Kenehe 43
43
Kua toe Liliu nā Uho o Iohefa ki Aikupito ma Peniamina
1Ko te oge i Kanana kua fano lava e kino lahi, 2ma ko nā haito uma na fakatau mai e kilātou mai Aikupito kua uma te kai, oi na lea ai ia Iakopo ki ona ataliki, “Toe olo oi fakatau mai ni nāi meakai mo kitātou.”
3Kua lea atu ia Iuta, “Te tamana, e vē ko te mātou lea atuga muamua, ko te tamāloa e pule i te fakatauga o nā meakai na lea lelei mai lava, ko kimātou e hē toe ōake oi kikila ia, heiloga e ōatu kimātou ma to mātou uho tamaiti. 4Kāfai la koe e malie ke olo kimātou ma to mātou uho, oi ka olo kimātou oi fakatau mai ni au meakai. 5Kae kāfai koe e hē malie ki ei, ko kimātou foki e hē olo, auā na lea lelei mai lava te tamāloa kia te kimātou, ko kimātou e hē toe ōake oi kikila ia, heiloga e ōake kimātou ma to mātou uho tamaiti.”
6Kua lea atu ia Iakopo, “Heā nei te kua fakalahi ai e koutou oku puapuagā, i te kua taku tauānoa e koutou ki ei e iei tētahi uho o koutou?”
7Na tali mai kilātou, “Ko te tamāloa e pule nae tūfehili mai lava kia te kimātou e uiga ki to tātou kāiga, ‘Koi ola mai te tamana o koutou? E iei hētahi outou uho?’ Na tali lava e kimātou ana fehili nae fai mai. E ve la na iloa e kimātou, ka lea mai ke kaumai to mātou uho?”
8Kua lea atu ia Iuta ki tona tamana, “Tuku mai te taumalo kia te au kae keinā olo loa kimātou, auā i na mate he tino o kitātou i te fia kaia. 9Tuku mai ke kikila e au, ma e takutino atu e au ka kō puipuia ia i toku ola. Kāfai e hē kō toe kaumaia ia ma te haogalēmū kia te koe, ka pakū mai pea lava kia te au te hehē. 10Ānei ake kitātou e hēki fakatali mataloa, e vēnei ake kua lua a tātou malaga fakatau meakai e fano ma toe liliu mai.”
11Kua lea vē atu to lātou tamana, “Kāfai ko te mea tēnā e tatau ke fai, olo la ma kave i autou taga nā fua mai te fenua e hili atu te lelei, ke fai ma meālofa ki te tamāloa e pule: ni nāi mea pulu pāhama ma ni meli, ni mea pulu mulo, ni mea fakamanogi meakai, ni nāi nati pihitahio ma ni haketi. 12Ke fakaluagia foki te lahi o autou tupe e olo ma koutou, auā e tatau ke toe fakafoki nā tupe na toe kaumai e koutou i loto o autou taga. Hōvē lava pe he pahala e o kilātou. 13Kave te uho o koutou ma olo loa lava nei. 14Ke alofa te Atua Mālohihilihili#43.14 Epelu Eli Hatai ke ia fakatupua i te loto o te tamāloa pule, te alofa kia te koutou, kae ke toe tuku atu e ia kia te koutou tētahi outou uho ma Peniamina. Kāfai lava e iku ake kua hēai haku fānau, oi kua hēai lava haku fānau.”
15Oi na kave ai e te kau uho nā meālofa ma fakaluagia te lahi o a lātou tupe na olo ma kilātou, ma malaga atu ai loa ki Aikupito ma Peniamina. I te papā atuga ki kinā, oi na olo ai kia Iohefa. 16I te kitea atuga e Iohefa ko Peniamina kua ōmamai ma ona uho, oi na vē atu ai tana fakatonuga ki te kaukauna e pule i tona fale, “Kave nā tāulelea iēnei ki toku fale. Ko kimātou ka kakai fakatahi i te katiga o te aoauli nei, ma tāmate he manu, ma hāuni he meakai.” 17Na fakatino e te kaukauna nā fakatonuga uma iēnei, ma na kave ai e ia te kau uho ki te fale o Iohefa.
18I te kavega o kilātou ki te fale o Iohefa, na mātataku lele ma lea vē, “Ko kitātou nei kua kaumai ki kinei ona ko te tupe na toe kave ia tātou taga i te taimi muamua na ōmamai ai kitātou. E i nā ohofaki ma puke e ia kitātou, ma kave a tātou āhini, ma fai kitātou ma ana pologa.” 19Ma i te papā atuga o kilātou ki te faitotoka o te fale, oi na lea atu ai kilātou ki te kaukauna pule a Iohefa, 20“Fakamolemole te tamana, ko kimātou na ōmamai ki kinei muamua oi fakatau meakai. 21I te toe liliuga o kimātou, na api kimātou i luga o te auala ke mālōlō ai i te pō. E tatala ake a mātou taga tau toka tahi, ko a mātou tupe e pito ake ki luga—nā tupe uma lele. Iēnei kua toe kaumai e kimātou kia te koe. 22Kua kaumai foki e kimātou ni tupe fakaopōpo ke fakatau ai ni iētahi meakai. E hē kimātou iloa pe na hei toe tukua nā tupe ki loto o a mātou taga.”
23Na tali atu te kaukauna, “Koutou nahe popole. Koutou nahe mātataku. Ko te koutou Atua, te Atua o te koutou tamana, hōvē pe na ia tukua te tupe ki loto o autou taga mā koutou. Na maua e au te totogi o te koutou fakatau tēnā.” Oi na kaumai ai ia Himeona e ia kia te kilātou. 24Kua kave e te kaukauna te kau uho ki loto o te fale o Iohefa, ma tuku atu ki ei nā vai ke fulufulu ai o lātou vae, ma fafaga e ia a lātou āhini. 25Kua hāuni a lātou meālofa ke tuku atu kia Iohefa kāfai e pa ki te aoauli, auā kua uma te fakailoa kia te kilātou, ko kilātou e kakai fakatahi ma Iohefa i te kaiga o te aoauli. 26I te pa maiga o Iohefa ki te fale, oi na kaumai ai e kilātou nā meālofa ki loto o te fale, ma ifo ki lalo i mua o ia. 27Kua lea atu ia Iohefa, “E ā mai koutou? Na tākua e koutou te koutou tamana kua matua—e ā mai nei? Koi mālohi?”
28Na tali atu kilātou, “Ko tau kaukauna, to mātou tamana, e mālohi lele,” ma na tōtutuli ai ki lalo ma ifo atu kia te ia.
29Kua fakaholo ake te kikila a Iohefa ki luga ma ia kitea atu tona uho ko Peniamina, te ataliki o tona mātua, ma lea vē atu ai, “Oi ko tēnei la te koutou uho tamaiti na lea mai ai koutou. Ke fakamanuia te Atua kia te koe, te taumalo.” 30Oi na fano kehe vave ai ia Iohefa, auā kua tumu tona loto i te alofa ki tona uho, ma na fano ai ki tona potu oi tagi ai. 31Kua uma te holo o nā mata o ia, oi hau ai ki fafo o te potu, ma kua tāofiofi lava ona lagona, ma na fakatonu ai e ia ke laulau te meakai. 32Na laulau kehe te meakai a Iohefa nā ko ia i tana laulau, kae kakai ona uho i hētahi laulau. Ko nā tino Aikupito nae kakai i kinā, nae kehe foki lava te lātou laulau, auā nae fakahā kilātou i to lātou talitonuga, ke kakai fakatahi ma nā tino Epelu. 33Kua fakanonofo te kau uho i te lātou laulau fakahaga kia Iohefa, fakaholo mai i te tino matua ke pa ki te tino tamaiti. I te kilātou kiteaga o te fakanonofoga o kilātou, na tēteki lele ma taufai kikila tētahi ki tētahi. 34Ko nā meakai nae i te laulau a Iohefa, kua fakaholo mai ki te laulau a ona uho, ma e fakalima atu te lahi o nā meakai na kave kia Peniamina i lo ki iētahi ona uho uma. Oi na kakai ai ma inu fiafia fakatahi kilātou ma Iohefa.
Currently Selected:
Kenehe 43: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
