Nūmela 1
1
Ko te Tuhigā Igoa Muamua a Ihalaelu.
1 #
Nūm 26.1-51
I te aho muamua o te lua o māhina o te lua o tauhaga talu te olokehe o nā tino Ihalaelu mai Aikupito, na vāgana ai te Aliki kia Mohe i te Falekie Tapu i te Toafa ko Hinai, ma na vē mai, 2“Fai he tuhigā igoa o nā tino uma lele o Ihalaelu, ma lihi nā igoa o kilātou tau toka tahi i lalo o nā kāiga ma nā kaukāiga o kilātou, 3mai te lua hefulu tauhaga te mātutua āgai ki luga, ma kua mafai ke olo ki te taua. Ka lehitala kilātou e koulua ma Alona ia lātou vaegākau takitahi. 4Lea ki ni takitaki, e taki toka tahi mai nā puikāiga o Ihalaelu, ke fehoahoani atu kia te koulua. 5Ko iēnei nā igoa o nā tino ka fehoahoani atu kia te koulua:
Mai te puikāiga o Leupena, ko Elihua te ataliki o Heteulu;
6mai te puikāiga o Himeona, ko Helumielu te ataliki o Hulihatai;
7mai te puikāiga o Iuta, ko Nahona te ataliki o Aminatapu;
8mai te puikāiga o Ihakala, ko Natanielu te ataliki o Huala;
9mai te puikāiga o Hepulona, ko Eliapo te ataliki o Helona.
10Mai nā ataliki o Iohefa:
mai ia Efalaima, ko Elihama te ataliki o Amihuta;
mai ia Manahe, ko Kamalielu te ataliki o Petohulu;
11mai ia Peniamina, ko Apitana te ataliki o Kiteoni;
12mai ia Tanu, ko Ahiehe te ataliki o Amihatai;
13mai ia Ahela, ko Pakielu te ataliki o Okalana;
14mai ia Kato, ko Eliahapa te ataliki o Teuelu;
15mai ia Nafatali, ko Ahila te ataliki o Enana.”
16Ko nā tino iēnei na filifili mai i te fakapotopotoga o tagata Ihalaelu, nā takitaki o nā puikāiga o kilātou. Ko kilātou nā ulu o nā kaukāiga o Ihalaelu.
17Na kave e Mohe ma Alona nā tāulelea iēnei kua tākua o lātou igoa, 18ma i te aho muamua o te lua o māhina, na māopōpo ai te fakapotopotoga kātoa. Na lehitala e nā tino kilātou lava i o lātou kaukāiga ma i nā puikāiga o kilātou, ma ko nā tāulelea e lua hefulu tauhaga pe hili atu, na lihi o lātou igoa tau toka tahi 19e vē ona fakatonu ai ia Mohe e te Aliki. Oi na fakamaumau ai e Mohe o lātou igoa i te Toafa ko Hinai:
20Mai nā lāpuna o Leupena, te ulumatua a Ihalaelu:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 21Ko te nūmela mai te puikāiga o Leupena e 46,500.
22Mai nā lāpuna o Himeona:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 23Ko te nūmela mai te puikāiga o Himeona e 59,300.
24Mai nā lāpuna o Kato:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 25Ko te nūmela mai te puikāiga o Kato e 45,650.
26Mai nā lāpuna o Iuta:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 27Ko te nūmela mai te puikāiga o Iuta e 74,600.
28Mai nā lāpuna o Ihakala:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 29Ko te nūmela mai te puikāiga o Ihakala e 54,400.
30Mai te puikāiga o Hepulona:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 31Ko te nūmela mai te puikāiga o Hepulona e 57,400.
32Mai nā ataliki o Iohefa:
Mai nā lāpuna o Efalaima:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 33Ko te nūmela mai te puikāiga o Efalaima e 40,500.
34Mai nā lāpuna o Manahe:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 35Ko te nūmela mai te puikāiga o Manahe e 32,200.
36Mai nā lāpuna o Peniamina:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 37Ko te nūmela mai te puikāiga o Peniamina e 35,400.
38Mai nā lāpuna o Tanu:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 39Ko te nūmela mai te puikāiga o Tanu e 62,700.
40Mai nā lāpuna o Ahela:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 41Ko te nūmela mai te puikāiga o Ahela e 41,500.
42Mai nā lāpuna o Nafatali:
Ko tāulelea uma kua lua hefulu tauhaga pe hili atu ma e mafai ke kavea ma fitafita, na lehitala o lātou igoa tau toka tahi, e tuha ai ma nā fakamaumauga a o lātou kāiga ma kaukāiga. 43Ko te nūmela mai te puikāiga o Nafatali e 53,400.
44Ko kilātou iēnei ko nā tino na lehitala e Mohe ma Alona ma nā takitaki e toka hefulu lua o Ihalaelu, ma na lehitala lava te tino i lalo o tona puikāiga. 45Oi ko te nūmela kātoa o nā tino o Ihalaelu na lehitala i lalo o nā puikāiga o kilātou, mai te lua hefulu tauhaga āgai ki luga, ma e mafai ke kavea ma fitafita— 46ko to lātou nūmela fakatahi e 603,550.
47Kae ko nā tino o te puikāiga o ha-Levī e hēki lehitalagia fakatahi ma iētahi puikāiga. 48Auā na vāgana te Aliki kia Mohe, 49“Ko te puikāiga o ha-Levī e hē lehitala e koulua; e hē faitaua e koulua fakatahi ma iētahi tino Ihalaelu. 50Kae ka tofi e koulua nā tino o te puikāiga o ha-Levī ke kikila e kilātou te Falekie Tapu ma nā kope uma i loto. Ka tauhiki e kilātou te Falekie Tapu vēnā ma ona kope uma kāfai e malaga; ko kilātou foki te ka tautua i loto, ma fakatutū e kilātou nā api fakatakamilo i te Falekie Tapu. 51Kāfai ka fakagaoi te api ki hētahi mea, ko te puikāiga o ha-Levī te kilātou tukua ki lalo; ma kāfai ka toe fakatū, ko kilātou foki te ka toe fakatūa. Ma ho he tino e hē ko he ha-Levī e fakatafapili ki te Falekie Tapu, ka fakauma tona ola. 52Ko iētahi tino Ihalaelu ka fakatutū o lātou falekie fai vaegākau, ma i lalo o a lātou lava fuka. 53Kae ko nā tino o te puikāiga o ha-Levī ka fakatutū o lātou falekie fakatakamilo i te Falekie o te Feagaiga, kae ke hēai he tino e fakatafapili ki ei ma pakū ai toku tōkahā ki luga o te fakapotopotoga o tagata Ihalaelu. Ko te puikāiga o ha-Levī te kilātou leoleoa te Falekie o te Feagaiga.”
54Na fai e nā tino Ihalaelu nā mea uma na fakatonu e te Aliki kia Mohe.
Currently Selected:
Nūmela 1: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
