Alagākupu 2
2
Ko te Taui o te Poto
1Taku tama, kāfai e kē talia aku kupu,
ma teu aku fakahinoga i tō loto,
2ma fakalogo lelei koe ki te poto,
ma fakafano tō loto ki te mālamalama;
3io, kāfai koe e tagi atu mo te fuafua loloto,
ma kalaga atu mo te mālamalama,
4kāfai e hakili koe ki ei, e vē oi hakili ki te hiliva,
ma huke ki ei, e vē oi huke ki nā koloa tāua e mumuni;
5oi ka iloa ai e koe te uiga o te mataku i te Aliki,
ma maua ai te mālamalama e uiga ki te Atua.
6Auā ko te Atua te ia fōki maia te poto;
mai tona gutu e hau ai te atamai ma te mālamalama.
7E ia fōkia te poto ki tagata āmiotonu;
ko ia ko he talipupuni kia te kilātou
e ola i he olaga e lelei kātoatoa;
8e ia puipuia ia ala o kilātou e faimeatonu,
ma leoleoa kilātou e pipiki mau kia te ia.
9Oi ka mālamalama ai koe i te āmiotonu
te faimeatonu, te fuafuatutuha, ma ala lelei uma;
10auā ko te poto ka nofo i tō loto,
ma ko te atamai ka kē maua ai te fiafia.
11Ko te fuafua loloto ka tauhia koe;
ko te mālamalama ka puipuia koe,
12ma lāveakia koe mai nā faiga kino,
mai nā tino e tautatala i nā kupu pepelo,
13kilātou kua liliu kehe mai he olaga āmiotonu,
ke ola i te pōgihā o te agahala;
14kilātou e fiafia oi fai nā mea e hē lelei,
ma fiafia ki te pikopiko o nā mea e kino;
15kilātou e faia pea nā mea e hē fakamāoni,
ma ko a lātou mea uma e fai e hē hako.
16Ko te poto e lāveakia koe mai te fafine tau fakaoleole,
mai te fafine uhu holo ma ana kupu fakaohōho,
17tē e ia tīakia tana tāne o tona talavou,
ma e puli i tana tautōga na fai i mua o te Atua;
18auā ko tona ala e tau ki lalo ki te oti,
ma ko ia ko te auala ki te tugamau;#2.18 Epelu ki nā agaga o tagata oti
19ko kilātou e olo kia te ia e hē toe fōki mai,
e hē kilātou toe maua foki te ala ki te ola.
20Ko te mea la ia, hāvavali i te ala o nā tino lelei,
ma tūmau i auala o kilātou e āmiotonu.
21Auā ko nā tino āmiotonu te ka fai mo kilātou te fenua,
ma ko kilātou e fakamāoni ka nonofo tūmau ai;
22kae ko nā tino āmiokino ka tuli kehe mai te fenua,
ma nā tino tau fakalata ka laga kehe mai ai.
Bible Society New Zealand Charitable Trust