Alagākupu 3
3
Apoapoakiga ki te Kau Talavou
1Taku tama,#3.1 Epelu Toku ataliki ia koe nahe puli i aku akoakoga,
ma teu i tō loto aku fakatonuga;
2auā ka fakaloaloa ai nā aho o tō ola,
ma kē maua ai he olaga e fīlēmū,
e tamaokāiga ma e fiafia.
3Nahe tīakia lele te alofa ma te loto fakamāoni;
kahoa ai i tō ua ma fakamau ki tō loto.
4 #
Luk 2.52; Lom 12.16 Oi ka fiafia lele ai ma takuleleia koe,
i te kikila a te Atua ma tagata.
5Talitonu ki te Atua ma tō loto kātoa;
ma nahe kē fakalagolago ki tō lava iloa.
6Ke manatua te Aliki i au mea uma e fai,
oi ka ia faia ai te auala o koe ke hako.
7 #
Lom 2.16
Nahe kē manatu lele ko koe kua poto;
kae koe ke mataku i te Aliki,
ma ke liliu kehe mai te kino.
8Ka fai tēnā ma vailākau lelei
e kave kehe ai ia tīgā o tō tino.
9Fakatino tō āva ki te Aliki e ala i tō tamaokāiga,
ma i nā fua muamua e hili te lelei o tau fātoaga;
10oi ka fakatūtumu ai e ia ō fale teu haito,
ma au tane lalahi tuku uaina.
11 #
Iop 5.17; Epe 12.5-6 Taku tama, nahe kē teteke ki akoakiga a te Aliki,
pe fiu gōfie kāfai e ia fakahakoa koe,
12 #
Fkl 3.19
auā e fakahako e te Aliki kilātou e alofa ia ki ei,
e vē ko he tamana ki he ataliki, e fiafia ia ki ei.
13Amutia te tino e ia maua te poto,
ma te tino e ia te ia te mālamalama,
14auā e lahi atu nā koloa e maua mai ai i lo te hiliva,
ma e hili atu tona tau i lo te aulo.
15E hili atu te tāua i lo nā lupi,
ma hēai he mea e fofou koe ki ei,
e mafai ke fakatuhatuha ki ei.
16Ko te poto e maua ai he olaga e loa,
vēnā ma te tamaokāiga ma te mamalu.
17Ko ona ala ni ala o te ola fiafia,
ma ona auala uma ni auala o te fīlēmū.
18Ko te poto e vē he lākau e maua ai te ola
e kilātou e tāofi kia te ia,
ma te fiafia e kilātou e pipiki mau ki ei.
19Ko te poto o te Aliki na foafoa ai e ia te lalolagi;
ko tona mālamalama na fālite ai e ia te#3.19 Pe nā lagi;
20ko tona atamai na ia faia ai nā vaitafe ke tafe,
ma nā ao o te lagi ke fōkia nā ua ki te kelekele.
21Taku tama, tāofi mau ki te poto ma te fuafua loloto;
nahe teka lele nā mea iēnei ma koe,
22auā ka kilātou fakafōua tō agaga,
ma vē ni fatu tāua i he kahoa i tō ua.
23Oi ka havali ai koe ma te haogalēmū i tō auala,
ma ka hē tulave nā vae o koe i tō ala.
24Kāfai koe e nofo ki lalo, ka hē mataku lele koe;
kāfai koe e takoto ki lalo, ka lelei lele au moe.
25Ka hē popole koe ki ni fakalavelave fakafuaheki,
e vē ko nā afā e pagātia ai nā tino āmiokino;
26auā ko te Aliki te ka ia puipuia koe,
ma ka hē ia tukua ke lave tō vae i he māilei.
27Nahe tāofia ni mea mai nā tino e tatau ke kilātou maua,
pe kāfai e ia te koe te mālohiaga ke fai ai te mea tēnei.
28Nahe kē lea vē ki tō tuākoi, “Fano oi toe hau ai,
ko tāeao e fōki atu ai e au”—
pe kāfai e ia te koe te mea e fofou ia ki ei.
29Nahe kē faufau mea kino ki tō tuākoi
tē e nofo i ō tafa ma e talitonu atu kia te koe.
30Nahe kē fai fīnauga tauānoa ma he tino,
pe kāfai e hēki ia faia he mea ke āfāina ai koe.
31Nahe kē loto kino ki nā tino fakahāuā,
pe mulimuli ki o lātou ala.
32Ko nā tino vēnā e inoino ki ei te Aliki,
kae e fiafia oi fai ma ana uō kilātou e lelei.
33E fetuku e te Aliki te fale o te tino āmiokino,
kae fakamanuia e ia te kāiga o te tino āmiotonu.
34 #
Iak 4.6; 1 Pet 5.5 Ko te Aliki e tauemu ki nā tino fakatauemu,
kae agaalofa ki nā tino loto maulalo.
35Ko nā tino popoto e maua o lātou vīkiga,
kae ko nā tino vālelea e fakamāhiahigia.
Bible Society New Zealand Charitable Trust