Gāluega 27
27
Kua Kave ia Paulo e nā Fitafita ki Loma
1I te tonuga ko kimātou ke folau ki Italia, oi na tuku atu ai e kilātou ia Paulo ma iētahi pāgotā ki te kikilaga a Iulio, he takitaki o he kautau Loma tokalahi nae fakaigoa “Ko te Kautau a te Kaihala.” 2Na hohopo kimātou ki he vaka na hau mai Atalamuteno kua hāuni ka malaga ki nā taulaga o te itūmālō o Ahia, ma na tukuvaka ai loa kimātou. Nae fakatahi kimātou ma Alihitako, he tino Maketonia e hau i Tehalonika. 3I te aho na hohoko ai na pa ai kimātou ki Haitonu. Ko Iulio nae agalelei kia Paulo, ma na fakataga e ia ia Paulo ke fano oi kikila ana uō, ke maua ai nā mea nae fia maua e ia ke ola ai. 4Na fakaauau te mātou malaga mai kinā, kae ona ko te matagi nae nofo mai i te muāvaka, ko te mea ia na kui ai kimātou i te itū ki lalo o te motu ko Kupulona. 5Na kui atu kimātou i gātai o Kilikia ma Pamefulia, oi na pa ai kimātou ki Mula i Lukia. 6Ko kinā na maua ai e te takitaki o te kautau a Loma he vaka mai Alehanalia ka folau ki Italia, oi na fakaeke ai loa kimātou ki luga.
7Mo ni nāi aho, ko to mātou vaka nae tele mālie lele ona ko te matagi nae nofo mai i te muāvaka, ma na taunuku atu ai kimātou ki gātai o te kakai ko Kinito. E hēki toe mafai kimātou ke hēleka ki mua i te itū tēnā ona ko te matagi, oi na fakaheke ifo ai kimātou ki te itū loki o te motu ko Kelete, ma na teka ai ia te kimātou te Matāfenua ko Halamone. 8Na tele fakatafatafa atu kimātou i te matāfaga, ma na faigatā lele foki te malaga, oi na pa atu ai kimātou ki he koga nae takua ko te Taulaga Loki, e hē mamao ma Lahaia.
9Na mataloa te taimi nae i kinā ai kimātou, ma na iku lava kua fakapokepoke ke fakaauau pea te malaga, ma kua teka foki te Aho o te Fakaleleiga.#27.9 Aho o te Fakaleleiga Ātonu e fakaaga ki te Aho Fakamanatu mo te Fakamāgaloga o nā Agahala. Ko te aho tēnei e fakamanatu i te fakaikuga o Hetema pe ko te kāmataga o Oketopa. Ko he taimi e māhani kino lahi ai te tau ma fakapokepoke ke faimalaga ai i te koga iēnei Oi na fautua vēnei atu ai ia Paulo kia te kilātou: 10“Tāulelea, ko au e kikila ko te tātou malaga e kāmata atu i kinei ka fakapokepoke lele; ka fakakino lahi te uta vēnā foki ma te vaka, ma ka iei foki ni tino e feoti.” 11Kae ko te takitaki o te kautau kua talitonu lava ki te kupu a te alikivaka ma te tino e o ia te vaka, kae kua hē fakalogo ki te mea na lea ai ia Paulo. 12Ko te taulaga tēnei nae hē lelei ke taula ai ni vaka i te taimi o te tau mālūlū; ko te tokalahiga la o nā tino nae fofou ke tuku o lātou vaka ki gātai, ma taumafai ke pa ki Foenike pe kāfai e mafai, ke fakatalitali i kinā ke uma te tau mālūlū. Ko Foenike ko he taulaga nae i Kelete, nae fakahaga ki haute-hihifo ma mātū-hihifo.
Ko te Afā i te Moana
13Na kāmata oi agiagi mālie mai te matagi i te itū ki haute, oi na vē ake ai nā tāulelea ka mafai ke fakatāunuku te lātou fuafuaga, ma na hihi ai te taula o te vaka ma fakatele fakatafatafa atu i gātai o Kelete. 14Kae e hēki mataloa kae pa ifo te matagi mālohi—te matagi nae takua ko te “Matagi o mātū-hahae”—na kikini ifo mai gāuta o Kelete. 15I te agiga o te matagi na matuā hē mafai lava te vaka ke fakatūtū ki te matagi, ma ko te mea ia na tīaki ai loa a mātou taumafaiga kae kua tuku te vaka ke kave e te matagi. 16Na maua e kimātou he tamā loki ina kua kui atu kimātou i haute o te tamā motu ko Kauta. I kinā, na mafai ke toe fakamau lelei te tulula o te vaka e kimātou, e ui lava nae fai hina faigatā. 17Na fufuti ake e kilātou te tulula ki luga o te vaka, ma na tamau ai i nā maea fakatakamilo i te vaka. Oi na tuku ai ki lalo te la o te vaka ka kua tuku te vaka ke pūhia i te matagi, ona nae mātataku nā te vaka e kake i te kauāfua oneone nae takua ko Huliti#27.17 Huliti ko te kauāfua tēnei e i gātai o Lipue 18Na agi pea lava te afā mālohi, ma i te aho na hohoko ai, na kāmata ai oi toli e kilātou ki te tai ni vāega o te uta a te vaka, 19ma i te aho alafaki, na toli e kilātou ki te tai iētahi kope o te vaka. 20E lahi nā aho na hē mafai ai ke kimātou kitea te lā, pe ko nā fetū, oi ko te matagi foki nae agi mālohi lele. Na iku lava kua hēai ho mātou fakamoemoe ko kimātou e lāveakia.
21Na mataloa te taimi na hēki mafai ai ke kakai nā tino nae i luga o te vaka, oi na tū ai ia Paulo i mua o kilātou ma lea vē atu, “Tāulelea, na tatau lava koutou ke fakalogo mai kia te au, i toku lea atuga ko kitātou nahe folau kehe mai i Kelete; moinei ake e hēai he mea e fokotahi e fakakino pe māumau. 22Ka ko au la e aioi atu nei, ko koutou ke loto tetele! E hēai he tino fokotahi o koutou e māumau tona ola; kae nā ko te vaka oioti te māumau. 23Auā ko anapō na hau ai he āgelu a te Atua, tē e a ia au, ma e tāpuaki au ki ei 24ma na lea vē mai, ‘Paulo, ia koe nā mataku! Ko koe e tatau ke tū i mua o te Kaihala. Ko te agalelei o te Atua kia te koe, kua fakahao ai ia ola o nā tino uma e faimalaga fakatahi koutou.’ 25Ko koutou la tāulelea, loto tetele! Auā ko au e talitonu ki te Atua, ma ka taunuku lava nā mea e vē ona fakailoa mai e ia kia te au. 26Kae ko te vaka o kitātou ka pūhia ma ake ki gāuta o he motu.”
27Kua pa ki tona hefulu fa o pō, ka koi fefaiaki lava kimātou e te afā i te Tai Metitelani. I te tau tūlua o te pō, oi na vē ai kua hāfia e te kauvaka ko kimātou kua pili ki he fenua. 28Oi na togi ai e kilātou he uka ma he mea mamafa e nonoa ki te pito, ma na kilātou iloa ai ko te loloto kua 40 mita; na mataloa mālie ake oi na toe fai ai foki e kilātou te mea tēnei, ma na iloa ai kua 30 mita te loloto. 29Na mātataku lele kilātou auā te vaka i na pūhia ki luga o ni papa, ko te mea ia na tukutuku ai e kilātou ki lalo nā taula e fa i te mulivaka, ma tatalo ke i na ōtea loa. 30Oi na taumafai ai te kauvaka ke hōhola kehe ma te vaka; kua tukutuku e kilātou te tulula ki te tai, oi na fakatagā vē ai e olo oi togi ni taula i te taumua o te vaka. 31Kae kua lea atu ia Paulo ki te takitaki o te kautau ma nā fitafita, “Kāfai te kauvaka e hē nonofo pea i luga o te vaka, ko koutou uma lele e feoti.” 32Oi na tipi ai e nā fitafita nā maea nae tau ai te tulula ma na tuku ai ke tāfea.
33Kua tāli pa ki te tafa-o-ata o te vaveao, oi na fakamālohi ai ia Paulo kia te kilātou uma ke kakai: “Kua fano nei te hefulu fa aho e fakatalitali ai koutou, ma i te taimi kātoa tēnei ko hēki iei lele he mea a koutou e kai. 34Ko au la e fakamālohi atu, kai kō ni autou meakai kae ke ola koutou; auā e hēai he tino e fokotahi o koutou ka motu kehe he lāulu mai tona ulu.” 35Kua uma atu tana kupu tēnā, oi na tago ai ia Paulo ki ni falaoa, kua fakafetai ki te Atua i mua o kilātou uma, kua tavaevae ma na kāmata ai oi kai. 36Na maua e kilātou te lototele, ma na mafai ai ke fai he lātou meakai. 37E toka 276#27.37 E toka 276 ko iētahi tuhituhiga e lea mai 275 ko iētahi e lea mai 76 kimātou uma nae i luga o te vaka. 38Kua uma te kakai o kilātou, oi na toli ai e kilātou te uta haito kātoa ki te tai ke fakamāmā ai te vaka.
Kua Tukia te Vaka
39Kua pa ki te tāeao, kae na hēki matea e te kauvaka te fenua kua tau kimātou ki ei, kae na kilātou kitea atu he faga ma he matāfaga; ma na tonu ai ia te kilātou, kāfai e mafai, ko te vaka ka fakakake i kinā. 40Oi na tatipi ai e kilātou nā taula ma tuku ke gōgoto, ma i te taimi foki lava tēnā, na tatala ai e kilātou nā maea nae tamau ai nā foeuli. Oi na fakatū ai te la i te taumua kae ke pūhia te vaka ki mua; ma na fanake ai kimātou ki gāuta. 41Kae na tatū te vaka ki he kauoneone ma na kake ai; kua maupagī te taumua ma kua hē gāoioi, ka ko te taumuli kua tukimomo i te mālolohi o nā galu.
42Na fai ai te tonu a nā fitafita ke tāmate uma nā pāgotā, kae ke nahe mafai ke faikaukau ki gāuta ma hōhola ai. 43Kae na fofou te takitaki o te kautau ke fakahao ia Paulo, oi na tāofia ai e ia te lātou tonu na fai. Kae kua fakatonu e ia nā tāulelea uma e iloa kakau ke tūtaoho muamua ki te tai oi kakau ki gāuta; 44ko nā tino na totoe, ka mulimuli atu e lagalagai i nā laupapa loloa pe ni vāega o te vaka kua malepe ma tō kehe. Na vēnā la te auala na hao uma ai kimātou ki gāuta.
Bible Society New Zealand Charitable Trust