Luka 10
10
Kua Uga atu e Iehu te toka Fituhefulu lua ke Tālaki
1Kua uma atu te mea tēnei, oi na filifili ai e te Aliki iētahi tino e toka fituhefulu lua,#10.1 toka fituhefulu lua ko iētahi tuhituhiga e leamai toka fituhefulu ma na uga atu ai kilātou tau toka lua ke muamua atu ia te ia, ki nā kakai takitahi ma nā nofoaga kua tuku e kui atu ai ia. 2Kua vāgana atu ia Iehu kia te kilātou, “Ko te helehelega e lahi kae tokaitīti te kau faigāluega. Tatalo la ki te Aliki e āna te helehelega, ke uga atu ni tino faigāluega ke kilātou fakaputu maia te helehelega. #Mat 9.37-38 3Olo! Ko koutou e uga atu e au e vē ni punuāmāmoe, ki te mea e iei ai nā luko. #Mat 10.16 4Nahe kavea ni autou ato tuku tupe, pe ni ato malaga, pe ni hēvae; nahe koutou tutū ke fakafeiloaki he tino i luga o te auala. #Mat 10.7-14; Mlk 6.8-11; Luk 9.3-5 5Kāfai koutou e ulu ki loto o he fale, lea muamua vē, ‘Ke i te fale tēnei te fīlēmū.’ 6Kāfai e iei he tino e tauhi ki te fīlēmū e nofo i kinā, ke tūmau i ona luga te fīlēmū kua koutou ofo atua ki ei, kae kāfai e hēai, ka toe fakafoki mai kia te koutou. 7Nonofo i te fale tēnā, kakai ma inu ki ho he mea e fōki atu e kilātou, auā ko nā tino faigāluega e tatau ke maua e kilātou o lātou totogi. Nahe koutou nonofo holo ma ōatu i tētahi fale ki tētahi. #1 Kol 9.14; 1 Tim 5.18 8Kāfai koutou e ōatu ki he kakai ma talia fiafia ai koutou, kakai ki nā mea e laulau atu mo koutou; 9fakamālōlō nā tauale i te kakai tēnā, ma lea vēnei kinā tino uma i kinā, ‘Ko te Mālō o te Atua kua tafapili mai kia te koutou.’ 10Kae kāfai koutou e ōatu ki he kakai kae e hē talia ai koutou, olo ki luga o ona auala ma lea vē,#Gāl 13.51 11‘E pa foki lava ki te pefu o te koutou kakai e pipiki ki o mātou vae, e tūtū kehe e kimātou ke fakailoa ai te hehē o koutou. Kae ke manatua e koutou, ko te Mālō o te Atua kua tafapili mai kia te koutou!’ 12E takutino atu e au kia te koutou, kāfai e pa ki te Aho Fakamahino, ka hili atu te alofa o te Atua kia Hotoma i lo ki te kakai tēnā! #Ken 19.24-28; Mat 11.24; 10.15
Ko nā Kakai hē Talitonu
(Mat 11.20-24)
13“Heāloa koe Kolahini! Heāloa koe Petehaita! Auā moinei ake nā vāvega na fai i loto o nā kakai o koulua na fai i Tulo ma Haitonu, e vēnei ake ko nā tino i kinā kua leva te nonofo ki lalo ma fai o lātou kofutaga, ma lūlū ki o lātou luga te lefulefu, ke fakailoa ai to lātou halamō! #Iha 23.1-18; Ehk 26.1—28.6; Ioe 3.4-8; Amo 1.9-10; Hkl 9.2-4 14Kae e feolōlo te ikuga o Tulo ma Haitonu i te Aho Fakamahino, i te mea e pa koulua ki ei. 15#Iha 14.13-15Ma ko koe Kapenaumi, nae iei nei hō manatu ko koe e mafai ke hiki ake ki luga ki te lagi? Hēai, ko koe ka togi ki lalo ki Heoli!”
16Kua vāgana atu ia Iehu ki nā hoko o ia, “Ko ai lava he tino e fakalogo atu kia te koutou, e fakalogo mai foki kia te au; ko ai lava e teteke kia te koutou, e teteke mai foki kia te au; ma ko ai lava e teteke mai kia te au, e teteke foki ki tē na ia uga maia au.” #Mat 10.40; Mlk 9.37; Luk 9.48; Ioa 13.20
Ko te toe Foki maiga o te toka Fituhefulu lua
17Na foki mai te toka fitu hefulu lua#10.17 ko iētahi tuhituhiga e lea mai fitu hefulu (kikila ki te fuaikupu 1) ma te fiafia lahi. Na lea vē mai kilātou kia Iehu, “Te Aliki, ke pa foki lava ki nā tēmoni, nae uhitaki mai kāfai e fakatonu e kimātou i tō igoa!”
18Na tali atu ia Iehu, “Na kō kitea te pakū ifoga o Hatani mai te lagi e vē ko te napa a te uila. 19Kikila, kua uma te kō fōki atua kia te koutou te pule, ke mafai ai e koutou oi hāvavali i luga o nā gata ma nā akalava, ma fakatōkilalo ai te mālohi kātoa o te fili ko Hatani, ma e hēai he mea ka ogohia ai koutou. #Hal 91.13 20Kae ia koutou nahe fiafia ona ko nā agaga kino e uhitaki atu kia te koutou; kae fiafia auā ko nā igoa o koutou kua tūhia i te lagi.”
Kua Fiafia lahi ia Iehu
(Mat 11.25-27; 13.16, 17)
21I te taimi lava tēnā, na fakatumulia ai ia Iehu e te Agaga Paia#10.21 e te Agaga Paia ko iētahi tuhituhiga e leamai e te Agaga ka ko iētahi i tona agaga i te fiafia lahi ma na lea vē ake ai, “Te Tamana, te Aliki o te lagi ma te lalolagi! Ko au e fakafetai atu kia te koe, auā kua fakailoa e koe kia te kilātou e hēki akoakoagia, nā mea kua kē mumunia mai ia te kilātou e popoto ma kua akoakogia. Io, te Tamana, ko te mea lava tēnei na fofou koe ke fai.
22“Kua fōki mai e toku Tamana kia te au, nā mea uma lele. E hēai he tino e ia iloa pe ko ai te Ataliki, vaganā te Tamana, ma e hēai foki he tino e ia iloa pe ko ai te Tamana, vaganā te Ataliki ma kilātou kua filifilia e te Ataliki ke fakailoa ki ei.” #Ioa 3.35; 10.15
23Oi na liliu atu ai ia Iehu ki ona hoko, ma na lea vē atu ki ei nā ko kilātou, “Amutia koutou e koutou kitea nā mea e kikila koutou ki ei! 24Auā e lea atu au kia te koutou, e tokalahi nā pelofeta ma nā tupu na fofou ke kilātou kiteagia nā mea kua kitea e koutou, kae na hēki mafai e kilātou; ma na fia fakalogo ki nā mea kua fakalogo koutou ki ei, kae na hēki mafai e kilātou.”
Ko te Talafakatuha o te Hamalia Agalelei
25Oi na hau ai he faiākoga o te Tūlāfono, kua tofotofo e ia ia Iehu ma na lea vē atu ai ki ei, “Te Faiākoga, heā te tatau ke kō faia, ke maua ai e au te ola e fakavavau?” #Mat 22.35-40; Mlk 12.28-34
26Na tali mai ia Iehu, “E vēhea mai la nā Tuhituhiga Paia? E vēhea tau faitau ki ei?”
27Kua tali atu te tino, “ ‘Alofa ki te Aliki tō Atua ma tō loto kātoa, ma tō agaga kātoa, ma tō mālohi kātoa, ma tō māfaufau kātoa’; ma ‘Alofa ki tō tuākoi e vē oi alofa koe kia te koe lava.’ ” #Lev 19.18; Teu 6.5
28 #
Lev 18.5
“E hako koe,” na tali mai vēnā ia Iehu; “fai la te mea tēnā, oi maua ai e koe te ola e fakavavau.”
29Kae na fofou te faiākoga o te Tūlāfono, ke fakailoa ko ia e mālamalama i nā mea iēnei, oi na fehili vē atu ai kia Iehu, “Ko ai toku tuākoi?”
30Na tali mai ia Iehu, “Nae iei he tamāloa na fanaifo mai Ieluhalema ki Ieliko, oi na ohofaki ai e ni tino fāomea; kua hamu uma ana mea kae kini, oi na tīaki ai kua tāli mate. 31Na kui ifo i te auala tēnā he ohitāulaga; kae i te ia kitea atuga o te tamāloa tēnei, oi na havali ai lava i tētahi itū o te auala. 32Na kui vēnā ifo foki he ha-Levī, kua fanatu oi kikila ki te tamāloa, oi na havali lele ai, kua fano i tētahi itū o te auala. 33Kae na malaga atu foki he Hamalia i te auala tēnā, kua tau atu ki te tamāloa, oi na tumu lele tona loto i te alofa. #2 NT 28.15 34Ma na fano ai ki ei oi liligi nā lolo ma te uaina ki nā manuka o te tamāloa ma fuhi, ma na fakatiketike ai ki luga o te manu nae tiketike ai ia, ma kave ki he fale talimālō, ke tauhi ai e ia i kinā. 35Kua pa ki te aho alafaki, oi na tōake ai e ia i tana taga nā tēnali e lua, kua fōki ki te tino e o ia te fale talimālō, ma lea vē atu ki ei, ‘Tauhi fakalelei te tino tēnei. Kāfai au e toe foki mai, oi kua totogi atu ai e au ni iētahi tupe fakaopōpo na fakafano e koe mo tona tauhiga.’ ”
36Oi na fehili atu ai ia Iehu, “I te manatu o koe, ko ai o te toka tolu tēnei, na kavea ma tuākoi lelei ki te tino na kini e nā tino fāomea?”
37Kua tali mai te faiākoga o te Tūlāfono, “Ko te tino na alofa ki ei.”
Oi na lea atu ai ia Iehu, “Fano la oi fai vēnā foki e koe.”
Kua Āhiahi ia Iehu kia Mafa ma Malia.
38Ka koi faimalaga atu ia Iehu ma ona hoko, na tau atu ai kilātou ki he nuku nae iei ai he fafine nae igoa kia Mafa, ma na ia taliagia ma te fiafia ia Iehu i loto o tona fale. #Ioa 11.1 39Nae iei te taina o Mafa nae igoa kia Malia, kua nofo ki lalo i tafa o nā vae o te Aliki ma fakalogologo ki ana akoakoga. 40Ka ko Mafa kua hē fiafia ona ko te lahi o nā fekau a ia e fai, oi na fano ai kia Iehu, kua lea vē atu ki ei, “Te Aliki, ko koe e hē fia tokaga lele ki toku uho, ma tana mea kua tīaki mai ai au ke faia tautahi nā fekau? Lea kō ki ei ke hau oi fehoahoani mai kia te au!”
41Kae na tali atu te Aliki ki ei, “Mafa, Mafa! Te lahi o nā mea e fakaātu ma popole koe ki ei, 42kae e fokotahi oioti lava te mea e manakomia. Kua filifilia e Malia te mea e lelei, ma ka hē toe kave kehea lele mai ia te ia.”
Currently Selected:
Luka 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
