Kenehe 42
42
Kua Olo nā Uho o Iohefa ki Aikupito Fakatau Haito
1Kua logotala ia Iakopo e iei nā haito i Aikupito, oi na lea vē ai ki nā ataliki o ia, “Ko koutou la ka tutū vēnā mai, ni ā ta kitātou ka fai? 2Kua fakalogo au e maua nā haito i Aikupito; olo kō ki ei oi fakatau mai ni a tātou haito auā kitātou ka mamate i te fia kakaia.”#Gāl 7.12 3Oi na olo ai nā uho e toka hefulu o Iohefa ki Aikupito oi fakatau haito, 4kae ko Peniamina, te uho moni o Iohefa, na tāofi e Iakopo ke nahe olo ma nā uho mātutua o ia, auā e popole na iei he fakalavelave e tupu ki ei.
5Ma na olo ai nā ataliki o Iakopo vēnā ma iētahi tino oi fakatau mai ni a lātou haito, ona kua halalau te oge ki Kanana kātoa. 6I te taimi tēnā ko Iohefa ko te kōvana ia o Aikupito, ma nae fakatau atu e ia te haito ki tagata mai mālō o te lalolagi. Oi na ōmamai ai nā uho o Iohefa kua ifo atu kia te ia. 7Kua kitea atu e Iohefa nā uho o ia, ma na ia matea kilātou, kae nae fai lava ana mea e vē lava ko ia he tino kehe. Kua tautala fakafekai atu ia Iohefa kia te kilātou, “Ko koutou e ōmamai i fea?”
Na tali mai kilātou, “Ko kimātou na ōmamai mai Kanana oi fakatau meakai.”
8E ui lava kua matea e Iohefa nā uho o ia, kae e hēki matea e kilātou ia Iohefa. 9Ma na manatua e Iohefa nā miti a ia na fai e uiga kia te kilātou, oi na lea vē atu ai ki ei, “Ko koutou ni hipai; ko koutou kua ōmamai ke koutou iloa pe ni ā nā mea e hē mālohi ai to mātou fenua, kae ke ohofaki e koutou.”#Ken 37.5-10
10Na tali mai kilātou, “Hēai kō, te aliki. Ko kimātou nei ni kaukauna kia te koe, na ōmamai oi fakatau meakai. 11Ko kimātou uma iēnei he kau uho. Ki mātou e hē ni hipai, te aliki; ko kimātou ni tino fakamāoni.”
12Kua lea atu ia Iohefa, “Hēai! ko koutou kua ōmamai ke koutou iloa pe ni ā nā mea e hē mālohi ai to mātou fenua, kae ke ohofaki e koutou.”
13Ma na tali vē mai kilātou, “Te aliki, ko kimātou nae he kau uho toka hefulu lua, ni ataliki o he tamāloa i te fenua ko Kanana. Ko tētahi o mātou uho kua oti, kae ko te kimuli e i te fale ma to mātou tamana.”
14Kae kua lea atu ia Iohefa, “E vē lava ko toku lea atu, ko koutou ni hipai. 15Ko tēnei la te mea ka fakamāonia ai te hako o autou kupu: e tautō atu au i te igoa o te tupu, ko koutou e hē olokehe ma kinei, heiloga ko te koutou uho tamaiti kua kaumai ki kinei. 16Fano he tino e fokotahi o koutou oi kaumai, kae ko iētahi o koutou ka tāofia i te falepuipui ke maua he fakamāoniga o te hako o autou kupu. Auā e vē ona fakamāonia ko te tupu e ola, e vēnā foki ona fakamāonia ko koutou ni hipai.” 17Ma na fakatonu ai e ia ke kave uma kilātou ki te falepuipui mo ni aho e tolu.
18I te tolu o aho, oi na lea atu ai ia Iohefa kia te kilātou, “Ko au he tino e mataku i te Atua, ma kāfai e koutou faia te mea tēnei, ka fakahao e au nā ola o koutou: 19kāfai koutou ni tino fakamāoni, nofo la he tino e fokotahi o koutou i te falepuipui, kae toe liliu uma tētahi vāega oi kave nā haito a koutou kua fakatau, ki nā kāiga o koutou kua fia kakaia ona ko te oge. 20Oi kua toe ōmamai ai la ma kaumai te uho tamaiti o koutou kia te au. Ka kavea tēnā ma fakamāoniga o autou kupu, ma ka hē kō tukua ai koutou ke tāmate.”
Na mālilie uma kilātou ki te mea tēnei. 21Oi na lea vē ai tētahi ki tētahi, “Ko te meamoni lava, ko kitātou kua puapuagā vēnei ona ko te mea a kitātou na fai ki to tātou uho. Na kitea e kitātou te fakanoanoa lahi o tona loto i te fakatagi maiga ki he fehoahoani, kae na hēki fia fakalogo kitātou kia te ia. Ko te mea ia kua puapuagā ai kitātou i te taimi nei.”
22Kua lea atu ia Leupena, “Na lea lelei atu lava au ke nahe faia he mea ki te tamaiti, kae e hēki fia fakalogo mai koutou. Nei la, kua taui mai kia te kitātou tona toto.”#Ken 37.21-22 23Nae hē kilātou iloa ko Iohefa e mālamalama ia lātou tala nae fai ona nae iei te tino nae fai ma fakamatala kupu i to lātou vā. 24Oi na fano kehe ai loa ia Iohefa mai ia te kilātou ma na kāmata kua tagi. Kua tau totoka tona loto māfatia, oi na toe tautala ai kia te kilātou. Oi na ia filifilia ai ia Himeona mai ia te kilātou, ma fakatonu ke noanoa i mua o kilātou.
Kua toe Liliu nā Uho o Iohefa ki Kanana
25Oi na fakatonu ai e Iohefa ana kaukauna ke fakatūtumu na taga a nā tāulelea i te haito ma ke toe tuku nā tupe a kilātou tau toka tahi ki loto o a lātou taga, ma ke fōki ni a lātou meakai ke lava mo te malaga. Ma na vēnā lava ona fai. 26Kua uta a lātou āhini i nā haito a kilātou na fakatau, ma na olo ai loa. 27I te koga na momoe ai i te pō, na tago ai he tino o kilātou oi tatala tana taga ke fafaga tana āhini, ma na ia maua tana tupe e pito ake ki luga o te taga. 28“E kikila, ko taku tupe kua toe fakafoki mai kia te au,” kua kalaga vēnā atu ki ona uho. “Tēnei e i loto o taku taga!” Na fakanoanoa lele kilātou ma mātataku, ma kua fehili atu tētahi ki tētahi, “Heā nei ko ta te Atua kua fai mai kia te kitātou?”
29I te taunuku atuga o kilātou ki to lātou tamana ko Iakopo i Kanana, oi fakamatala uma ai e kilātou kia te ia, nā mea na tutupu kia te kilātou: 30“Ko te kōvana o Aikupito, na tautala fakafekai mai kia te kimātou, ma lea mai ko kimātou ni hipai e teteke ake ki to lātou fenua. 31Na tali atu kimātou ki ei, ‘Ko kimātou e hē ni hipai, ko kimātou ni tino fakamāoni. 32Ko kimātou he kau uho nae toka hefulu lua fakatahi, ni ataliki o he tamana e fokotahi. E fokotahi to mātou uho kua oti, ka ko te kimuli e i Kanana ma to mātou tamana.’ 33Oi na lea mai ai te tino, ‘Ko tēnei te mea ka kō iloa ai pe ni tino fakamāoni koutou: ka nofo vēnei he tino o koutou ma au; ka ko iētahi ka olo oi kave nā haito ki outou kāiga e fia kakaia, ma olo loa. 34Kaumai te uho tamaiti o koutou kia te au, kae ke iloa ai e au ko koutou e hē ni hipai, kae ni tino fakamāoni. Oi kua toe fōki atu ai e au te uho o koutou, ma fakahaoloto koutou ke fakatau ni autou koloa i kinei.’ ”
35Ma i te taligiga ki lalo o a lātou taga, na kitea ai ko a lātou tupe koi loto lava o a lātou taga; ko te taimi na kitea ai nā tupe, na mātataku uma lele kilātou vēnā ma to lātou tamana ko Iakopo. 36Kua lea atu te tamana kia te kilātou, “Ko koutou nei e fofou ko taku fānau ke feoti uma? Kua hēai ia Iohefa, kua hēai ia Himeona, kae ko tēnei kua fofou foki koutou ke kave ia Peniamina. Ko nā mea uma iēnei kua puapuagā lele ai au!”
37Oi na lea atu ai ia Leupena ki tona tamana, “Kāfai e hē toe kō kaumaia ia Peniamina kia te koe, e mafai ke tāmate e koe oku ataliki e toka lua. Tuku mai kia te au ke kikila e au, ma e toe kō kaumaia lava ia kia te koe.”
38Kae kua lea atu ia Iakopo, “Hēai! E hē kō tuku atua toku ataliki ke olo koutou; kua oti tona uho, ma ko ia oioti te koi totoe. E i nā tupu mai ki ei he mea i te auala. Ko au kua matua, ma ko te fakanoanoa e pa au ki ei e ono oi mate ai lava au.”
Currently Selected:
Kenehe 42: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
