Ehoto 1
1
Nā Fakahāuāga ki Tagata Ihalaelu i Aikupito
1Ko nā igoa iēnei o nā ataliki o Iakopo na olo ma ia ki Aikupito. Na fano lava te tino ma kave tona kaukāiga.#Ken 46.8-27; Nūm 26.4-50 2Ko Leupena, ko Himeona, ko Levi, ko Iuta, 3ko Ihakala, ko Hepulona, ko Peniamina, 4ko Tanu, ko Nafatali, ko Kato ma Ahela. 5Ko te aofaki kātoa o nā tino na tupuga mai ia Iakopo, e toka 70.#1.5 E fokotahi te fakaliliuga anamua e leamai: 75 (kikila ki te Gāl 7.14) Ko tētahi ona ataliki ko Iohefa, kua i Aikupito ai.#Gāl 7.14-18 6Kua teka atu ni tauhaga, oi na oti ai ia Iohefa, vēnā nā uho o ia ma nā tino uma o te augā tupulaga tēnā, 7kae ko nā lāpuna o kilātou, nā tino Ihalaelu, kua tuputupu pea lava te tokalahi ma kua fakatumulia ai ia Aikupito.#Gāl 7.17
8Oi na tū mai ai hētahi tupu fōu o Aikupito ko hēki ia iloa ia Iohefa.#Gāl 7.18 9Kua lea vē atu ki ona tagata Aikupito, “Kikila, ko nā tino Ihalaelu e aloā kua tokalahi, ma ka hili lele atu to lātou mālohi i lo kitātou. 10Ōmamai ke fai he tātou peleni, kae ke nahe tupu ai pea to lātou tokalahi. Kāfai e hē faia e kitātou kae tupu he taua, e i nā ka olo nei oi kau ki tētahi itū ke fakahaga tau mai ai kia te kitātou, ma hōhola kehe ai lava mai to tātou fenua.”#Gāl 7.19 11Ko te mea ia na tuku ai e kilātou ni pule gāluega fakahāuā, ke fakafaigāluega e kilātou ia tagata Ihalaelu i ni gāluega mamafa lele; ma na fakatū ai e kilātou nā kakai ko Pitoma ma Lamehe, ke fai ma kakai e teu ai nā koloa a te tupu ko Falao. 12Kae ko te lahi o nā faiga fakahāuā e fai ki tagata Ihalaelu, ko te lahi foki ia o to lātou fanafanau, ma ātili ai to lātou halalau ki itū uma o te fenua. Ma na lagona ai e tagata Aikupito te mātataku i nā tino Ihalaelu. 13Oi na fakaātili ai lava te fakamamafa e nā tino Aikupito o nā gāluega a tagata Ihalaelu, 14ma fakapologa o lātou olaga i te faiga o nā piliki ma nā palu e fakapipiki ai, ma ho he itūkāiga gāluega i nā fātoaga; ma na fakaātili lele ai te mamafa o a lātou gāluega nae fakatonu ke fai.
15Oi na fakatonu ai vēnei e te tupu o Aikupito ia Hipala ma Pua, nā fakatōhaga Epelu, 16“Kāfai e fakafānau e koulua nā fafine Epelu, tāmate te pepe kāfai he tama, kae fakaola kāfai he teine.” 17Kae ko nā fafine iēnei nae mātataku i te Atua, ma na hēki uhitaki ai kilāua ki te fakatonuga a te tupu o Aikupito, kae kua tuku lava nā pepe tama ke ola. 18Oi na fekau ai e te tupu o Aikupito nā fafine, ma fehili vē atu ki ei, “Heā te kua fai ai e koulua te mea tēnei? Heā te kua tuku ai e koulua nā pepe tama ke ola?” 19Na tali mai kilāua ki ei, “Ko nā fafine Epelu e hē vē ko nā fafine Aikupito; e fānanau gōfie, ma ko a lātou pepe e fānanau mai ka ko hēki pa atu he tino o kimāua ki ei.” 20-21Ona ko nā fakatōhaga nae mātataku i te Atua, na agalelei ai te Atua kia te kilāua, ma na mafai ai ke maua ni a lāua lava fānau. Ma na fakaauau ai lava te tupu ola o tagata Ihalaelu ma te uiga kehe o te tokalahi. 22#Gāl 7.19Oi na fai ai loa te fakatonuga a Falao ki nā tino uma o Aikupito, e vēnei, “Ho he pepe tama e fānau mai e he fafine Epelu, kave oi togi ki loto o te Vaitafe ko te Naila, kae tau ko nā pepe teine ke fakaola.”
Currently Selected:
Ehoto 1: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
