɔ yi suma ka gban ài senko kan. Kɛɛ ni ài lɔ ka suma, Ala kɛtɔ ài bɔɲa jiyala ài la fɔsa ài yi se lɔsumani wo minala ài ma teme.

14Wo le y'a ma, ǹ diyananmɔɔlu, ài y'ài mataa joosɔko la feu. 15Ǹ'i kumala ài yɛ iwo mɔɔ hangilimalu, àilu gbu yi ǹ kumakan lakɔlɔsi. 16#Matiyu 26.26-28; Malɛkɛ 14.22-24; Luka 22.19, 20.M'i balika bɔla Ala yɛ duwawu jiyafɛ min ya ko lɔ, mɔ vɛ kɛla mɔ minna wo lɔ, jalasa wo tɛ mɔ dɛnko le le Masa Tɔɔmasenin jeli la? M'i bulu min lɔkalikalila, mɔ vɛ kɛla wo dɔnna, jalasa wo tɛ mɔ dɛnko le le Masa Tɔɔmasenin falikolo la? 17Komi bulukala kelen ne, hali ni mɔ walanin ka kɛ, falikolo kelen ne mɔ le butu, kamasɔlɔn mɔ bɛ dɛnnin bulukala kelen wo le la.

18Ài y'ài mili Bani Isilankalu ya ko ma: Mɔɔ minu yi salakasoo dɔnna, jalasa wolu dɛnnin tɛ salakagbalan wo le la? 19Ǹ'i min fɔla yi ne, jalasa wo kɔlɔ le ko joosɔsoo ni joo wolu yi fen kaalama le le? 20Wo tɛ dɛ! Ǹa kuma kɔlɔ le ko mɔɔ minu yi joolu sɔla, aiya sɔlifen wolu yi dila jinalu le ma, Ala tɛ. Ǹe do, ǹ t'a fɛ àilu ni jinalu yi dɛn ko ko si la. 21A tɛ se bɛnna k'a fɔ ko ài y'ài min mɔ Tii ya jiyafɛ lɔ, ka ban k'ài min jinalu ya jiyafɛ fana lɔ, niwotɛ ka dɔnni kɛ mɔ Tii ya tabali la, ka ban ka dɔnni kɛ jinalu ya tabali fana la. 22Jalasa m'a fɛ le ka mɔ Tii ya keleya lawuli? Mɔ fanga walayine ka timin a ta la?

23 # 1 Kolɛntikalu 6.12. Ài y'a fɔla, ài vɛɛ: «Ko bɛ ladaanyine mɔ ma.» Tuɲa le, kɛɛ nafa tɛ ko bɛ la. «Ko bɛ ladaanyine mɔ ma,» kɛɛ do, ko bɛ tɛ mɔ sɛmɛdonna limaniya lɔ. 24Mɔɔ suu suu kà nafa ɲinin a jɛlɛ yɛ dein, mafɔ a mɔɔɲɔɔ fana.

25Soo min bɛ yi felela lɔɔ lɔ, ài yi wo bɛ dɔn. Ài do kà ɲiningali kɛ, sika kana don ài josokun nɔ. 26A sɛvɛnin tan ne kitabu kɔnɔ, ko: «Duukolo ni a kɔnɔlɔfen bɛ yi mɔ Tii ta le le.»

27Ni Alalɔnbali dɔ k'ài kili dɔnnikɛya lɔ, ài do y'a fɛ ka taa, a vɛ dɔnnifen suu suu siila ài kɛɛna, ài yi wo dɔn. Ài kà ɲiningali kɛ, sika kana don ài josokun nɔ. 28Kɛɛ ni mɔɔ dɔ k'a fɔ ài yɛ ko joosɔsoo le, wo vɛ kɛla, ài kà a dɔn ka bɛn wo tii ya ko ma, min na wo ko fɔla ài yɛ. Niwotɛ, ài yi sika donne wo tii josokun nɔ. 29Ǹ kan tɛ àilu gbu josokun ma, mafɔ ale min na kuma wo fɔla ài yɛ. Mindɛ lɔ mɔɔ gbɛlɛ kɛtɔ ǹ lafɛlɛko kiti tɛɛla a ta miliya le? 30Ni ǹ ka balika bɔ Ala yɛ dɔnnifenko lɔ, mindɛ lɔ mɔɔ dɔ kɛtɔ m̀ mafɔla ka bɛn wo ma, ǹ na balika bɔla fen min ya ko lɔ?

31Wo le y'a ma, ài vɛ kɛla fen fen dɔnna, niwotɛ k'i min, ni ài do ka kɛ ko ko si kɛla, fɔ ài y'a bɛ kɛ Ala magbiliyako le lɔ. 32Ài do ka kɛ mɔɔ suu suu kunnɔtɛɛko sabu le, ni a ka kɛ Jahudiyalu le o, niwotɛ siboloma gbɛlɛ mɔɔlu o, niwotɛ Ala ya limaniyajama, 33iwo ǹ'i ǹ lɔjala teme ka mɔɔ bɛ diyananko kɛ ǹa ko bɛ lɔ. Ǹ tɛ nafa ɲininna ǹ jɛlɛ yɛ, mafɔ dɔlu yɛ, fɔsa ai siyama yi kisi.

Currently Selected:

1 Kolɛntikalu 10: MBT2023

Highlight

Copy