Gāluega 6
6
Ko te Toka Fitu na Fehoahoani ki te kau Apohitolo
1I he taimi mulimuli ake, kua tuputupu pea lava te nūmela o nā tino kua talitonu kia Iehu, na tupu ai he fekehekeheakiga i te vā o nā tino Iutaia e tautatala i te gagana Eleni ma nā tino Iutaia lava nae nonofo i kinā. Nae lea nā tino Iutaia e tautatala i te gagana Eleni, ko nā fafine o kilātou kua feoti a lātou āvaga, e hē maua ni o lātou vāega i nā tupe e fakahoahoa i nā aho takitahi. 2Oi na fakamāopōpo mai ai e te kau apohitolo e toka hefulu lua, nā tino uma lele kua talitonu ma lea vē atu ki ei, “E hē he mea tatau ke tuku e kimātou te tālakiga o te kupu a te Atua, kae ke kikila e kimātou te mea tau tupe. 3Ko te mea ia te kau uho, filifili mai kō ni tino o koutou e toka fitu ke kilātou faia te gāluega tēnei. Ni tino e fakamoemoegia ma e iloa e tagata kua fakatumulia kilātou i te Agaga Paia ma i te poto. 4Kae ke tukutahi lava o mātou taimi ki te tatalo ma te tālakiga o te kupu a te Atua.”
5Na fiafia uma lele te fakapotopotoga ki te mea tēnei kua lea ake ai te kau apohitolo; oi na filifili ai e kilātou ia Hetefano, he tino kua fakatumulia i te fakatuatua ma te Agaga Paia, vēnā ma Filipo, ko Pelokolona, ko Nikanola, ko Timono, ko Pamena, ma Nikolao, he tagata nukukehe mai Anitioka na liliu ki te tāpuakiga Iutaia. 6Kua tuku atu kilātou iēnei e te fakapotopotoga ki te kau apohitolo, oi na tatalo ai te kau apohitolo ma fakaeke atu ki ei o lātou lima.
7Ma ko te kupu a te Atua na halalau pea lava. Kua tuputupu pea lava te nūmela o tagata kua talitonu kia Iehu i Ieluhalema; ma e tokalahi nā ohitāulaga na kilātou taliagia te Tala Lelei.
Kua Puke ia Hetefano e nā Takitaki Iutaia
8Ko Hetefano ko he tino nae lahi lele tona fakatuatua, ma nae ia te ia foki te mana ke fai ai nā vāvega uiga kehe ma nā mea ofōfogia, i mua o tagata. 9Kae nae teteke ki ei ni tāulelea mai te hūnako o Tagata kua Fakahaoloto#6.9 Tagata kua Fakahaoloto Ko nā tino iēnei ni tino Iutaia nae fai ma pologa kae na toe fakahaoloto (e vē ona fakaigoa ai), ma e aofia ai nā tino Iutaia mai Kulene ma Alehanalia. Ko kilātou iēnei fakatahi ma iētahi tino Iutaia mai nā kogāfenua o Kilikia ma Ahia, kua kāmata oi fai fīnauga ma Hetefano. 10Kae na tuku atu e te Agaga o te Atua te poto kia Hetefano, ma nae hē mautali ai kilātou kia te ia. 11Ko te mea ia na kilātou fakaoleolea ai ni tāulelea i ni tupe ke fai ni a lātou tala vēia, “Na lagona e kimātou ia Hetefano e fai kupu fāifai kia Mohe ma te Atua!” 12Ko te fakakupuga tēnei na tīgā ai ia loto o tagata, nā toeaina ma nā faiākoga o te Tūlāfono. Ma na puke ai e kilātou ia Hetefano ma kave ki mua o te Taupulega. 13Oi na kaumai ai e kilātou ni tāulelea ke molimau pepelo e uiga kia Hetefano. Na lea vē atu nā tāulelea, “Ko te tagata tēnei e teteke pea lava i ana kupu e tautala ai, ki te Mālumalu paia vēnā ma ki nā Tūlāfono a Mohe. 14Na kimātou lagona e lea ko te Iehu tēnei mai Nahaleta, ka talepe e ia ki lalo te Mālumalu, ma tahui na tu māhani uma na tuku mai e Mohe kia te kitātou!” 15Ko kilātou uma nae i loto o te fono nae kikila lava kia Hetefano, ma na kilātou kitea atu ai ko nā fōliga o ia kua vēia ni fōliga o he āgelu.
Bible Society New Zealand Charitable Trust