Nūmela 10
10
Nā Pu Ili Hiliva
1Na vāgana mai te Aliki kia Mohe, 2“Fai ni pu hiliva e lua; e tuki e koe te hiliva ke fai ai nā pu, ke vākai ai te fakapotopotoga ke māopōpo fakatahi, ma ke fakailoa ai kāfai te api ka laga ki luga. 3Kāfai nā pu e lua e ili, ko te fakapotopotoga kātoa o tagata Ihalaelu ka māopōpo mai kia te koe i te faitotoka o te Falekie Tapu. 4Kae kāfai e fokotahi te pu e ili, oi ko nā takitaki—nā ulu o nā kaukāiga o Ihalaelu—te ka māopōpo mai kia te koe. 5Kāfai te tagi o te pu e tamotumotu, ko nā puikāiga e api i te itū ki hahae te ka kāmata oi fakaauau te malaga. 6Kāfai e fakalua oi tagi tamotumotu te pu, ko nā puikāiga i te itū ki haute te ka kāmata oi fakaauau te malaga. Ko te tagi tamotumotu la o te pu ko te fakailo ia ke kāmata oi fakaauau loa te malaga. 7Kae kāfai te potopotoga o tagata Ihalaelu e fakamāopōpo, ko te tagi o te pu e totoho loloa. 8Ko nā ataliki o Alona, nā ohitāulaga, ko kilātou iēnā te ilia nā pu.
“Ko nā tūlāfono iēnei e tatau ke tauhi pea lava koutou ki ei, i augā tupulaga uma lava. 9Kāfai koutou e taunuku ki te koutou fenua ma tau i he taua ma ni fili e ohofakia koutou, tagi te fakailo o he taua i nā pu iēnei. Ko au, te Aliki te koutou Atua, ka fehoahoani atu ma fakahao koutou mai nā fili o koutou. 10E vēnā foki i nā aho fiafia o koutou—nā aho fakamanatu o te Tū mai o Māhina Fōu ma iētahi aho fakamanatu tau tāpuakiga—e ili e koutou nā pu i luga o autou tāulaga mū, ma autou tāulaga o te māfuta fakatahi. Ko nā pu ka fai ma fakamanatuga o koutou i mua o te Aliki te koutou Atua. Ko au ko te Aliki te koutou Atua.”
Kua Olokehe nā Tino Ihalaelu mai Hinai
11I te lua hefulu o aho o te lua o māhina o te lua o tauhaga talu te olo kehe o Ihalaelu mai Aikupito, na mahiki ai ki luga te ao mai te Falekie o te Aliki.#10.11 Pe Falekie Tapu o te feagaiga 12Oi na kāmata ai oi malaga kehe atu ia Ihalaelu mai te Toafa o Hinai, ma na faimalaga ai lava kilātou mai tēia koga ki tēia koga, ke pa ki te taimi na tū ai te ao i te vao o Palana. 13Na kāmata te lātou malaga i te fakatonuga a te Aliki na kui mai ia Mohe.
14Ko nā vāega o te api a te puikāiga o Iuta te na muamua i te holo i lalo o te lātou fuka, ma ko to lātou takitaki ko Nahona te ataliki o Aminatapu. 15Na pito atu ki ei nā vāega o te puikāiga o Ihakala na takitaki e Natanielu te ataliki o Huala, 16ma nā vāega o te puikāiga o Hepulona na takitaki e Eliapo te ataliki o Helona.
17Oi na tuku ai te Falekie Tapu ki lalo, ma ko nā tino ha-Kelehonā ma ha-Melalī, iēia e tau hikia te falekie, te na pito atu ki ei.
18Ko nā vāega o te api a te puikāiga o Leupena te na hohoko atu ki ei, i lalo o te lātou fuka. Ko to lātou takitaki ko Elihua te ataliki o Heteulu. 19Na pito atu ki ei nā vāega o te puikāiga o Himeona, ko to lātou takitaki ko Helumielu te ataliki o Hulihatai, 20ma nā vāega o te puikāiga o Kato, ko to lātou takitaki ko Eliahapa te ataliki o Teuelu. 21Oi na pito atu ai ki ei te vāega o te kaukāiga o Kohati o te puikāiga o ha-Levi, iēia e tauhiki e kilātou nā mea paia o te Falekie Tapu. Ka ko hēki taunuku te malaga ki tētahi koga e fakatū ai te lātou api, ko te Falekie Tapu kua uma te fakatū.
22Na hohoko atu ki ei nā vāega o te api a te puikāiga o Efalaima, i lalo o te lātou fuka. Ko te takitaki o kilātou ko Elihama te ataliki o Amihuta. 23Na pito atu ki ei nā vāega o te puikāiga o Manahe ma to lātou takitaki ko Kamalielu te ataliki o Petohulu, 24ma nā vāega o te puikāiga o Peniamina ma to lātou takitaki ko Apitana te ataliki o Kiteoni.
25Ko nā vāega o te api a te puikāiga o Tanu te nae i tua o te holo, i lalo o te lātou fuka. Ko kilātou te na mulimuli ke leoleoa te pito ki tua o nā api a nā puikāiga uma. Ko to lātou takitaki ko Ahiehe te ataliki o Amihatai. 26Na olo fakatahi kilātou ma te vāega o te puikāiga o Ahela ma to lātou takitaki ko Pakielu te ataliki o Okalana, 27ma vēnā ma te vāega o te puikāiga o Nafatali na takitaki e Ahila te ataliki o Enana. 28Ko te fakahologa tēnā na hāvavali ai nā tino Ihalaelu fai vāega, kāfai e malaga.
29I tētahi aho na lea atu ai ia Mohe kia Hopapa te tuagane o tana āvaga, te ataliki o Leuelu,#10.29 Epelu Leuelu ko hētahi igoa o Ietelo te tino Mitiana, “Ko kitātou e olo āgai ki te koga tēia na leamai vē ai te Aliki kia te kitātou, ‘Ka fōki atu e au kia te koutou.’ Hau tātou olo fakatahi ma kimātou. Ko koutou ka fai fakalelei e kimātou, auā kua folafola e te Aliki nā fakamanuiaga mo Ihalaelu”.
30Kae na tali vē mai ia Hopapa, “Hēai, ko au e hē fanatu, kae ko au ka toe foki ki toku fenua ma toku kāiga.”
31Kua lea atu ia Mohe, “Fakamolemole, nahe kē tīakia ko kimātou, auā e iloa e koe nā mea e tatau ke api ai kimātou i te toafa, ma e tatau ke taki e koe te auala. 32Kāfai koe e hau ke olo kitātou, ka maua tō vāega mai nā fakamanuiaga uma e fōki mai e te Aliki mo kimātou.”
Kua Kāmata te Malaga a Ihalaelu
33Oi na kāmata ai oi olokehe kilātou mai Hinai, te mauga o te Aliki, ma e tolu ia aho na faimalaga ai kilātou. Ko te Puha o te Feagaiga a te Aliki nae i mua i nā aho iēnei e tolu nae kilātou hakilia ai he koga, ke mālōlō ai kilātou. 34Kāfai kilātou e malaga kehe mai he api ki hētahi api, ko te ao o te Aliki nae i luga lava o kilātou i te aoteatea.
35 #
Hal 68.1
Ho he taimi lava e malaga ai te Puha o te Feagaiga, ko Mohe e kalaga vēia,
“Tū kō ki luga, te Aliki e, ma fakatakape nā fili o koe.
Tuku ke hōhola kehe kilātou mai mua o koe.”
36Ho he taimi lava e mālōlō ai, e lea vē ia Mohe,
“Toe hau kō, te Aliki e,
ki te afe ma afe o kāiga o Ihalaelu.”
Currently Selected:
Nūmela 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
