Ehoto 36
36
1“Ko Pehaleli ma Oholiapo ma iētahi tino faigāluega popoto tau toka tahi uma na tuku ki ei e te Aliki te tomai ma te mālamalama, ke kilātou iloa ai oi fai ho he gāluega i te fauga o te nofoaga paia, e vē lava ona fakatonu ai e te Aliki.”
Kua Kaumai e Tagata te Lahi o nā Meālofa
2Oi na fekau ai e Mohe ia Pehaleli ma Oholiapo, ma iētahi tufuga uma na fōki e te Aliki ki ei te tomai, kilātou uma na fakaohofia o lātou loto ke fai te gāluega, 3ma na kilātou maua mai ia Mohe nā mea uma na ofo atu e nā tino Ihalaelu mo te fauga o te nofoaga paia. Kae nae kaumai pea lava e tagata kia Mohe i tāeao takitahi uma, a lātou meālofa o te lotomalie. 4Ma na olo uma ai nā tufuga nae gālulue i te fauga o te nofoaga paia, 5ma lea vē atu kia Mohe, “Ko nā mea e kaumai e nā tino e lahi ātili lele mo te gāluega na fakatonu mai e te Aliki ke fai.”
6Oi na fai ai e Mohe he fakatonuga, ma na fakahalalau i loto o te api kātoa e vēnei, “E hēai he tamāloa pe he fafine e toe kaumai hana meālofa mo te nofoaga paia.” Oi na tāofi ai te toe kaumai e tagata o ni mea; 7auā ko nā mea na kaumai muamua e kilātou kua lahi ātili lele mo te fakaumaga o te gāluega.
Te Fauga o te Falekie Tapu
(Eho 26.1-37)
8Ko nā tino e hili te popoto o te kau faigāluega, te na kilātou faia te Falekie Tapu. Na fai i ni kiepupuni e hefulu e fai i te lino e hili te lelei, ma lalaga i nā vulu lanu moana, violē ma te kukula, ma hui ki luga ni ata o ni kēlupi. 9Na tutuha te loloa o nā kiepupuni, e hefulu lua mita, ma lua mita te lauefa. 10Na hui fakatahi e kilātou ni kiepupuni e lima ke fai ai he vaegā kiepupuni e fokotahi, ma na vēnā foki ona kilātou faia ki iētahi kiepupuni e lima. 11Na fai ai e kilātou ni mama i te kie lanu moana ki te pito lele ki fafo o nā vaegā kiepupuni takitahi iēnei e lua. 12Na fakapipiki e kilātou ni mama e lima hefulu ki te vaegā kiepupuni muamua, ma hētahi lima hefulu e fakafehāgai ki ei, i te vaegā kiepupuni tona lua. 13Na fai e kilātou ni fakakāfilo aulo e lima hefulu ke hohoko ai nā vaegā kiepupuni e lua ke kavea ma kie e fokotahi. 14Oi na fai ai e kilātou he kietatao mo te Falekie Tapu i ni kiepupuni e hefulu tahi, e lalaga i nā lāulu oti. 15Na fua tutuha uma e kilātou nā kiepupuni, e hefulu tolu mita te loloa kae lua mita te lauefa. 16Na hui fakatahi e kilātou nā kiepupuni e lima ke kavea ma vaegā kiepupuni e fokotahi, ma tētahi ono ke fai ma hētahi vaegā kiepupuni. 17Na fakamau e kilātou ni mama kie e lima hefulu ki te pito o te kiepupuni e pito lele ki fafo o te vaegā kiepupuni muamua, ma ni mama kie e lima hefulu ki te pito o te kiepupuni i te pito lele ki fafo o te vaegā kiepupuni tona lua. 18Na fai e kilātou ni fakakāfilo apamemea e lima hefulu ke hohoko ai nā vaegā kiepupuni e lua, ke kavea ai ma kietatao e fokotahi. 19Na fai e kilātou ni iētahi kietatao e lua, ko tētahi na fai i te paku māmoe poa kua fakatogo kukula, ma tētahi na fai i te pakumanu e hili te lelei, ke fakaaogā ma kietatao e pito ki fafo.
20Na kilātou faia ni āuivi fakatutū ki luga i te lākau ko te hitahi mo te Falekie. 21Ko te āuivi e fokotahi nae taki fa mita te loa, ma taki ono hefulu ono henitimita te lauefa, 22ma ni pine taki lua i nā pito e fakatutuha, ke mafai ai nā āuivi ke hohoko fakatahi. Ko nā āuivi uma lele nae iei o lātou pine vēnei. 23Na fau e kilātou ni āuivi e lua hefulu mo te itū ki haute 24ma fai ni tūlaga hiliva e fa hefulu ki lalo o nā āuivi, e lua ia tūlaga i lalo o te āuivi e fokotahi mo ona pine e lua. 25Na fau e kilātou ni āuivi e lua hefulu mo te itū ki mātū o te Falekie 26ma ni tūlaga hiliva e fa hefulu, e lua i lalo o te āuivi e fokotahi. 27Mo tua o te Falekie i te itū ki hihifo, na fau e kilātou ni āuivi e ono, 28ma ni āuivi e lua mo nā tulimanu o te Falekie i te itū ki tua. 29Ko nā āuivi tulimanu iēnei na fakapipiki i te pito ki lalo ma hohoko i te fano lele ki luga. Ko nā āuivi e lua i nā tulimanu e lua na tutuha lava te fauga. 30Oi nae valu la ia āuivi ma nā tūlaga hiliva e hefulu ono, e lua i lalo o te āuivi e fokotahi.
31Na fai e kilātou ni lākau fālava e hefulu lima i te lākau ko te hitahi, e lima mo nā āuivi i tētahi itū o te Falekie, 32e lima mo nā āuivi i tētahi itū, ma e lima mo nā āuivi i te itū ki hihifo, i tua. 33Ko te lākau fālava o lototonu na fakapipiki e tuha ko te āfa i te fano ki luga o nā āuivi, ma na fanatu mai tētahi itū o te Falekie ki tētahi. 34Na tatao e kilātou nā āuivi i te aulo ma fakapipiki ki ei ni mama aulo ke fakamau ai nā lākau fālava, iēia na tatao foki i te aulo.
35Na fai ai e kilātou he kiepupuni i te lino e hili te lelei, na lalaga i te vulu lanu moana, violē ma te kukula, ma hui ai ki ei nā ata o nā kēlupi. 36Na fai e kilātou ni pou e fa i te lākau ko te hitahi ke tāofi ai ki luga te kiepupuni, ma tatao uma ai i te aulo, ma fakapipiki ki ei ni fakakāfilo aulo. Oi na fai ai e kilātou ni tūlaga hiliva e fa ke tāofia nā pou. 37Mo te fāitotoka o te Falekie, na fai e kilātou he kiepupuni e kehe te itūkāiga, i te lino e hili te lelei, ma e lalaga i te vulu lanu moana, violē, ma te kukula, ma teuteu i ni mea na hui ki ei ni ata. 38Mo te kiepupuni tēnei, na fai e kilātou ni pou e lima ma fakapipiki ki ei ni fakakāfilo; na tatao nā ulupou ma o lātou kaho i te aulo, ma fai nā tūlaga apamemea mo nā pou.
Currently Selected:
Ehoto 36: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
