Ehoto 24

Kua Fakamautū te Feagaiga

1Oi na vāgana mai ai te Aliki kia Mohe, “Hau ki luga o te mauga kia te au, ko koe ma Alona, ma Natapu, ma Apihu, ma ni toeaina e toka fitu hefulu o Ihalaelu; ma ka koi mamao atu koutou, ifo ki lalo oi tāpuaki mai kia te au. 2Ko koe oioti, kae e hēai hētahi o kilātou, e hau ke pili mai kia te au. Ko nā tino e fakahā ke ōake ki luga o te mauga.”

3Ma na fano ai ia Mohe oi fakailoa ki nā tino Ihalaelu, nā fakatonuga ma nā folahaga a te Aliki, ma na tali fakatahi vē mai ai te nuku kātoa, “Ko nā kupu uma kua vāgana mai ai te Aliki, ka vēnā lava ona kimātou faia.” 4Ma na tuhi ai ki lalo e Mohe nā kupu uma a te Aliki. I te tāeaopō o te aho na hohoko ai, na fau ai e Mohe he fata faitāulaga i tafa o te mauga, ma na fakatutū ai foki ma ni fatu māululuga e hefulu lua, e fokotahi mo nā puikāiga tau toka tahi uma o Ihalaelu. 5Oi na filifili ai e ia ni tāulelea talavou o Ihalaelu, ma na ofo atu ai e kilātou nā tāulaga mū ki te Aliki, ma vēnā oi ofo atu e kilātou ni pōvi poa ma tāulaga mo te māfuta fakatahi. 6Na kave e Mohe tētahi āfa o te toto o nā manu ma tuku ki loto o ni pēhini, ma ko tētahi āfa na lūlū ma liaki e ia ki te fata faitāulaga. 7Oi na tago ai ki te tuhi o te feagaiga, tēia na ia tuhia ki loto nā kupu a te Aliki, ma faitau leo lahi ki tagata. Ma na toe lea fakatahi vē mai ai ia tagata, “Ko nā mea uma kua vāgana ai te Aliki, ka kimātou faia ma ka uhitaki kimātou ki ei.”

8 # Mat 26.28; Mlk 14.24; Luk 22.20; 1 Kol 11.25; Epe 9.19-20; 10.29 Oi na kave ai e Mohe te toto i loto o nā pēhini, kua lūlū ma liaki atu ki nā tino ma lea vē atu, “Ko te toto tēnei e fakamautū ai te feagaiga na fai e te Aliki ma koutou, i te tuku atuga e ia o nā fakatonuga uma iēnei kia te koutou.”

9Ma na ōake ai ia Mohe ma Alona, ma Natapu, ma Apihu, ma nā toeaina e toka fitu hefulu o Ihalaelu ki luga o te mauga, 10ma na kitea ai e kilātou te Atua o Ihalaelu. I lalo o ona vae nae vē e fola i ni fatu hafilo, e lanu moana e vē ko te lagi te mamā. 11Ma e ui lava ko nā takitaki iēnei o Ihalaelu na kikila ki te Atua, kae e hēki fakatāugāgia e ia kilātou; na kitea e kilātou te Atua, ma na kakai ai kilātou ma inu.

Ko Mohe i te Mauga ko Hinai

12Ma na vāgana mai ai te Aliki kia Mohe, “Hau ki luga o te mauga kia te au ma fakatali i kinā; ma ka fōki atu e au kia te koe nā fatupapa māfolafola kua kō tuhia ki luga te tūlāfono ma nā fakatonuga, mo te takitakiga o tagata.” 13Kua hāuni ia Mohe ma Iohua tona fehoahoani, ma na kāmata ai oi fano ia Mohe ki luga o te mauga o te Atua. 14Ma na lea vē atu ai ia Mohe ki nā takitaki o Ihalaelu, “Fakatali i kinei i te tātou api ke toe liliu ifo kimāua. Ko Alona ma Hulo e i kinei ma koutou; kāfai e iei ni fekehekeheakiga i te vā o ni tino, olo ki ei ke kilā faia he fakaikuga.”

15Oi na fano ai ia Mohe ki luga o te Mauga ko Hinai, ma kua tatao kātoa te mauga i he ao. 16-17Ko te huhulu pupula o te fakatahi mai o te Aliki, kua fanaifo ki lalo ki te Mauga ko Hinai. Ki nā tino Ihalaelu, ko te huhulu pupula kua vē ai ko he afi e hahao i te tumutumu o te mauga. Na tatao e te ao te mauga mo nā aho e ono, ma i te fitu o aho, na kalaga mai ai te Aliki kia Mohe mai loto o te ao. 18#Teu 9.9Kua fanake ia Mohe ki luga o te mauga ki loto o te ao. Ma i kinā, na nofo ai mo nā ao ma nā pō e fa hefulu.

Currently Selected:

Ehoto 24: TOKU

Highlight

Copy

Compare