Nūmela 4
4
Nā Tiute o te Kaukāiga ha-Levī o Kohati.
1Na vāgana mai te Aliki kia Mohe ma Alona, 2“Fai he tuhigā igoa o nā tino ha-Levī e tupuga mai ia Kohati, i lalo o nā kaukāiga ma nā kāiga o kilātou. 3Lehitala ia tāulelea uma mai te tolu hefulu ki te lima hefulu tauhaga te mātutua, kua tatau ma onomea mo nā tiute i te Falekie Tapu.
4“Ko tautuaga a nā tino ha-Kohatī i te Falekie Tapu, e fakatatau lava ki nā mea e hili te paia. 5Kāfai te api a Ihalaelu e hiki ki hētahi koga, ko Alona ma ona ataliki te muamua olo ki loto o te Falekie ke tuku ki lalo te kiepupuni i mua o te Puha o te Feagaiga, ma tatao ai te Puha o te Feagaiga. 6Oi tatao ai e kilātou te kiepupuni tēnei i he kie pakumanu malū, ma toe tatao ai i he kie lanumoana, ma tahulu nā amo e hiki ai te Puha o te Feagaiga.
7“Ka fofola e kilātou he kie lanumoana ki luga o te laulau o te falaoa e ofo atu ki te Aliki, ma tuku ki luga nā ipukai, nā ipu loloto mo nā meamanogi, nā ipuhupo, ma nā hiā mo nā tāulaga uaina, ma te falaoa fakapitoa e tatau ke i ei pea lava i kinā i taimi uma lava. 8Ka tatao e kilātou nā mea uma iēnei i he kie kukula mālohi, oi fofola ai ki luga he kie pakumanu malū, ma tahulu ai ona amo e hiki ai.
9“Ka kave e kilātou he kie lanumoana ma tatao ai te tūgālāmepa ma ona lāmepa, ona iofi, ona titina lāmepa, ona apa tuku lefulefu, ma ona hiā fakapitoa mo te lolo olive e fakaaogā mo nā lāmepa. 10Oi āfīfī ai e kilātou te tūgālāmepa ma nā kope uma mo tona fakaaogāga, i he kie pakumanu malū, ma tuku ai ki loto o te fata e taukave ai.
11“Ka āfīfī e kilātou te fata faitāulaga aulo mo nā meamanogi i he kie lanumoana, oi tatao ai i he kie pakumanu malū, ma tahulu ona amo e hiki ai. 12E tatau ke kave e kilātou nā kope uma lele e fakaaogā i loto o te nofoaga paia. E āfīfī e kilātou i he kie lanumoana oi tatao ai i he kie pakumanu malū ma tuku ai ki luga o te fata e taukave ai.
13“Ka kave kehe e kilātou nā lefulefu mai te fata faitāulaga apamemea, oi tatao ai te fata faitāulaga i he kie lanu violē; 14ma ka tuku e kilātou ki luga o te kie tēnei nā kope uma lele e fakaaogā i te fata faitāulaga—nā apa kave malala, nā tui, nā huō, nā pēhini—ma tatao ai i he kie pakumanu malū, ma tahulu ona amo e taukave ai.
15“Kāfai kua pa ki te taimi e hiki ai te api ki hētahi koga, ka ōmamai nā tino o te kaukāiga o Kohati ke kilātou hikia nā meāfale ma nā kope tapu uma iēnei, pe kāfai kua uma te tatao e Alona ma ona ataliki. Kae e hēai he tino o te kaukāiga o Kohati e mafai ke paki atu ki he mea o nā mea iēnei e paia; ko he tino e paki atu ki ei ka uma lava tona ola. Oi ko nā mea la iēnei mai te Falekie Tapu, te ka tauhiki e nā tino o te kaukāiga o Kohati.
16“Ko Eleahala te ataliki o Alona te ohitāulaga, te ka kikilāgia te Falekie Tapu kātoa. Ka kikila foki e ia nā lolo mo nā lāmepa, nā meamanogi, na tāulaga māhani o te haito, nā lolo fakauku, ma nā mea uma i loto o te Falekie Tapu ma i loto o te Nofoaga Paia ma ona meāfale uma.”
17Oi na vāgana mai ai te Aliki kia Mohe ma Alona, 18“Nahe tukua te kaukāiga ha-Levī o Kohati ke tāmate 19ona e olo ki tafa o nā mea iēnei e hili te paia. Ke puipuia ai mai he mea vēnei e tupu, ko Alona ma ona ataliki ka olo ki loto o te nofoaga paia ma fakahino ia gāluega a te tino e fai, ma fakailoa ki ei ana mea e hiki. 20Kae ko nā tino o te kaukāiga o Kohati e hē tatau ke olo ki loto o te Nofoaga Paia ke kikila ki nā mea e paia, e tuha lava pe mo hina taimi pukupuku lele, auā ka fakaumatia ai o lātou ola.”
Nā Tiute o te Kaukāiga ha-Levī o Kelehona
21Oi na vāgana mai ai te Aliki kia Mohe, 22“Fai he tuhigā igoa o nā tino ha-Levī e tupuga mai ia Kelehona, i lalo o nā kaukāiga ma nā kāiga o kilātou. 23Lehitala ia tāulelea uma mai te tolu hefulu ki te lima hefulu tauhaga te mātutua, kilātou uma kua tatau ma onomea mo nā gāluega i te Falekie Tapu. 24Ko nā tiute tēnei o nā kāiga o ha-Kelehonā i nā tautuaga ma te tauhikiga o nā kavega: 25ko te Falekie, ko ona kie tatao pito ki loto, ona kie tatao pito ki fafo, te kie pakumanu malū e tatao ifo ai i luga, nā kiepupuni mo te fāitotoka ki te Nofoaga Paia, 26ko nā kiepupuni ma nā maea mo te lotoā tēia e hiko fakatakamilo i te Falekie ma te fata faitāulaga, nā kiepupuni mo te fāitotoka ki loto o te lōtoā, ma nā kope uma e fakaaogā ke fakatutū ai nā mea iēnei. Ka kilātou faia nā gāluega uma e tatau ke fai e uiga ki nā mea iēnei. 27Ka kikila e Alona ma ona ataliki ke mautinoa e fakatino e nā tino ha-Kelehonā nā tiute uma o kilātou, ma e kilātou hikia nā mea uma e fakahino ake e Alona ma ona ataliki ke tauhiki e kilātou. 28Ko nā tiute la iēnei i te Falekie Tapu na fakahino ki nā tino ha-Kelehonā, i lalo o te kikilaga a Itamala te ataliki o Alona te ohitāulaga.
Nā Tiute o te Kaukāiga ha-Levī o Melali
29“Lehitala nā igoa o nā tino ha-Melalī i lalo o nā kaukāiga ma nā kāiga o kilātou. 30Lehitala ia tamāloloa uma mai te tolu hefulu ki te lima hefulu tauhaga te mātutua, kilātou uma kua tatau ma onomea mo nā tiute i te Falekie Tapu. 31Ka kikila e kilātou te tauhikiga o nā āuivi, nā lākau fālava, nā pou ma nā tūlaga, 32vēnā foki ma nā pou, nā tūlaga, nā pine, ma nā maea o te lotoā e fakatakamilo i te Falekie Tapu, ma nā mea uma lele e fakaaogā i te fakatūga ki luga. Ka tofu lava te tamāloa ma te mea kua patino lava e tauhiki e ia. 33Ko nā tiute la iēnei i te Falekie Tapu na fakahino ki nā tino ha-Melalī, i lalo o te kikilaga a Itamala te ataliki o Alona te ohitāulaga.”
Tuhigā Igoa o nā Tino ha-Levī
34Oi na lehitala ai e Mohe ma Alona ma nā takitaki o te fakapotopotoga, nā tino o te kaukāiga o ha-Kohatī i nā kaukāiga ma nā kāiga o kilātou, 35mai te tolu hefulu ki te lima hefulu tauhaga te mātutua, kilātou uma kua tatau ma onomea mo nā gāluega i te Falekie Tapu. 36Ko te aofaki kātoa o kilātou i ō lātou kaukāiga e 2,750. 37Ko te nūmela tēnei o nā tino o te kaukāiga o ha-Kohatī, kilātou uma nae tautua i te Falekie Tapu, ma na lehitala e Mohe ma Alona e tuha ai ma te fakatonuga a te Aliki, na kui mai ia Mohe.
38Ko te nūmela kātoa o nā tino ha-Kelehonā i nā kaukāiga ma nā kāiga o kilātou, 39mai te tolu hefulu ki te lima hefulu tauhaga te mātutua, kilātou uma kua tatau ma onomea ke gālulue i nā gāluega i te Falekie Tapu— 40ko te aofaki kātoa o kilātou i ō lātou kaukāiga e 2,630. 41Ko te nūmela tēnei o nā tino o te kaukāiga o ha-Kelehonā, kilātou uma nae tautua i te Falekie Tapu, ma na lehitala e Mohe ma Alona e tuha ai ma te fakatonuga a te Aliki.
42Ko te nūmela kātoa o nā tino ha-Melalī i nā kaukāiga ma nā kāiga o kilātou, 43mai te tolu hefulu ki te lima hefulu tauhaga te mātutua, kilātou uma kua tatau ma onomea ke gālulue i nā gāluega i te Falekie Tapu— 44ko te aofaki kātoa o kilātou i ō lātou kaukāiga e 3,200. 45Ko te nūmela tēnei o nā tino o te kaukāiga o ha-Melalī, iēia na lehitala e Mohe ma Alona e tuha ai ma te fakatonuga a te Aliki, na kui mai ia Mohe.
46Ko kilātou uma na lehitala nā igoa o te puikāiga o ha-Levī, iēia na lehitala e Mohe ma Alona ma nā takitaki o Ihalaelu i nā kaukāiga ma nā kāiga o kilātou, 47mai te tolu hefulu ki te lima hefulu tauhaga te mātutua, kilātou uma kua tatau ma onomea mo nā gāluega ma te tauhikiga o te Falekie o te Aliki, 48ko te tuku fakatahiga o kilātou e 8,580. 49E tuha ai ma te fakatonuga a te Aliki na kui mai ia Mohe, nā tōfia kilātou tau toka tahi uma ki a lātou gāluega e gālulue ai, ma nā mea a te tino e tauhiki.
Ma na fakatāunuku ai te tuhigā igoa, e ve lava ko te fakatonuga a te Aliki kia Mohe.
Currently Selected:
Nūmela 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
