Filipi 3
3
Ko te Āmiotonu e Moni
1Ko aku toe kupu, te kau uho, koutou ke fiafia i te māfutaga a koutou fakatahi ma te Aliki. E hēai he mea e iei kāfai au ka toe lea atu i nā mea na tuhi atu ai au muamua. E mo te koutou haogalēmū kāfai au e toe lea atu ai. 2Koutou ke fakaetēte i nā tino e vē ni maile! Nā tino e kilātou faia nā mea kino ma e fofou ke fakamātipitipi te tino. 3Ko kitātou nā tino kua mauagia te pelitome moni, auā ko kitātou e tāpuaki ki te Atua e ala i tona Agaga, ma ko kitātou e fiafia i to tātou ola i te māfutaga ma Keliho Iehu. E hē fakamoemoe kitātou ki faiga a tagata i te kikila atu i fafo. 4E mafai foki ke tuku toku fakamoemoe ki nā itūkāiga mea vēnei. Kāfai e iei he tino o koutou e manatu e mafai ia ke fakamoemoe ki nā faiga vēnei a tagata, e tatau ke hilimua te ia te au o ni manatu vēnei. 5Ko au na pelitome i te valu o aho talu toku fānau mai. Ko au he Ihalaelu mai te puikāiga o Peniamina, he tino Epelu moni lava. I te tūlaga tau ki te Tūlāfono Iutaia, ko au nae he Falehaio, #Gāl 23.6; 26.5; Lom 11.1 6ma ko toku loto tautua mālohi ki te Atua, na fakahāuā ai au ki te Ekalehia. Nae fai e au nā mea uma e fakatonu mai e te Tūlāfono, kae ke fiafia ai te Atua.#Gāl 8.3; 22.4; 26.9-11 7Kae ko nā mea uma lele nae fakatāua e au muamua, kua hē toe tāua i te taimi nei, ona ko Keliho. 8E hē nā ko nā mea iēnā oioti. Ia te au, e hēai lele he mea e hili atu te tāua i lo te iloa e au o Keliho Iehu toku Aliki. Kua tīaki e au nā mea uma lele, auā ia te au, ni otaota uma nā mea iēnā. Oioti lava te mea e fofou au ke kō maua ko Keliho, 9ma ke kātoatoa lelei te māfutaga ma ia. E hēai he mea e mafai ke kō faia ke talia ai au i mua o te Atua, ona ko au e uhitaki ki te Tūlāfono a Mohe. Ko au e talia oioti i mua o te Atua pe kāfai au e fakatuatua kia Keliho. 10Oioti lava la te mea e fofou au ki ei, ke iloa e au ia Keliho ma te mana o tona toetū, ke puapuagā au e vē ko ia, ma ke oti foki au e vē ko ia 11kae ke mafai ai foki au ke toe fakatū mai te oti.
Taufetuli ki te Hini
12Ko au e hē lea atu kua maua e au te mea tēnei, pe ko au kua lelei kātoatoa. Kae ko au e tāuivi lava ke kō maua te fakailoga. Ko tēnei tonu foki lava te māfuaga na kavea ai au e Keliho Iehu ke fai mō ia. 13Te kau uho, e hēai lele hoku manatu kua uma te kō maua o te fakailoga; kae oioti lava te mea e kō faia, ko te fakagalo o nā mea kua teka, kae taumafai ki te mea e gata ai toku mafai, ke kō maua nā mea koi mua. 14Ko au la e vili hako lava ki te hini kae ke kō maua te fakailoga o te manumālō, ko te valakaulia mai tēnā e te Atua e ala ia Keliho Iehu, ki te ola e fakavavau.
15Ko kitātou uma kua mātutua i te faka-te-agaga, e tatau ke tutuha o tātou manatu. Kae kāfai e iei ni tino o koutou e kehe o lātou manatu, ka fakamanino atu e te Atua te mea tēnei kia te koutou. 16Oioti lava te mea, tātou pipiki mau pea ki nā tūlāfono nae mulimuli kitātou ki ei mai te kāmataga, ke pa mai ki te taimi nei.
17Te kau uho, fakatakitaki mai kia te au, ma ke maua he koutou akoakoga mai nā tino e mulimuli ki nā fakatakitakiga kua tuku atu e kimātou mo koutou. #1 Kol 4.16; 11.1 18Kua lea fakafia atu au kia te koutou i te mea tēnei, ma ka toe lea atu foki au ma te maligi o oku loimata; e tokalahi nā tino e ola i he olaga kua kavea ai kilātou ma fili o te hātaulo o Keliho. 19Ko te ikuga o nā tino iēnei e fakaumatia, auā kua atua kilātou ki o lātou manakoga faka-te-tino. E fāfifia i nā mea e tatau ke māhiahi ai, ma e māfaufau oioti lava ki nā mea o te lalolagi. 20Kae ko kitātou ni tagatānuku e o te lagi, e fakatalitali ma te amanaki ki to tātou Fakaola, te Aliki ko Iehu Keliho, ke haele ifo mai te lagi. 21Ka hui e ia o tātou tino e pala ke vē ko tona tino mamalu, ma ko tona mana e ia mafaia ai oi tuku ia mea uma ki lalo o tana pule.
Currently Selected:
Filipi 3: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
