Gāluega 26
26
Kua Tali atu ia Paulo ki Ona Mōliaga i mua o Akalipa
1Oi na lea atu ia Akalipa#26.1 Pe Helota Akalipa 11 kia Paulo, “Kua tuku atu te fakatagaga ke tautala ai koe mo koe.” Ma na fakatū atu ai te lima o Paulo ma na tali vē atu ai:
2“Te Tupu ko Akalipa!#26.2 Tupu ko Akalipa Pe Tupu ko Helota Akalipa 11 E manatu au ko au e aloā e laki auā i te aho nei, ko au ka tali atu i mua o koe, e tuha ai ma nā mea uma kua mōlia ai au e nā tino Iutaia iēnei, 3kae maihe lava, auā kua mālamalama lelei lava koe i nā tu a Iutaia ma nā fekehekeheakiga o kilātou tau toka tahi. Ko au la e fakatagi atu ko koe ke onohai mai ma fakalogo ki te mea ka lea atu ai au.
4“E iloa uma lele e nā tino Iutaia te olaga nae ola ai au talu mai toku tamaiti. E kilātou iloa aku mea nae fai i toku olaga kātoa, kāmata mai i toku fenua ma vēnā foki i Ieluhalema. 5Kua leva te kilātou iloa, ma kāfai kilātou e loto ki ei, mafai kilātou ke fai ma molimau ki nā mea iēnei. Mai te kāmata maiga lava, ko au na ola ake ma kavea ma hētahi o te kau Falehaio, te vāega e pito hili te tauhihi ki nā talitonuga o te mātou tāpuakiga.#Gāl 23.6; Fil 3.5 6Ma i te aho nei, ko au e tū atu i kinei ona ko te fakamoemoe kua ia te au, e tuha ai ma te folafolaga a te Atua na fai ki o mātou tupuna— 7ko tēnei tonu lava te mea e fakamoemoe ia tagata o nā puikāiga e hefulu lua o Ihalaelu ke kilātou maua, ka koi tāpuaki pea lava kilātou ki te Atua i te ao ma te pō. Ona ko te fakamoemoe tēnei, Tau Afioga te Tupu, kua mōlia ai au e nā tino Iutaia iēnei! 8Heā te faigatā ai ia te koutou iēnā i kinei ke talitonu ko nā tino kua feoti, e toe fakatutū e te Atua mai te oti?
9“Na pa foki lava au ki te lagona ko au ke teteke mālohi ki te igoa o Iehu te Nahaleta. #Gāl 8.3; 22.4-5 10Ko tēnā te mea nae fai e au i Ieluhalema. Na tuku mai e nā ohitāulaga pule te fakatagaga kia te au, ma na kō tukua ai te tokalahi o tagata o te Atua ki te falepuipui; ma kāfai nā tino iēnei e fakahala oti, oi nae lagolago foki e au ke fakahala vēnā. 11E lahi nā taimi nae fakahala ai e au kilātou i loto o nā hūnako, ma taumafai i ni faiga ke fakafiti ai kilātou i to lātou talitonuga. Ko toku ita lahi ki nā tino iēnei na fano ai lava au ki nā kakai nukukehe ke fai o lātou mōliaga.
Kua Fakamatala e Paulo Tona Liliuga ke Kavea ma Kelihiano
(Gāl 9.1-19; 22.6-16)
12“Ko te māfuaga ia na fano ai au ki Tamaheko ma te fakatagaga ma te fakatonuga mai nā ohitāulaga pule. 13Tau Afioga te Tupu, ko luga o te auala i te tūpou o te lā, na kō kitea ai he mālama e hili atu tona pupula i lo te pupula o te lā, kua fanaifo mai te lagi ma huhulu ifo fakatakamilo ia te au ma nā tāulelea na malaga fakatahi kimātou. 14Na pakukū uma kimātou ki te kelekele, ma na lagona atu ai e au he leo e lea vē mai kia te au i te gagana Epelu, ‘Haulo, Haulo! Heā te fakahāuā mai ai koe kia te au? E fakaogohia lava koe e koe ona ko tō teteke mai kia te au, e vē ko he pōvi e ta aka e ia te mealākau e fakatonutonu ai e tona matai.’ 15Na fehili vē atu au, ‘Te Aliki, ko ai ko koe?’ Ma na tali mai te Aliki, ‘Ko au ko Iehu, tē kua fakahāuā koe ki ei. 16Kae tū loa ki luga. Kua fakakitea atu au kia te koe ke tōfia ai koe ke kavea ma aku kaukauna. Ka fakailoa atu e koe ki iētahi tino nā mea kua kitea e koe i te aho nei, ma nā mea ka fakahino atu e au i te lumanaki. 17Ka kō lāveakia koe mai tagata Ihalaelu vēnā foki mai tagata nukukehe iēia ka kō uga atua koe ki ei. 18Ka fakapupula e koe o lātou mata ma liliu kehe kilātou mai te pōuli ki te mālama, mai te pule a Hatani ki te pule a te Atua, kae ke kavea ai to lātou fakatuatua mai kia te au, ma mea ka fakamāgalo ai a lātou agahala, ma kavea ai kilātou ma vāega o tagata kua filifilia e te Atua.’
Kua Fakamatala e Paulo Tana Gāluega
19“Ko te mea la ia te Tupu ko Akalipa,#26.19 Kikila ki te 26.2 ko au na uhitaki ki te fakaaliga na kō maua mai te lagi. 20Muamua i Tamaheko ma Ieluhalema ma vēnā i te fenua kātoa ko Iutea, ma i nā mea e nonofo ai ia tagata nukukehe, na folafola e au ko kilātou e tatau ke halamō ia lātou agahala ma liliu ki te Atua, ma ke fakatino e kilātou nā mea e fakailoa ai to lātou halamō moni.#Gāl 9.20, 28-29 21Ko te pogai ia na puke ai au e nā tino Iutaia iēnei ka ko i loto au i te Mālumalu, ma na taumafai kilātou ke tāmate au. 22Kae e pa mai lava ki te aho nei, e fehoahoani mai lava te Atua kia te au, ma ko au la e tū atu i kinei ke kavatu taku molimau ki tagata uma, ki nā tino e he tāua ma nā tino e tāua. Ko te mea e lea ai au, ko te mea foki lava tēnā e fokotahi na lea ai ia Mohe ma te kau pelofeta, e taunuku: 23ko te Mehia e tatau lava ke oti, ma ke kavea ai ia ko te tino muamua e toe tū mai te oti, ke folafola e ia te fakaolataga ki tagata Iutaia ma tagata nukukehe; ma ko te mea tēnei ka vē ko he mōlī kia te kilātou.” #Iha 42.6; 49.6; 1 Kol 15.20
24Ka koi tali vēnei atu ia Paulo ki ona mōliaga, kae kalaga mai ki ei ia Fehetone, “Paulo, ko tō māfaufau kō kua hē lelei! Ko te lahi o au hukehukega kua hē lelei ai tō māfaufau!”
25Kae na tali atu ia Paulo, “Tau Afioga Fehetone, ko toku māfaufau e lelei lava! Ko au e tautala hako atu lava i te meamoni. 26Akalipa te Tupu! E mafai au ke tautala vēnei atu kia te koe auā kua iloa e koe nā mea iēnei. E mautinoa e au kua mātau e koe nā mea takitahi uma iēnei, auā ko te mea tēnei e hēki tupu i he mea pōuli. 27Te Tupu ko Akalipa,#26.27 Kikila ki te 26.2 e talitonu koe ki te kau pelofeta? E iloa e au ko koe e talitonu!”
28Kua lea atu ia Akalipa kia Paulo, “I te taimi pukupuku tēnei e manatu koe e kē mafaia oi liliu au ke kavea ma Kelihiano?”
29Na tali atu ia Paulo, “Pe pukupuku te taimi pe loa, ko taku tatalo ki te Atua, ko koe ma koutou uma iēnā e fakalogologo mai kia te au i te aho nei, ke kavea ke vē ko au—kae vāganā ai la, ko au e hē fofou ko koutou ke noanoa i ni filifili!”
30Oi na tutū ai ki luga te tupu, te kōvana, ia Penihe, ma iētahi tino uma lele, 31ma i te olo kehega na lea vē ai tētahi ki tētahi, “Ko te tino tēnei e hēai hana mea na fai e tatau ai ke tāmate, pe falepuipui.” 32Oi na lea vē atu ai ia Akalipa kia Fehetone, “Ānei ake e hēki fakatagi te tagata tēnei ke fai tona fakamahinoga e Kaihala, moinei ake kua tatala fakahaoloto.”
Currently Selected:
Gāluega 26: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust