Gāluega 28
28
Ko te Mea na Tupu kia Paulo i Melite
1Kua i gāuta kimātou ma te haogalēmū, oi na kimātou iloa ai ko te igoa o te motu tēnei ko Melite. 2Na alofagia kimātou e tagata o te fenua. Na tafu e kilātou he afi oi na fakafeiloaki mai ai kia te kimātou uma, ona na kāmata kua ua ma mālūlū. 3Na ao mai e Paulo he fakaputuga mealākau ma i te tuku atuga e ia ki luga o te afi, kae na totolo mai ki fafo he gata mai loto o te fakaputuga mealākau ona ko te vevela ma kati tona lima, ma na mau ai lava te gata ki ei. 4Ma i te kitea atuga e nā tino o te fenua te gata nae tautau i te lima o Paulo, oi na lea vē ai tētahi ki tētahi, “Ko te tamāloa nei hōvē he tino tāmate tino, ma e ui na lāveakia ia mai te tai, kae ko te faimeatonu ka he ia fakahaoa tona ola.” 5Kae na lūlū e Paulo te gata ki luga o te afi, e aunoa ma he mea na tupu kia te ia. 6Na fakatalitali nā tino ke puputa tona tino pe pakū fakafuaheki ki lalo kua mate. Kae ina kua mataloa te fakatali o kilātou kae na hēki i ei he mea na tupu kia Paulo, oi na hui ai o lātou māfaufau ma lea vē, “Ko te tagata tēnei ko he atua!”
7Nae hē mamao ma kinā nā fenua o Popilio, te aliki hili o te motu. Na talia fiafia kimātou e ia, ma na tolu ia aho na nonofo ai kimātou i tona fale. 8Ko te tamana o Popilio nae takoto i te moega nae maua i te fiva ma te manava tatā. Oi na fano ai ia Paulo ki te potu nae iei ai, kua tatalo ma fakaeke atu ona lima ki luga o te tamāloa ma na fakamālōlō ai mai ona tauale. 9I te tupuga o te mea tēnā, oi na ōmamai ai nā tino tauale uma i te fenua, ma na fakamālōlō uma kilātou e Paulo. 10E lahi a mātou meālofa na kilātou fōki maia, ma i te taimi ka malaga kehe ai kimātou, na fakauta ake e kilātou ki luga o te vaka nā mea uma nae manakomia e kimātou mo te folauga.
Mai Melite ki Loma
11Na teka atu te tolu māhina talu te tukia o to mātou vaka, oi na folau ai loa kimātou i luga o he vaka mai Alehanalia nae igoa ko “Te Māhaga Atua”,#28.11 nae igoa ko “Te Māhaga Atua” Ātonu pe nae i te taumua o te vaka he fakatuha o ni atua e lua nae fakatalitali i te motu ke uma te tau mālūlū. 12Na taunuku kimātou ki Hulakuha, oi na nonofo ai kimātou i kinā i ni aho e tolu. 13Mai kinā na fakaauau ai te mātou folauga, ma na taunuku atu ai ki te kakai ko Lekiono. I te aho na hohoko ai ko te matagi nae agi mai i haute, ma na lua ia aho kae pa kimātou ki te taulaga ko Potioli. 14I kinā, na fetaui ai kimātou ma ni tino Kelihiano na lea mai ke nonofo kimātou ma kilātou i he vaiaho. Ma na olo ai loa lava kimātou ki Loma. 15Kua logotala te kau Kelihiano i Loma e uiga kia te kimātou, oi na ōmamai ai mai nā tamā kakai, ke pa lava ki nā tamā kakai nae tau mamao mālie kehe atu, e vē ko te Māketi o Apiuha ma nā Fale Talimālō e Tolu, ke feiloaki kimātou. I te kitea atuga e Paulo o nā tino iēnei, oi na fakafetai ai ki te Atua, ma na ia maua ai te lototele.
Kua Tālaki te Tala Lelei i Loma
16I te taunuku atuga o kimātou ki Loma, na fakataga ia Paulo ke nofo nā ko ia kae leoleo e he fitafita.
17Kua teka nā aho e tolu, oi na kalaga ai e Paulo he lātou fono ma nā takitaki Iutaia i Loma. I te māopōpo maiga, oi na lea vē atu ai ki ei, “Te kau uho, e ui lava e hēai haku mea na fai ke teteke ai ki o tātou tagata pe ki nā tu na kitātou maua mai o tātou tupuna, ko au na fai ma pāgotā i Ieluhalema, ma tukulima atu ki nā tino Loma. 18I na kua uma te hukehuke o oku, na fofou nā tino Loma ke tatala au ma fakahaoloto, auā kua kilātou iloa e hēai haku mea hehē na fai e tatau ai ke fakahala au i te oti. 19Kae i te tetekega o nā tino Iutaia ki te mea tēnei, na fai tēnā ma mea na fakatagi ai au ki te Kaihala, e ui lava e hēki iei he mōliaga na kō faia e uiga ki oku lava tagata.#Gāl 25.11 20Ko te mea ia kua lea atu ai au ko kitātou ke feiloaki ma talanoa. Ko te mea moni lava, ko au e noanoa vēnei i nā filifili ona ko te tino tēia e fakamoemoe ki ei ia tagata o Ihalaelu.”
21Oi na lea vē atu ai kilātou kia Paulo, “E hēki maua e kimātou ni tuhi mai Iutea e uiga kia te koe, ma e hēai foki he tino o nā tino o kitātou na ōmamai mai kinā, na hau ma he tala, pe he fakamatalaga e fakakino ai tō igoa. 22Kae ko kimātou e fia fakalogo atu ki nā manatu o koe, auā e iloa e kimātou ko nā tino i ho he koga lava, e teteke lele ki te fakalapotopotoga tēnā kua iei koe.”
23Oi na filifili ai e kilātou ma Paulo he aho ke feiloaki ai, ma na tokalahi lele nā tino na ōmamai i te aho tēnā, ki te mea nae nofo ai ia Paulo. Mai te tāeao ke pa ki afiafipō, nae fakamālamalama lava e Paulo kia te kilātou tana fekau e uiga ki te Mālō o te Atua, ma na taumafai ke ia fakamāonia kia te kilātou te tala e uiga kia Iehu, e ala i nā kupu nae ia hiki maia i te Tūlāfono a Mohe, ma nā tuhituhiga a te kau pelofeta. 24Nae iei nā tino na talitonu ki ana kupu, kae ko iētahi na hēki talitonu. 25Oi na fekehekeheaki ai lava kilātou ma takape ai, ka kua uma ai te lea vē atu o Paulo i te mea tēnei e fokotahi: “Kai te hako lele o te vāgana a te Agaga Paia ki nā tupuna o koutou, na kui mai i te pelofeta ko Ihaia! 26Na vāgana vē,
‘Fano oi lea ki nā tino iēnei:
Ka fakalogo ma fakalogo koutou,
kae hē mālamalama koutou;
ka kikila ma kikila koutou,
kae hē kitea e koutou;#Iha 6.9-10 (LXX)
27auā ko māfaufau o tagata e tuka,
ma kua poloka o lātou taliga
ma tapuni o lātou mata.
Moinei ake e kitea e o lātou mata,
ma lagona e o lātou taliga,
ma mālamalama o lātou māfaufau,
ma liliu mai kilātou kia te au,
ma e kō fakamālōlōa ai kilātou.’ ”
28Kua fakaiku te tautalaga a Paulo oi na lea vē atu ai: “E tatau la ke koutou iloagia, ko te fekau e uiga ki te fakaolataga a te Atua, kua kave ki nā tino nukukehe! Ka fakalogo kilātou ki ei!” 29#28.29 Ko iētahi tuhituhi paia e fakaopōpo ki ei te fuaikupu 29: Kua uma te lea atu o Paulo i te mea tēnei, oi na olo kehe ai nā tino Iutaia ma na tauaikupu ai lava kilātou
30E lua tauhaga nae nofo totogi ai ia Paulo i he fale, ma nae talia fiafia e ia nā tino uma nae ōake oi āhi ake ia. 31Na folafola atu e ia te fekau e uiga ki te Mālō o te Atua, ma akoako atu ki tagata uma e uiga ki te Aliki ko Iehu Keliho, ma na hēki tāofia lele ia e he tino.
Bible Society New Zealand Charitable Trust