Ehoto 25
25
Nā Tāulaga mo te Falekie Tapu
(Eho 35.4-9)
1Kua vāgana mai te Aliki kia Mohe, 2“Lea ki nā tino Ihalaelu ke ofo mai he lātou meālofa kia te au. Talia ho he itūkāiga meālofa e fia ofo mai e he tino kia te au. 3Ko nā meālofa iēnei e tatau ke talia e koe mai ia te kilātou: ko te aulo, hiliva ma te apamemea; 4nā kie lino e hili te lelei, nā vulu lanu moana, violē, ma kukula; nā kofu e fai i nā lāulu oti; 5nā paku māmoe poa kua fakatogo kukula; nā pakumanu e hili te lelei;#25.5 E hē manino te uiga i te tuhituhiga Epelu nā laupapa hitahi; 6nā lolo mo nā lāmepa; nā mea fakamanogi meakai mo nā lolo fakauku, ma mo nā meamanogi; 7nā fatu hatonike ma iētahi fatu tāua, ke fakapipiki ki te efota#25.7 efota I te lahiga lava o nā taimi e tākua ai te efota, e fakatatau ki he itūkāiga lākei, e tāi vēia ko he peleue e gata i nā taugātiti te loloa ki lalo. Nae hui i he kie taugatā ma felanulanuaki ma nae fakapipiki ki ei he taga nae i loto ai te Ulima ma te Tumima, ni mea e lua nae fakaaogā ke hakili ai te finagalo o te Atua o te Ulu Ohitāulaga ma vēnā ki tona punifatafata. 8Ma e tatau ke fau e kilātou he nofoaga paia mo oku, kae ke nofo ai au i te mea e iei ai kilātou. 9Fau te Falekie Tapu#25.9 Pe Tapeneko ma nā meāfale uma lele, fua fakatatau ki te fakatātiaga ka kō fakailoa atua kia te koutou.
Te Puha o te Feagaiga
(Eho 37.1-9)
10“Lea ki nā tino ke fau he puha i te lākau ko te hitahi, e 110 henitimita te loa, e 66 henitimita te lauefa, ma 66 henitimita te maualuga.#25.10 Epelu 2.5 kūpita te loa, 1.5 kūpita te lauefa, ma 1.5 kūpita te maualuga 11Tatao ia loto ma fafo o te puha i te aulo mamā, ma fai he teuteu aulo fakatakamilo i nā itū uma. 12Fai ni mama aulo e fa ke hiki ai te puha, ma fakamau ki ona vae e fa, e taki lua i te itū. 13Fai ni amo ke hiki ai, i te lākau ko te hitahi ma tatao i te aulo, 14ma hulu ai ki loto o nā mama aulo i nā itū takitahi o te puha. 15Ko nā amo ka tuku lava i loto o nā mama o te puha, ma e hē toe unu kehea lele. 16Oi tuku ai ki loto o te puha nā fatupapa māfolafola ka kō fōkiatua kia te koe, e tuhi i luga nā fakatonuga.
17 #
Epe 9.5
“Fai he tāpuni#25.17 tāpuni Ko te igoa Epelu ko te kapoleti ma e manatu iētahi tino e fakagalo pe kave kehe ai nā agahala, ma ko tēia e tākua ai foki ko te nofoa o te alofa fakahao. Kikila foki ki nā fuaikupu 19, 20, 21, 22 i te aulo mamā, e 110 henitimita te loa, ma 66 henitimita te lauefa. 18Tuki i te aulo ni kēlupi e lua, 19e takitahi mo nā pito e lua o te tāpuni. Fai nā kēlupi ke kavea ko he vāega e tahi ma te tāpuni.#25.19 tāpuni kikila ki te 25.17 20Ko nā kēlupi e fakahaga tētahi ki tētahi i luga o te tāpuni,#25.20 tāpuni kikila ki te 25.17 ma o lā kapahau e tatala ke tatao uma ai te tāpuni. 21Oi tuku ai nā fatupapa māfolafola e lua ki loto o te puha, ma tuku ai ki luga te tāpuni.#25.21 tāpuni kikila ki te 25.17 22I kinā, ka feiloaki ai kitāua, ma mai luga o te tāpuni#25.22 tāpuni kikila ki te 25.17 i te vā o nā kēlupi, ka tuku atu ai e au kia te koe aku fakatonuga mo nā tino Ihalaelu.
Te Laulau mo te Falaoa e Ofo atu ki te Atua
(Eho 37.10-16)
23“Oi fau ai he laulau i te lākau ko te hitahi, e 88 henitimita te loa, e 44 henitimita te lauefa, ma 66 henitimita te maualuga. 24Oi tatao ai i te aulo mamā, ma fai he teuteu aulo fakatāmilo i nā pito. 25Fai he laupapa e fakatāmilo i nā pito o te laulau, e 75 milimita te lauefa, ma he teuteu aulo i nā pito. 26Fai ni mama aulo e fa ke hiki ai, oi tamau ai ki nā tulimanu e fa, e iei ai nā vae. 27Ko nā mama e hulu ki ei nā amo e hiki ai te laulau, e fakamau ki tafa o te laupapa e fakatāmilo i nā pito o te laulau. 28Fai nā amo i te lākau ko te hitahi ma tatao i te aulo. 29Fai ni peleti, ni ipu inu, ni hiā, ma ni pēhini ke fakaaogā mo nā tāulaga uaina. Ko nā mea uma iēnei, e fai i te aulo mamā. 30#Lev 24.5-8Ko te laulau e fakatū i mua o te Puha o te Feagaiga, ma ko luga o te laulau e tuku tūmau ai te falaoa paia e ofo mai kia te au.”
Te Tūgālāmepa
(Eho 37.17-24)
31“Fai he tūgālāmepa i te aulo mamā. Fai tona pogati ma ona lālā i te aulo mamā na tuki; ko ona tiale teuteu, fakatahi ma ona kafa ma ona lautiale, ka kavea ko he mea e fokotahi. 32E ono ia lālā ka hau mai ona itū, e taki tolu i te itū. 33Ko nā lālā takitahi e ono, ka taki tolu ona tiale teuteu e fakafōliga ki nā tiale o te haketi, fakatahi ai ma nā kafa ma nā lautiale. 34I te tino o te tūgālāmepa, e fa ia tiale teuteu e fakafōliga ki nā tiale o te haketi, vēnā ma nā kafa ma nā lautiale. 35I lalo ifo o nā lālā taki magalua e tolu, ka iei ai ni kafa e takitahi i nā itū e lua. 36Ko nā kafa, nā lālā, ma te tūlaga, e tatau ke tuki i te aulo mamā ke kavea ko he mea e fokotahi. 37Fai ni mōlī e fitu mo te tūgālāmepa, ma fakatūlaga ke huhulu āgai ki mua. 38Fai ni iofi tāmate mōlī ma o lātou apa e tuku ai, i te aulo mamā. 39Fakaaogā te aulo mamā e tuha ma te 35 kilokalama te mamafa, ke fai ai te tūgālāmepa ma nā mea uma iēnei e fakaaogā ki ei. 40#Gāl 7.44; Epe 8.5Tautuanā ko nā mea iēnei e fai fuafua ki te ata na kō fakaali atua kia te koe i luga o te mauga.
Currently Selected:
Ehoto 25: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
