Nūmela 5
5
Nā Tino e hē Mamā#5.1 I nā tu tau tāpuakiga
1Na vāgana mai te Aliki kia Mohe, 2“Fakatonu nā tino Ihalaelu ke kave kehe mai te api nā tino uma lele e maua i nā tauale kino o te kili,#5.2 tauale kino o te kili He kupu Epelu e māhani lava fakaliliu lēpela ma e fakaaga ki ni tauale kino ma fakapokepoke o te kili pe hau ai ni alou, ma nā tino uma e hē mamā ona kua paki atu ki he tinooti. 3Ko te fakatonuga tēnei e aofia ai ia tamāloloa ma fafine. Kave kehe uma kilātou kae ke nahe hē mamā ai te api tēia e nofo ai au i te mea e iei ai kilātou.” 4Oi na fai ai e nā tino Ihalaelu e vē ona fakatonu ai e te Aliki ia Mohe, ma kave kehe nā tino vēnei mai te api.
Totogi mo nā Mea Hehē
5Na vāgana mai te Aliki kia Mohe,#Lev 6.1-7 6“Lea ki nā tino Ihalaelu: ‘Kāfai he tamāloa pe he fafine e hē fakamāoni ki te Aliki ma fai e ia he mea hehē ki hētahi tino, 7e tatau te tino tēnā ke takutaku atu ana agahala, ma ofo atu e ia he totogi-taui e kātoatoa ma fakaopōpo ki ei te lua hefulu pahene, oi fōki ai ki te tino na fai ki ei te mea hehē. 8Kae kāfai te tino na fai ki ei te mea hehē kua mate, ma e hēai hona kāiga pili ke fōki ki ei te totogi-taui, oi ka fōki la ki te Aliki mo nā ohitāulaga, fakatahi ma te māmoe poa e fakaaogā mo te hāuniga e fakamamā ai te tino kua agahala. 9E hē gata i tēnā, ko nā meālofa paia uma a nā tino Ihalaelu e kaumai ki he ohitāulaga, ka e a te ohitāulaga lava tēnā. 10Ka kave mā te ohitāulaga nā meālofa paia uma e kaumai kia te ia.’ ”
Nā Fafine hē Fakamāoni kia Lātou Tāne
11Na vāgana mai te Aliki kia Mohe, 12“Tautala ki nā tino Ihalaelu ma lea ve ki ei.
“Kāfai he āvaga a he tamāloa kua hē fakamāoni ki tana tāne 13kāfai na momoe ma hētahi tamāloa kae e hēki iloa e tana tāne pe e hētahi tino, kua hē mamā ia#5.13 I nā tu tau tāpuakiga e ui lava e hēai he molimau ma e hēki maua atu foki ia i tana mea na fai. 14Kāfai kua lagona e tana tāne te loto fuā ma te māhalohalo ma fia iloa e ia pe kua hē mamā tana āvaga, 15e tatau ke kaumai e ia tana āvaga ki te ohitāulaga. E tatau foki ke kaumai e ia ma he meālofa e fokotahi te kilokalama o te falaoa mata e fai i te kālite ke ofo atu mo tana āvaga. E hēai he lolo olive pe he meamanogi e palu ki ei auā ko he meālofa mai he tāne fuā, ke fakamāonia ai pe hala tana āvaga pe hēai.
16“Ka kaumai e te ohitāulaga te fafine ma fakatū i mua o te fata faitāulaga a te Aliki. 17Ka liligi e ia ni vai hā ki loto o he hiā ele ma kave ni pefu mai te fola o te Falekie Tapu oi tuku ki loto kae ke mamala ai. 18Oi ka tatala ai ki lalo e te ohitāulaga te lāulu o te fafine ma tuku atu ki tona lima te meālofa mo te fakamāoniga—te meālofa haito mo te fuā, ke iloa ai pe fakamāonia pe hēai ia māhalohaloga o tana tāne. Ka tū te ohitāulaga i mua o te fafine ma tāofi i tona lima te ipu e i loto ai te vai mamala, tēia e fakaifo ai he mala kia te kilātou e nofo hala. 19Oi ka fakatonu ai e te ohitāulaga ke fai he tautōga a te fafine ma lea vē atu ki ei, ‘Kāfai e hēai hētahi tamāloa na momoe ma koe, ma e hēki faia e koe he mea hehē ke hē mamā ai koe ka ko i lalo koe o te pule a tau tāne, ke hao la koe i te mala e kaumai e te vai mamala tēnei. 20Kae kāfai na fai e koe he mea hehē ka ko i lalo koe o te pule a tau tāne, ma kua hē mamā koe ona na momoe koulua ma he tamāloa e he ko tau tāne—’ 21ko te taimi la tēnei e fakatautō ai e te ohitāulaga te fafine ma lea atu ki ei— ‘Ke iloa e nā tino o koe ko koe kua fakamālaia e te Aliki kāfai e ia faia ke tafe tau tama, ma mimigi tō moegātama ma fufula tō manava. 22Ke ulu te vai tēnei e fakaifo ai he mala, ki loto o te tino o koe, kae ke fufula tō manava ma mimigi tō moegātama.’
“Ma ko te fafine ka lea vēia, ‘Io, ke vēnā lava ona fai.’
23“Oi ka tuhi ai ki lalo e te ohitāulaga nā mala iēnei, ma fufulu kehe ai ki loto o te vai mamala. 24Ka fakainu e ia te fafine i te vai mamala e fakaifo ai he mala. Kāfai te vai e ulu ki te tino o te fafine, ka pagātia lahi ia i nā tīgā pe kāfai ia e agahala. 25Ka kave kehe e te ohitāulaga te meālofa haito mo te fuā mai te lima o te fafine, ma hiki ki luga ke ofo atu ki te Aliki, oi kave ai ki luga o te fata faitāulaga. 26Oi kave ai e ia he lulukugā haito ke hui ai te meālofa kātoa, ma huhunu i luga o te fata faitāulaga; kāfai e uma tēnā oi ka lea ai ki te fafine ke inu ki te vai. 27Kāfai te fafine kua hē mamā ona kua hē fakamāoni ki tana tāne, ko tēnei te mea ka tupu kia te ia: Kāfai e fakainu ki te vai e fakaifo ai he mala ma e pagātia ai ia i nā tīgā, ka fufula tona manava ma mimigi tona moegātama; ma ko tona igoa ka fai ma kupu fakamālaia i te mea e iei ai ona tagata. 28Kae kāfai te fafine e mamā; e hēki ia faia ni mea ke hē mamā ai ia, oi ka hēai la he mea e tupu kia te ia ma ka mafai lava ke maua hana fānau.
29“Ko te tūlāfono tēnā e fakatatau ki te fuā, pe kāfai he fafine e ia faia he mea hehē ma hē mamā ai ka ko i lalo o te pule a tana tāne, 30pe kāfai foki he tamāloa e fuā ma e māhalohalo ko tana āvaga e hē fakamāoni. Ka kave e te tāne tana āvaga ki mua o te Aliki, oi ka fakaaogā ai e te ohitāulaga te tūlāfono kātoa tēnei ki te fafine. 31Ka hēai he mea e hala ai te tāne, kae ka pakū lava ki luga o tana āvaga te taui mo ana agahala.”
Currently Selected:
Nūmela 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
