Filipi 4
4
Ni Fakahinoga
1Ko te mea ia te kau uho, ko koutou e pele ia te au ma ko au te manatu atu kia te koutou! Kua koutou faia nā mea e fiafia lahi ma fāfia ai au. Ko te mea ia te kau uho pele, ke vēnā foki lava ona mautū te koutou talitonu ki te Aliki.
2Euotia ma Hutuke, ko koulua ni tino e o te Aliki, ma ko te mea ia e talohaga atu ai au, ke fakauma loa nā fekehekeheakiga o koulua. 3Ma ko koe foki toku hoa moni,#4.3 toku hoa moni pe Hihika; he igoa o he tino ko au e fofou ko koe ke fehoahoani ki nā fafine iēnei; auā nae gālulue mālohi kilāua fakatahi ma au i te tālakiga o te Tala Lelei, fakatahi ma Kelemete ma iētahi hoā kaukauna, iēia kua tūhia o lātou igoa i te tuhi o te ola, a te Atua.
4Koutou ke fiafia pea lava i te māfutaga a koutou fakatahi ma te Aliki. Ko au e toe lea atu; koutou ke fiafia!
5Fakaali ki ho he tino te loto agamalū. Ko te Aliki kua toeititi oi hau. 6Koutou nahe popole ki he mea e fokotahi, kae tatalo ki te Atua ki nā mea uma e fofou koutou ki ei, gogō atu kia te ia ma te loto fakafetai. 7Ma ko te fīlēmū o te Atua, tēia e hē tāitai ke pa ki ei te mālamalama o te tagata, ka puipui malu ki outou loto ma outou māfaufau, i te māfutaga fakatahi ma Keliho Iehu.
8Ko aku toe kupu te kau uho, niā lava ni mea e lelei ma e maua ai he vīkiga, ni mea e moni, ni mea e mamalu, ni mea e tonu, ni mea e mamā, ni mea e gali, ni mea e lelei kātoatoa, koutou ke māfaufau pea lava ki ei. 9Fakatino nā mea na iloa ma maua e koutou mai ia te au, e hē gata i aku kupu, kae vēnā foki i aku gāluega. Ma ko te Atua e maua ai e kitātou te fīlēmū, ka fakatahi ma koutou.
Fakafetai mo te Meālofa
10I toku olaga i te māfutaga fakatahi ma te Aliki, ko he mea e fiafia lahi ai au, ona kua toe maua e koutou he avanoa, e ui lava kua mataloa, ke fakaali ai te koutou alolofa mai kia te au. E hē vē ko koutou nae hē alolofa mai kia te au—kae ona lava nae hēai he avanoa ke fakatino ai te koutou alolofa. 11Ma ko au e hē lea vēnei atu ona e hē lava haku mea ke ola ai au, auā kua iloa e au oi talia ma te fiafia ho he mea kua kō maua. 12E iloa e au te mea e takua ko te mativa ma te mea e takua ko te lahi o ni mea. Kua iloa e au te mealilo tēnei; ma pe ko fea lava la te iei au, i ho he taimi, ko au e fiafia lava, pe mākona au pe fiakaia, pe lahi aku mea pe taigole. 13Kua fōki mai e Keliho kia te au te mālohi, ke talia ai e au ho he mea.
14Kae te lelei na mafai e koutou oi fehoahoani mai i nā taimi faigatā nae feagai ma au. 15E iloa lelei lava e koutou iēnā i Filipi, i te fano kehega o oku ma Maketonia i te kāmataga o te tālakiga o te Tala Lelei, e hēai hētahi Ekalehia na gālulue fakatahi kimātou na fōki maia kia te au he fehoahoani ma talia e au, kae vaganā ai lava koutou. #2 Kol 11.9 16Ke pa foki lava ki te taimi nae i Tehalonika ai au, na fehoahoani fakafia mai lava koutou kia te au. #Gāl 17.1 17E hē vē ko au e fofou oioti lava ke kō maua ni meālofa; kae ko au e fofou ke tuputupu pea lava ia fua o autou gāluega. 18Kua maua e au te totogi kātoatoa, ma kua hili atu foki ki luga—ma kua hēai lele hētahi mea e kō manakomia, talu te hau o Epafolotito ma nā meālofa mai ia te koutou. Ko autou meālofa e vē ni tāulaga mea manogi e ofo atu ki te Atua, ma e talia ma fiafia ia ki ei. #Eho 29.18 19Ma ka fōki atu e toku Atua kia te koutou mai te lahi o tona tamaokāiga e ala ia Keliho Iehu, nā mea uma lele e fofou koutou ki ei. 20Ke vīkia to tātou Atua te Tamana ke pa lava ki te fakavavau! Amene.
Ko nā toe Kupu
21E fakafeiloaki atu ki nā tino uma o te Atua e ala ia Keliho Iehu. E fakafeiloaki atu foki kia te koutou, te kau uho e fakatahi kimātou i kinei. 22E fakafeiloaki atu foki nā tino uma o te Atua i kinei, kae maihe lava kilātou e i te fale o Kaihala.
23Ke ia te koutou uma te alofa tūnoa o te Aliki ko Iehu Keliho.
Currently Selected:
Filipi 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
