Luka 21

Ko te Tāulaga a te Fafine kua Oti tana Tāne

(Mlk 12.41-44)

1Ko Iehu nae i te Mālumalu, oi na kitea atu ai e ia nā tino maukoloa, e tuku a lātou tāulaga ki loto o te puha tupe mo nā tāulaga mo te Mālumalu. 2Na ia kitea atu foki he fafine mativa kua oti tana tāne, kua tuku e ia ki loto ni tupe apamemea e lua. 3Oi na lea atu ai ia Iehu, “E takutino atu e au kia te koutou, e hili atu te lahi o te tāulaga a te fafine mativa tēnei, i lo iētahi tino uma lele. 4Auā ko iētahi tino na kilātou ofo atua ma tāulaga, mai nā tupe totoe e lahi mai to lātou tamaokāiga; ka ko te fafine tēnei, e ui lava i tona mativa, kae na fōki uma lava nā tupe a ia e ola ai.”

Kua Tautala ia Iehu e Uiga ki te Fakakinoga o te Mālumalu

(Mat 24.1-2; Mlk 13.1-2)

5Ko iētahi o te kau hoko nae faitatala e uiga ki te Mālumalu; ki te mānanaia o nā fatu na fau ai, ma nā meālofa na ofo atu mo te Atua. Kua lea atu ia Iehu, 6“Ko nā mea uma iēnei e koutou kitea atu—e hau te taimi ka hē toe iei he fatu e fokotahi e tū i luga o hētahi fatu; ko nā fatu takitahi uma lele ka togi ki lalo.”

Ko nā Puapuagā ma nā Fakahāuāga

(Mat 24.3-14; Mlk 13.3-13)

7Kua fehili atu ona hoko, “Te Faiākoga, ko āfea te fakatāunuku ai te mea tēnei, ma ko heā foki he fakailoga ke iloa ai e kimātou kua tāli pa ki te taimi e fakatāunuku ai?”

8Oi na lea atu ai ia Iehu, “Koutou ke mataala kae ke nahe fakahehēa ai koutou; auā e tokalahi nā tino ka ōmamai i toku igoa, ma lea vē atu, ‘Ko au ko te Mehia!’ ma, ‘Kua pa ki te taimi!’ Kae ia koutou nahe talitonu kia te kilātou. 9Kāfai e lagona e koutou ni fakamatalaga e uiga ki ni taua ma ni vevehitū o tagatā nuku, koutou nahe mātataku; ko nā mea iēnei e tatau lava ke tutupu, kae e hē vēake ai la, ko te ikuga kua tāli pa mai.”

10Ma na toe lea vē atu ai ia kia te kilātou, “Ka hiki taua tētahi fenua ki tētahi fenua; tētahi mālō ki tētahi mālō. 11Ka iei nā mafuie fakamātakutaku, nā oge ma nā fāmai pēhi i nā koga kehekehe; ma ka kitea atu nā mea fakamātakutaku ma nā fakailoga uiga kehe i te lagi. 12Kae ko hēki tutupu nā mea uma iēnei, ko koutou ka puke ma fakahāuāgia; ka tuku atu koutou ke fakamahino i loto o nā hūnako, ma tuku ki loto o nā falepuipui; ka kave koutou ki mua o nā tupu ma nā kōvana, ona ko au. 13Ko tēnei te avanoa ke fakailoa atu ai e koutou te Tala Lelei. 14Ke tonu muamua i outou māfaufau, ke nahe koutou popole pe ka vēhea ake he koutou tali, #Luk 12.11; 12 15auā ka fōki atu e au kia te koutou nā kupu o te poto; ma ka hē mafai ai e nā fili o koutou oi tali ki ei, pe kilātou taku hehēa nā mea e lea ai koutou. 16Ka tuku atu koutou ki te fakamahinoga e outou mātua, outou uho, outou kāiga ma autou uō; ma ka iei nā tino o koutou e tāmate. 17Ka inohia koutou e tagata uma ona ko au. 18Kae e hēai he lāulu e fokotahi o outou ulu e pakū kehe. 19Ko te onohai o koutou, ka maua ai e koutou te ola moni.

Kua Tautala ia Iehu e Uiga ki te Fakatāugāga o Ieluhalema

(Mat 24.15-21; Mlk 13.14-19)

20“Kāfai e koutou kitea ia Ieluhalema kua hiko fakatāmilo e nā kautau, oi ka koutou iloa ai kua pili mai te aho ka fakatāugāgia ai. 21Ko koutou la e nonofo i Iutea, e tatau ke hōhola ki luga o nā mauga; ko koutou i loto o te kakai e tatau ke olo kehe, ma ko koutou e i fafo o te kakai, e hē tatau ke toe foki ki ei. 22Auā ko nā taimi iēnā o nā ‘Aho o te Fakahalaga,’ ke taunuku ai nā mea uma e vē ona tūhia i nā Tuhituhiga Paia. #Hoh 9.7 23Kai te fakaalofa o te mea ka pa ki ei nā fafine e manavakīkī ma nā mātua koi fakahuhu a lātou pepe, kāfai e pa ki nā aho iēnā. Auā ka pa mai nā puapuagā ki te lalolagi, ma ka pakū te fakahalaga a te Atua, ki luga o ona tagata. 24Ko iētahi tino ka tāmate i te pelu, ka ko iētahi ka kave fakapāgotā ki atunuku uma; ma ko Ieluhalema ka holi ki lalo i vae o tagata fakapaupau, ke pa lava ki te aho e uma ai te lātou pule.

Kāfai te Ataliki o te Tagata e Haele mai

(Mat 24.29-31; Mlk 13.24-27)

25“Ka iei nā fakailoga e hē māhani ai, ka kitea ki te lā, te māhina ma nā fetū. Ka fakatumulia ia mālō o te lalolagi i te popole ma te atuatuvale i te hou o te moana ma te fafati o nā galu. #Iha 13.10; Ehk 32.7; Ioe 2.31; Fkl 6.12-13 26Ka faimatapogia ia tagata i te mātataku ma te fakaātu ki te mea ka pa ki ei te lalolagi kātoa, ona ko nā mālohiaga i te vāteatea ka lūlū kehe mai o lātou alāvaka tūmau. 27Oi ka kitea atu ai te Ataliki o te Tagata e haele mai i loto o he ao o te lagi, ma te mana ma te mamalu hilihili kehe. #Tan 7.13; Fkl 1.7 28Kāfai nā mea iēnei e kāmata oi tutupu, tutū ki luga ma tepa ake ki te lagi, auā ko te koutou fakaolataga kua tāli pa mai.”

Ko te Akoakoga mai te Mati

(Mat 24.32-35; Mlk 13.28-31)

29Oi na fai ai e Iehu te talafakatuha tēnei kia te kilātou: “Māfaufau ki te mati ma iētahi lākau uma. 30Kāfai e kitea e koutou ko nā lau kua kāmata oi ola ake, e iloa e koutou ko te tau māfanafana kua tāli pa mai. 31E vēnā foki lava kāfai e koutou kitea nā mea iēnei e tutupu, ka koutou iloa ai ko te Mālō o te Atua kua tāli pa mai.

32“E takutino atu e au kia te koutou, ko nā mea uma iēnei e tutupu ka ko hēki feoti uma nā tino o te tupulaga tēnei. 33E mou kehe atu te lagi ma te lalolagi, ka ko aku kupu e tūmau pea lava.

Koutou ke Mataala

34“Kae ia koutou ke mataala, nā outou loto ka tuahā lahi ki nā faigākai ma nā īnuga vēnā ma popōlega o te olaga, kae maua mai koutou e te Aho tēnā 35e vē ni tino kua popoki i he māilei. Auā ko te Aho tēnā, ka pa mai ki tagata uma lele i ho he itū o te lalolagi. 36Mataala la i taimi uma ma tatalo ke maua e koutou te mālohi, ke hōhola kehe ai koutou mai nā mea uma iēnei ka tutupu, ma ke tutū ai koutou i mua o te Ataliki o te Tagata.”

37I nā aho iēnā, ko Iehu nae akoako atu i loto o te Mālumalu i nā aho takitahi, kae kāfai e pa ki te pō, nae fano oi nofo i te Mauga o Olive. #Luk 19.47 38Ma i nā tāeaopō o nā aho takitahi, ko tagata uma nae olo ki te Mālumalu, oi fakalogologo kia te ia.

Currently Selected:

Luka 21: TOKU

Highlight

Copy