Ehoto 5
5
Ko Mohe ma Alona i mua o te Tupu o Aikupito
1Mulimuli ake, oi na olo ai ia Mohe ma Alona kia Falao te tupu o Aikupito ma lea vē atu ki ei, “Ko te Aliki, te Atua o Ihalaelu, e leamai, ‘Tuku nā tino o oku ke olo, kae ke fai e kilātou i te toafa, he kaiga fakamanatu kia te au.’ ”
2Na tali mai ia Falao, “Ko ai te Aliki? Heā te fia fakalogo tauānoa ai au ki ei, ma tuku atu ia tagata Ihalaelu ke olo? E hē kō iloa te Aliki, ma e hē kō tukua foki ia tagata Ihalaelu ke olo.”
3Kua tali atu ia Mohe ma Alona, “Ko te Atua o tagata Epelu na fakakitea mai kia te kimāua. Fakamolemole tuku mai kimātou ke malaga i ni aho e tolu ki te toafa, ke ofo atu a mātou tāulaga ki te Aliki to mātou Atua. Kāfai ka hē kimātou faia te mea tēnei, e i nā tāmate nei kimātou e ia i ni fāmai pe ni taua.”
4Kua lea mai te tupu kia Mohe ma Alona, “Heā te kave kehe tauānoa ai e koulua nā tino mai a lātou gāluega? Koutou uma lele, olo ki autou gāluega! 5Kikila, kua hili atu te tokalahi o koutou i lo nā tino Aikupito, ka ko koulua e fofou ke mālōlō nā gāluega!”
6I te aho lava tēnā, na fai ai te fakatonuga a Falao ki nā pule gāluega fakahāuā ma nā takitaki gāluega Ihalaelu e vēnei: 7“Nahe toe fōkia lele ni mutia mamago ki nā tino ke fai ai nā piliki. Uga ke olo lava kilātou oi hakili mai. 8Kae e tūmau lava te nūmela o nā piliki e fai e kilātou e vē lava ko te mea nae iei ai muamua, ma e hē fakaitītia lele te nūmela i he piliki e fokotahi. Ko te paiē o kilātou ko tēia e lea hō mai ai ke tuku ake kilātou ke olo oi fai tāulaga ki to lātou Atua! 9Fakamamafa lele ma ke lahi atu a lātou gāluega e fai i lo te mea nae iei ai muamua, kae ke hēai ho lātou taimi e fakalogo ai ki ni fakamatalaga pepelo.”
10Oi na ōatu ai nā pule gāluega fakahāuā ma nā takitaki gāluega Ihalaelu oi lea vē atu ki nā tino Ihalaelu, “Ko Falao e leamai ka hē ia toe kavatua ni mutia mamago kia te koutou. 11E lea mai, ko koutou ke olo oi hakili mai lava e koutou autou mutia mamago i ho he mea e maua ai e koutou, kae e hē huia ai te aofaki o nā piliki e fai e koutou.” 12Oi na olo ai nā tino Ihalaelu ki koga uma o Aikupito oi hakili kauhaito ke hui ai nā mutia mamago. 13Na taumafai lava nā pule gāluega fakahāuā ke fakamālohia nā tino Ihalaelu ke fai ke kātoa te nūmela o nā piliki i nā aho takitahi, e vē lava ko te taimi muamua nae fōki ai ki ei a lātou mutia mamago. 14Ma kua kini e kilātou nā takitaki gāluega Ihalaelu na kilātou tōfia ke kikilāgia nā gāluega. Kua lea vē atu kilātou “Heā te kua hē maua ai e koutou te tūhaga o nā piliki e vē ko te mea nae iei ai muamua?”
15Oi na olo ai nā takitaki gāluega Ihalaelu kia Falao, kua kave ki ei te lātou fāitioga ma lea vē atu, “Te aliki, heā te kua fai vēnei ai kimātou au kaukauna e koe? 16E hēai ni a mātou mutia mamago e kē fōki maia, kae ko tēia e fakatonu mai kimātou ke fai nā piliki! Nei foki la ko kimātou e kini, kae e hē ko kimātou te hehē. Ko te hehē e o nā tino lava o koe.”
17Kua tali mai te tupu, “Ko koutou e paiē ma hē fofou ke gālulue, ma ko te mea ia e lea mai ai koutou, ke tuku atu koutou ke olo oi fai autou tāulaga ki te Aliki. 18Olo nei loa oi fai autou gāluega! E hēai ni mutia mamago e fōki atua, kae e tutuha lava te nūmela o nā piliki a koutou e fai e vē ko te mea nae iei ai muamua.” 19Na hāfia e nā takitaki gāluega Ihalaelu te tūlaga fakahētonu kua pa kilātou ki ei, i te taku akega e tutuha lava te nūmela o nā piliki e tatau ke fai e kilātou i te aho, ma te nūmela nae iei ai muamua.
20Kua olokehe atu kilātou mai ia Falao, oi na fetaui ai kilātou ma Mohe ma Alona, nae fakatalitali atu ki ei. 21Oi na lea atu ai kilātou kia Mohe ma Alona, “Kua kitea e te Aliki te mea a koulua na fai, ma ka ia fakahalagia koulua, auā kua kavea te mea a koulua kua fai, ma mea kua fakalialia ai ia Falao ma ana kaukauna ia te kimātou. E tuha lava kua tuku e koulua ki o lātou lima he pelu, ke kilātou tāmatea ai kimātou.”
Kua Fāitio ia Mohe ki te Aliki
22Oi na toe liliu ai ia Mohe ki te Aliki ma lea vē atu ki ei, “Te Aliki e, heā te faikino ai koe ki ō tagata? Heā te na uga mai ai au e koe ki kinei? 23Talu lava toku fano kia Falao oi tautala ki ei i tō igoa, kua kino lele ana mea kua fai kia te kilātou. Ma e hēai lele he mea kua fai e koe ke fehoahoani ai kia te kilātou.”
Currently Selected:
Ehoto 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
