Loma 7
7
He Fakatakitakiga e Uiga ki te Tūlāfono ma te Fakaipoipoga
1Te kau uho, e mālamalama lele koutou i te mea kā lea atu ai au, auā kua iloa e koutou uma te tūlāfono. Ko te tūlāfono e pule oioti ki tagata i te taimi ka koi ola ai kilātou. 2Mo he fakatakitakiga: Ko he fafine kua fakaipoipo, e fuhia i te tūlāfono ki tana tāne; kae e oti loa tana tāne, oi kua haoloto ai loa ia mai te tūlāfono e fuhia ai ia ki tana tāne. 3Kāfai la te fafine e nonofo ma hētahi tamāloa ka koi ola tana tāne, ka takua ia ko he fafine mulilua. Kae kāfai kua oti tana tāne, kua haoloto la ia i te tūlāfono, ma ka hē mulilua ia kāfai e toe fakaipoipo ki hētahi tamāloa. 4Ko koutou foki la e tatau ke vēnei, oku uho. E tuha ai ma te Tūlāfono, ko koutou kua oti, auā ko koutou ko he itūtino o te tino o Keliho; ma i te taimi nei, ko koutou e a Iehu, tē na toe fakatū mai i te oti, kae ke fua mai ai ni fua ia te kitātou mo te Atua. 5Auā i te taimi nae ola ai kitātou e tuha ai ma to tātou nātula faka-te-tagata, ko nā tuinanauga mātagā na fakaohofia e te Tūlāfono, nae galue i loto o kitātou ke maua ai ni fua mo te oti.#7.5 ke maua ai ni fua mo te oti pe ke iku uma ai kitātou ki te oti 6Kae i te taimi nei, ko kitātou kua haoloto mai te Tūlāfono a Mohe, ona ko kitātou na oti ma kua hē toe haihaitia i te Tūlāfono. Ko te mea ia, ko kitātou ni pologa, e hē i lalo o te tūlāfono tuai e vē ona tuhituhia, kae e ala i te faiga fōu e fakaali mai e te Agaga o te Atua.
Ko te Tūlāfono e Iloa ai e Kitātou te Agahala
7Ka vēhea ake nei la kitātou? Ka lea nei kitātou ko te Tūlāfono e kino? Hēai! Ka na hē kō iloa te Tūlāfono e vēnei ake e hēki kō iloa foki te agahala. Kana hē lea mai te Tūlāfono, “Nahe kē mānumanu ki nā mea a hētahi tino,” e vēnei ake e hēki kō iloa he lagona vēnei.#Eho 20.17; Teu 5.21 8Kae ona ko te fakatonuga tēnā a te Atua, na maua ai te avanoa o te agahala ke fakatupu ai nā itūkāiga lagona fakapito kehekehe ia te au. Ka na hēai he tūlāfono, e hēai foki he agahala. 9Nae iei foki te taimi nae ola ai au e aunoa ma te kō iloa o te tūlāfono; kae i te pa maiga o te fakatonuga a te Atua, na ola ai te agahala 10kae oti au. Ma ko te fakatonuga a te Atua na tatau ke maua ai te ola, kae mo au, na maua ai te oti. 11Na maua e te agahala te avanoa, ma e ala i te fakatonuga a te Atua, na ia fakahehēa ai au, ma maua ai au i te oti.#Ken 3.13
12Ko te mea ia, ko te Tūlāfono lava ia e paia, ma ko nā fakatonuga a te Atua e paia, ma hako, ma lelei. 13Ko tona uiga la ko toku oti na māfua i he mea e lelei? Hēai, e hē vēnā! Ko te agahala te na māfua ai; na fakaaogā e te agahala te mea e lelei ke maua ai au i te oti, kae ke iloa ai e tagata te nātula moni o te agahala. Ma e ala i te fakatonuga a te Atua, kua fakaalia ai te hēai o he gātaaga o te kino o te agahala.
Ko nā Fetēkeakiga i Loto ia te Kitātou
14E iloa e kitātou ko te Tūlāfono e mai te Atua; kae ko au kua nā ko he tagata, na fakatau ke fai ma pologa a te agahala. 15Ko au e hē mālamalama i aku mea e fai; auā e hē kō faia nā mea e fofou au ki ei, kae e fai e au nā mea e inoino au ki ei. #Kal 5.17 16Ona la ko nā mea e kō faia ko nā mea ia e hē fofou au ki ei, e fakaali mai i kinā e talia e au, ko te Tūlāfono e hako. 17Ko te mea ia, kua hē ko au te faia te mea tēnei, kae ko te agahala e nofo i loto ia te au. 18E iloa e au e hēai he mea lelei e nofo i loto ia te au—i toku nātula faka-te-tagata. Auā e ui lava ko te loto naunau ke fai te mea e lelei e ia te au, kae e hē kō mafaia oi fai. 19E hē kō faia te mea lelei e fofou au ki ei, kae e fai e au te mea kino e hē fofou au ke kō faia. 20Kāfai e fai e au te mea e hē fofou au ke fai, tona uiga kua hē toe ko au te fai e ia, kae ko te agahala e nofo i loto ia te au.
21Ma kua iloa e au ko te tūlāfono tēnei te māfua ai; kāfai au e fofou ke fai te mea e lelei, ko te kino lava te mea e iku ake e fai e au i taimi uma. 22Ko toku loto e fiafia lahi lele ki te tūlāfono a te Atua. 23Kae e kō kitea e kehe te tūlāfono e galue i loto ia te au—he tūlāfono e teteke ki te Tūlāfono tēia kua talia e au i toku māfaufau. Kua fai au e ia ma pāgotā a te tūlāfono e uiga ki te agahala, tēia e galue i loto o oku. 24Ko au la te fakanoanoa lahi. Ko ai nei te ka ia lāveakia au mai te nātula faka-te-tagata e iku ai au ki te oti? 25Tātou fakafetai ki te Atua, tē e ia faia te mea tēnei e ala ia Iehu Keliho!
Ko tēnei la te tūlaga e iei au: ko au e tautua ki te Tūlāfono a te Atua i toku māfaufau oioti, kae e tautua toku nātula faka-te-tagata ki te tūlāfono e iku ki te agahala.
Currently Selected:
Loma 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust