Gāluega 7
7
Ko te Lāuga a Hetefano
1Oi na fehili vē atu ai te Ulu Ohitāulaga kia Hetefano, “E hako nā mōliaga iēnei?”
2Na tali mai ia Hetefano, “Oku uho ma oku tamana, fakalogo mai ake! Ka ko hēki fano to tātou tupuna ko Apelaamo oi nofo i Halana, na fakailoa kia te ia te Atua mamalu, i Mehopotamia #Ken 12.1 3ma na vāgana vē atu ai kia te ia, ‘Tuku tō kāiga ma tō nuku, kae fano ki te fenua ka kō fakahino atua kia te koe.’ 4Ma na tuku ai loa e ia tona fenua kae kua fano ki Halana. I te otiga o tona tamana, oi na uga mai ai e te Atua ki te fenua tēnei e nonofo ai nei koutou. #Ken 11.31; 12.4 5E hēki fōkia e te Atua mo Apelaamo he vāega o te fenua i te taimi tēnā, ke pa lava ki he hikuea mita o te kelekele e hēki fōkia ki ei; kae na folafola e te Atua ka ia fōki akea te fenua mo ia ma ana fānau. I te taimi na fai ai te folafolaga tēnei a te Atua, ko hēki iei ai he fānau ma Apelaamo. #Ken 12.7; 13.15; 15.18; 17.8 6Ko tēnei te vāgana a te Atua kia Apelaamo, ‘Ko au fānau ka nonofo i he fenua kehe, ka fai kilātou ma pologa ma fakahāuāgia i kinā mo ni tauhaga e fa helau.#Ken 15.13-14 7Kae ka fakamahino e au nā tino ka kaukauna kilātou ki ei, ma i he taimi mulimuli, ka olo kehe kilātou mai te fenua tēnā, ma tāpuaki mai kia te au i kinei.’ #Eho 3.12 8Oi na fai ai e te Atua he māliliega ma Apelaamo e uiga ki te hāuniga o te pelitome. Ma na pelitome ai e Apelaamo ia Ihaako i te kātoaga o te vaiaho talu te fānau mai; na pelitome e Ihaako tona ataliki ko Iakopo, ma na pelitome e Iakopo ona ataliki e toka hefulu lua, ko nā tupuna takutakua iēnā o kitātou. #Ken 17.10-14; 21.2-4; 25.26; 29.31—35.18
9“Na maua nā ataliki o Iakopo i te lotokino ki to lātou uho ko Iohefa, oi na fakatau atu ai e kilātou ke fai ma pologa i Aikupito. Kae nae fakatahi pea lava te Atua ma Iohefa, #Ken 37.11, 28; 39.2, 21 10ma na ia fakahaoa ia Iohefa mai nā puapuagā uma na pa ki ei. I nā taimi nae fano ai ia Iohefa ki mua o Falao, te tupu o Aikupito, na tuku e te Atua ki ei nā uiga lelei ma te poto, ma na tōfia ai ia e te tupu ke kavea ma kōvana o Aikupito, ma ke pule i nā meatōtino a te kāiga o te tupu. #Ken 41.39-41 11Oi na tupu ai he oge i Aikupito kātoa vēnā ma Kanana, ma na puapuagātia lahi lele ai ia tagata. Na hē maua e o tātou tupuna ni meakai, #Ken 42.1-2 12ma i te lagonaga e Iakopo nae iei nā haito i Aikupito, oi na uga ai e ia ona ataliki, o tātou tupuna, i te lātou malaga muamua ki Aikupito. 13I te lua o a lātou malaga ki Aikupito, na fakailoa ai ia Iohefa ki ona uho, ma na mālamalama ai foki te tupu o Aikupito e uiga ki te kāiga o Iohefa. #Ken 45.1, 16 14Oi na kave ai te faifekau a Iohefa ki tona tamana ko Iakopo ma te kau kāiga uma e toka fitu hefulu ma te lima, ke o ake ki Aikupito.#Ken 45.9-10, 17-18; Ken 46.27 (LXX) 15Oi fano ai ia Iakopo ki Aikupito ma ko kinā na oti ai vēnā ma ona ataliki.#Ken 46.1-7; 49.33 16Na kave o lātou tino ki Hukema ma tanu i te tugamau na fakatau e Apelaamo mai nā ataliki o Hemolo i Hukema.#Ken 23.3-16; 33.19; 50.7-13; Ioh 24.32
17“I te taimi kua pili ki nā aho e fakatāunuku ai e te Atua tana folafolaga na fai kia Apelaamo, ko te nūmela o tagata o kitātou i Aikupito nae tuputupu lava ma tokalahi lele.#Eho 1.7-8 18Mulimuli ake, na nofo mai ai hētahi tupu nae hē ia iloa ia Iohefa, ma kāmata ai oi pule i Aikupito. 19Na fakahehē e ia o tātou tupuna ma nae fakahāuā ki ei, ma fakamālohia kilātou ke kave a lātou pepe ma tuku i fafo, kae ke feoti ai. #Eho 1.10-11, 22 20Ko te vāitaimi tēnei na fānau mai ai ia Mohe, he tamaiti tino gali. Nae tauhi fakalelei i tona kāiga mo ni māhina e tolu,#Eho 2.2 21ma i te tukuga ki fafo mai tona kāiga, na kave ai e te afafine o te tupu ma fai ma ana tama puke.#Eho 2.3-10 22Na akoako ia Mohe i te poto uma o tagata Aikupito, ma na kavea ai ma tagata takutakua i tona poto i nā mea e tautala ai, ma nā mea a ia e fai.
23“I te kātoaga o te fa hefulu tauhaga o Mohe, na oho ake ai he manatu i tona loto ke kikila pe vēhea nā faiga e fai ki ona tagata, nā tino Ihalaelu.#Eho 2.11-15 24Na ia kitea ai hētahi o kilātou nae kini e he tino Aikupito, oi na fano ai oi fehoahoani ki ei; ma na tāmate ai e ia te tino Aikupito ke taui ai mo tana mea na fai. 25(Na vēake ia Mohe ko ona tagata Ihalaelu nae mālamalama ko ia e fakaaogā e te Atua ke fakahaolotoa kilātou, kae na hēki mālamalama kilātou.) 26I te aho na hohoko ai, na ia kitea ni tino Ihalaelu e toka lua nae miha, oi na taumafai ai ke ia fakaleleia te vā o te toka lua. Na lea vē atu ai ki ei, ‘Nā tāulelea, kikila, ko koulua ni Ihalaelu uma; heā la te miha ai koulua?’ 27Kae na lea vē mai te tino nae ia kinia tētahi tino kia Mohe, ‘Na hei tōfia koe ke fai ma pule ma ke fakamahinoa kimātou? 28Ko koe e fofou ke tāmate au e koe e vē ko te tāmatega e koe o te tino Aikupito ananafi?’ 29I te lagona atuga e Mohe o te mea tēnei, oi na hola kehe ai loa mai Aikupito ma na fano ai kua nofo i te fenua ko Mitiana. I kinā, na kavea ai ia ma tamana ki ni ataliki e toka lua.#Eho 18.3-4
30“Kua teka atu ni tauhaga e fa hefulu, oi na fakaali ai he āgelu kia Mohe i loto o he lākau tālatala e mumū i te toafa, i tafa o te Mauga ko Hinai.#Eho 3.1-10 31Na ofo lele ia Mohe i te mea na kikila ia ki ei, ma na hōhō atu ai ki tafa o te lākau e mumū ke kikila tonu ki ei. Kae na ia lagona te leo o te Aliki e lea vē mai: 32‘Ko au ko te Atua o nā tupuna o koe, te Atua o Apelaamo, o Ihaako, ma Iakopo.’ Na tete ia Mohe i te mataku, ma na hēki fofou ke kikila ki ei. 33Oi na vāgana mai ai te Aliki kia te ia, ‘Kave kehe nā taka o koe, auā ko te mea e tū ai koe ko he kelekele e paia. 34Kua kō kitea nā fakahāuāga kua maua ai oku tagata i Aikupito. Kua kō lagona to lātou ōi tīgā, ma ko au kua fanaifo ke fakahaoloto kilātou. Hau la, ko koe ka uga e au ki Aikupito.’
35“Ko Mohe tēnei te na teteke ki ei ona tagata Ihalaelu, i te leaga vē o kilātou ki ei, ‘Na hei tōfia koe ke fai ma pule ma ke fakamahinoa kimātou?’ Ko ia te na uga e te Atua ke pule ki ona tagata, ma ke fakahaoloto kilātou i te fehoahoani a te āgelu na fakaali ki ei i loto o te lākau tālatala na mumū.#Eho 2.14 36Na ia takitakia ona tagata ki fafo mai Aikupito, ma na faia nā vāvega ma nā mea ofōfogia i Aikupito ma te Tai Kukula, ma vēnā foki i te vao i nā tauhaga e fa hefulu.#Eho 7.5; 14.21; Nūm 14.33 37Ko Mohe te tino na lea vē ki tagata Ihalaelu, ‘Ka uga mai e te Atua he pelofeta, e vē lava ona ia uga maia au,#7.37 e vē lava ona ia uga maia au pe e vē ko au he tino lava mai outou tagata.’#Teu 18.15, 18 38Ko ia te nae iei fakatahi ma tagata Ihalaelu i te māopōpoga i te vao; nae iei fakatahi ma o tātou tupuna, ma te āgelu na tautala ki ei i luga o te Mauga ko Hinai; ma na tuku ki ei te fekau a te Atua e ola pea lava, ke fakapa mai kia te kitātou.#Eho 19.1—20.17; Teu 5.1-33
39“Kae na mumuhu o tātou tupuna ke uhitaki kia te ia; na hēki fia fakalogo kilātou kia te ia, ma i o lātou loto, na fofou lele ko kilātou ke toe foki ki Aikupito. 40Oi na lea vē atu ai kilātou kia Alona, ‘Ta ni a tātou tupua ke fai ma atua ke takitakia kitātou. Kua hē kimātou iloa pe heā te kua tupu kia Mohe, tē na ia kaumaia kitātou mai Aikupito’#Eho 32.1 41Ko te taimi tēnā na kilātou faia ai he tupua i te fakatuha o he punuāpōvi poa, ma na ofo atu ai ki ei a lātou tāulaga, ma fai te lātou kaiga ke fakaali ai to lātou fiafia ki nā gāluega a o lātou lima. #Eho 32.2-6 42Oi na liliu kehe ai te Atua mai ia te kilātou, ma na tuku ai ke tāpuaki kilātou ki nā fetū o te lagi, e vē ko te kupu i te tuhi a te kau pelofeta, #Amo 5.25-27 (LXX)
‘Tagata Ihalaelu e! Nae hē mo oku
nae koutou tāmatea ai nā manuvaefa
ke fai ma tāulaga i nā tauhaga e fa hefulu i te vao.
43Ko te falekie o te atua ko Moleka
te nae tauhiki e koutou,
ma te fakatuha o te fetū o te koutou atua ko Laifana,#7.43 Moleka… Laifana Ko Moleka ko hētahi o nā atua o nā tino Kanana. Ko Laifana he atua Aikupito nae tākua e pule i hētahi o nā fetū
ko nā tupua iēnā na gaohi e koutou
ke tāpuaki koutou ki ei.
Ko te mea ia ka kō kave kehea ai koutou,
ma kave oi fakaaunukua i tala atu o Papelona.’
44“Nae i nā tupuna o kitātou te Falekie Tapu o te Atua, ka ko i te vao ai kilātou. Na fau lava e vē ko te mea na vāgana ai te Atua kia Mohe, e tuha ai ma te ata na fakahino kia te ia.#Eho 25.9, 40 45I he taimi mulimuli ake, ko nā tupuna o kitātou, iēia na tuku ki ei te falekie e o lātou tamana, na olo ma kave e kilātou te falekie i te ologa ma Iohua oi puke nā fenua na tuli kehe ai e te Atua ia tagata e o kilātou. Ma na tuku ai lava i kinā ke pa ki nā aho o Tavita.#Ioh 3.14-17 46Ko Tavita na alofagia e te Atua, ma na fakatagi ki te Atua ke fakataga ake ia ke faua he mea ke nofo ai te Atua o Iakopo.#7.46 te Atua o Iakopo ko iētahi tuhituhiga e lea mai nā tino Ihalaelu #2 Ham 7.1-16; 1 NT 17.1-14 47Kae ko Holomona te na ia faua te fale mo te Atua.#1 Tup 6.1-38; 2 NT 3.1-17
48“Kae ko te Atua Hilihilikehe, e hē nofo i ni fale e fau i lima o tagata; e vē ko te lea a te pelofeta:
49‘Ko te lagi ko toku nofoāliki,#Iha 66.1-2
kua vāgana ai te Aliki,
ma ko te lalolagi e mapu ki luga oku vae.
He fale vēhea la te fau e koutou mo oku?
Tēfea te nofoaga e nofo ai au?
50E hēki kō faia nei nā mea uma iēnei?’
51“Kai koutou te loto makaka!” Na toe lea vē atu ia Hetefano, “Kai te fakapaupau lele o nā loto o koutou; te taliga tutuli lele o koutou ki te fekau a te Atua! Ko koutou e vē lava ko nā tupuna o koutou: ko koutou foki e teteke pea lava ki te Agaga Paia.#Iha 63.10 52Nae iei nei he pelofeta na hēki fakahāuā ki ei nā tupuna o koutou? Na tāmate e kilātou nā kavefekau a te Atua, iēia na kilātou folafola maia i nā aho kua loa, te haele mai o tana Kaukauna āmiotonu. Kae nei, kua fakalata ma tāmate e koutou. 53Ko koutou iēnā te na tuku atu ki ei nā Tūlāfono a te Atua iēia na tukulima ifo e nā āgelu—kae kua hē uhitaki koutou ki ei!”
Te Fetogiga o Hetefano
54Ka koi fakalogologo te Taupulega kia Hetefano, kae kua kāmata oi fēkakai lahi ma katigū o lātou nifo. 55Ka ko Hetefano kua fakatumulia i te Agaga Paia; na kikila ake ia ki te lagi ma na ia kitea atu te huhulu pupula o te Atua, ma Iehu nae tū i tona itū taumatau. 56Na lea vē atu ai ia Hetefano, “Kikila, e kitea atu e au te lagi e māvā, ma te Ataliki o te Tagata e tū i te itū taumatau o te Atua!”
57Ma na taukekē ai nā tino o te Taupulega ma pupuni o lātou taliga i o lātou lima. Oi na taufai tūtaoho fakatahi atu ai kilātou, 58kua tataki ia Hetefano ki fafo o te kakai, ma na fetogi ai i nā fatu. Ko nā tino molimau na tuku o lātou kofutatao ke kikila e he taulealea nae igoa kia Haulo. 59Ka koi fetogi e kilātou ia Hetefano, kae na fai te tatalo a Hetefano, “Iehu te Aliki, talia mai kō toku agaga!” 60Oi na tōtuli ai ki lalo ma kalaga leo lahi lele vē, “Te Aliki! Nahe faitaua te mea tēnei ko he agahala a kilātou!” Na lea vēnei atu ia, ma na oti ai loa.
Currently Selected:
Gāluega 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust