Nūmela 18
18
Nā Tiute o nā Ohitāulaga ma nā Tino ha-Levī
1Na vāgana te Aliki kia Alona, “Ko koe, nā ataliki o koe ma nā tino o tō puikāiga ha-Levī, te ka pakū ki luga te fakahalaga mo nā holitūlāfono uma, e tuha ai ma tautuaga uma i loto o te nofoaga paia. Kae ko koe oioti ma nā ataliki o koe, te ka pakū ki luga te fakahalaga mo nā holitūlāfono uma, e tuha ai ma te fakatinoga o tautuaga a nā ohitāulaga. 2Kaumai nā uho o koe, te puikāiga o ha-Levī, ke gālulue ma fehoahoani atu i te fakatinoga o nā gāluega a koe ma nā ataliki o koe i te Falekie Tapu. 3Ka fakatino e kilātou nā tiute mo koe ma mo te Falekie Tapu kātoa. Kae e hē tatau lele kilātou ke fakatafapili ki nā kope i loto o te Nofoaga Paia pe ki te fata faitāulaga. Kāfai e kilātou faia he mea vēnei, ko kilātou fakatahi ma koe ka tāmate. 4Ko kilātou te gālulue ma koe i te fakatinoga o nā tiute o kilātou i loto o te Falekie Tapu, kae e hēai lele he tino kehe e fakataga ke hōhō atu kia te koutou. 5Ko koe oioti lava ma nā ataliki o koe te ka fakatinoa nā tiute i loto o te nofoaga paia, ma i te fata faitāulaga, kae ke nahe toe pakū ai toku tōkahā ki luga o nā tino Ihalaelu. 6Ko au te na filifilia nā uho ha-Levī o koutou mai nā tino Ihalaelu ke fai ma meālofa kia te koutou. Kua fakatō kilātou mo te Aliki, ke kilātou faia nā tautuaga i te Falekie Tapu. 7Kae ko koe oioti lava ma nā ataliki o koe, te ka fakatinoa ma te fakamāoni nā tiute ohitāulaga uma i te fata faitāulaga, ma i loto o te nofoaga paia. Kua fōki atu e au te tofi ohitāulaga ma meālofa kia te koutou, ma ko ho hētahi tino e taumafai ke ia faia nā gāluega iēnei, ka fakauma lava tona ola.”
Inati o nā Ohitāulaga
8Oi na vāgana mai ai te Aliki kia Alona, “Kikila, kua fōki atu e au kia te koe nā mea uma e ofo mai ma meālofa fakapitoa a tagata Ihalaelu kia te au, ma e hē huhunua ma tāulaga. Kua fōki atu e au nā mea iēnei kia te koe ma nā ataliki o koe, ke fai ma inati o koutou ke pa lava ki te hēgata. 9O nā meālofa e hili te paia e hē mū i luga o te fata faitāulaga, ko nā mea iēnei e a koutou: ko nā meālofa haito, nā tāulaga mo nā agahala, ma nā tāulaga mo te nofohala. Ko nā mea uma lele e ofo mai ma tāulaga paia kia te au, e a koe ma nā ataliki o koe. 10Ona ko nā mea iēnei e tapu, e tatau ai ke kai i he koga e tapu, ma ko tamāloloa oioti te mafai ke kakai ki ei, pe kāfai moni e fakataga kilātou ke kakai ki ei; ko nā mea iēnei e paia kia te koutou.
11“E hē gata i tēnā, ko iētahi meālofa fakapitoa e ofo mai e nā tino Ihalaelu kia te au, e a koe foki. Kua fōki atu e au nā mea iēnei kia te koe, ki nā ataliki ma nā afafine o koe ke fai ma inati e tūmau ke pa ki te hēgata. Ko nā tino uma o tō kāiga e mamā i nā tu tau tāpuakiga, e mafai ke kakai ki ei.
12“Ko nā lolo, nā uaina, nā haito ma nā fua o fātoaga e hili te lelei e ofo atu e kilātou ki te Aliki, kua kō fōki atua kia te koe. 13Ko nā fua o te fuata muamua o nā fātoaga ma nā tōvine o kilātou, e a koe foki. Ka ofo mai e nā tino kia te au, ma ko ho he tino o tō kāiga e mamā i nā tu tau tāpuakiga, e mafai ke kai ki ei.
14 #
Lev 27.28
“Ko nā mea uma i Ihalaelu kua fakatō mo oku, e a koe.
15“Ko nā ulumatua tama a kāiga Ihalaelu takitahi uma vēnā ma ulumatua poa a nā manuvaefa a kilātou e ofo mai e kilātou kia te au, e a koe. Kae e tatau ke talia e koe he totogi ke toe fakatau mai ai nā ulumatua tama uma, ma vēnā foki ma he totogi mo nā ulumatua poa a nā manuvaefa e hē mamā i nā tu tau tāpuakiga. 16Ko te tau e toe totogi ai mo he ulumatua tama kua kātoa te māhina te matua, e lima ia tupe hiliva e tuha ai ma te fua māhani o te nofoaga paia. 17Kae ko nā ulumatua a nā pōvi, nā māmoe ma nā oti, e hē mafai ke toe fakatau mai; ni meatōtino iēnā e āku ma e paia. Ka liaki e koe o lātou toto ki luga o te fata faitāulaga, ma huhunu o lātou gako ke fai ma meālofa meakai e ofo mai i te afi mo he manogi e fiafia ai au. 18Ko te kanofi o nā manu e ā koe, e vē ko te fatafata ma te ālaga taumatau o te meālofa fakapitoa.
19“Ko nā fōaki paia uma e ofo mai e tagata Ihalaelu kia te au, kua fōki atu e au kia koe, ma ki nā ataliki ma nā afafine o koe ke fai ma inati e tūmau pea lava. Ko he feagaiga tēnei e hē mafai ke toe tatala, kua fai e au ma koe ma nā lāpuna o koe.”
20Na toe vāgana mai te Aliki kia Alona, “Ka hēai he tofi o koe i to lātou fenua, pe ko hō vāega fakatahi ma kilātou. Ko au ko te inati ma te tofi o koe, i te mea e iei oku tagata Ihalaelu.”
Inati o nā Tino ha-Levī
21 #
Lev 27.30-33; Teu 14.22-29 Na vāgana mai te Aliki, “Kua fōki e au ki nā tino ha-Levī nā hefuluaki uma e ofo mai e nā tino Ihalaelu kia te au. Ko te totogi tēnei mo a lātou tautuaga e kikila ai e kilātou te Falekie Tapu. 22E kāmata atu nei, ko iētahi tino Ihalaelu e fakahā lele ke fakatafapili ki te Falekie o te Aliki. Ko ai lava e hē uhitaki ki taku poloakiga tēnei, ka pakū lava ki ona luga te fakahalaga ko te oti. 23Ka ko nā tino ha-Levī oioti lava te fakatinoa nā gāluega i te Falekie Tapu, ma e pakū lava ki luga o kilātou ni mea hehē e kilātou faia. Ko he poloakiga tēnei e tūmau ma fakaauau mo augā tupulaga e fāi mai. Ka hēai ho lātou tofi e maua i te fenua o tagata Ihalaelu, 24auā kua fōki e au mo kilātou nā hefuluaki e ofo mai e tagata Ihalaelu ma meālofa fakapitoa kia te au. Ko te mea ia na lea ai au kia te kilātou, e hēai ho lātou tofi tūmau fakatahi ma tagata Ihalaelu.”
Hefuluaki mo nā Tino ha-Levī
25Na vāgana mai te Aliki kia Mohe, 26“Tautala ki nā tino ha-Levī ma lea vē ki ei: ‘Kāfai e maua e koutou mai tagata Ihalaelu te hefuluaki e fōkiatu e au ke fai ma tofi o koutou, e tatau ke ofo atu e koutou te tahi-vae-hefulu o nā mea iēnā, ma fōaki fakapitoa ki te Aliki. 27E vē ona ofo mai kia te au e nā tino Ihalaelu he vāega o a lātou haito ma te uaina, e tatau foki ke fakatō e koutou he vāega o nā mea e maua e koutou mo oku. 28I te faiga tēnei, ka ofo atu ai e koutou he meālofa ki te Aliki mai nā hefuluaki uma e maua e koutou mai nā tino Ihalaelu. Ko te fōaki fakapitoa iēnei e fōki e koutou kia Alona te ohitāulaga. 29E tatau ke ofo atu e koutou ma vāega o te Aliki, nā mea e hili te lelei ma te paia o nā mea uma e maua e koutou mai tagata. 30Kāfai kua ofo atu e koutou te vāega e hili te lelei, ko nā mea e totoe e mafai ke tāofi e koutou, ni mea mai te fola lūhaito pe mai te fātānoa tatau fuāvine. 31Ko te vāega o koutou e mafai ke kai i ho he koga ma e ho he tino o nā kāiga o koutou, auā ko te totogi tēnā o koutou mo autou gāluega i te Falekie Tapu o te Aliki. 32Ona kua ofo atu e koutou te vāega e hili te lelei ki te Aliki, ka hē nofohala ai koutou. Kae ke mautinoa e hē koutou faia he mea ke hē paia ai nā meālofa a nā tino Ihalaelu, ona kua koutou kaia ho he meālofa, ka ko hēki ofo atua ai te vāega e hili te lelei; kāfai e koutou faia te mea tēnei, ko koutou ka tāmate.’ ”
Currently Selected:
Nūmela 18: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
