Gāluega 2
2
Ko te Afio mai o te Agaga Paia
1Kua pa ki te aho o te Penitekoho, oi na fakapotopoto ai kilātou uma kua talitonu, ki he mea e fokotahi.#Lev 23.15-21; Teu 16.9-11 2Kae teki lava kua fanaifo he leo mai te lagi e vē he matagi mālohi, ma kua agi ki loto o te fale ma na fakatumulia ai te fale kātoa nae māopōpo ai kilātou. 3Ma na kilātou kitea ai nā mea e vēia ni laulaufaiva afi kua i luga o kilātou tau toka tahi uma nae i kinā. 4Na fakatumulia ai kilātou uma i te Agaga Paia, ma kāmata ai kua tautatala i iētahi gagana, e vē ona tuku atu e te Agaga kia te kilātou te mana ke tautatala ai.
5Nae iei ni tino Iutaia nae nonofo i Ieluhalema, ni tino lolotu i te lotu Iutaia, na ōmamai i nā atunuku uma i lalo o te lagi. 6I te kilātou lagonaga o te leo tēnei, oi na potopoto ai he kaifenua tokalahi o kilātou. Na fakatēkia uma kilātou auā na lagona atu e kilātou tau toka tahi, ko nā tino kua talitonu kia Iehu, nae tautatala i nā gagana a kilātou. 7Oi na taufai ōfo uma lele ai kilātou ma lea vē, “Ko nā tino iēnei e tautatala vēia, ni tino Kalilaia! 8E vēhea la ona mafai e kilātou uma ke tautatala i nā gagana a kitātou? 9Ko kitātou ni tino e ōmamai mai Patahia, Metai ma Elama; mai Mehopotamia, Iutea ma Kapatokia; mai Ponitoho ma Ahia, 10mai Fulugia ma Pamefulia, mai Aikupito ma nā koga o Lipue#2.10 Lipue pe Lipia e vē ona igoa ai i nā aho nei e pili ki te kakai ko Kulene. Ko iētahi o kitātou e ōmamai mai Loma, 11ni tino Iutaia ma ni tino nukukehe kua liliu ki te tāpuakiga Iutaia; ka ko iētahi e ōmamai mai Kelete ma Alapi—kae kua fakalogo uma lava kitātou kia te kilātou e tautatala ia tātou gagana, ki te uiga kehe o nā mea kua fai e te Atua!” 12Ona ko te ōfo lahi ma te nunumi o nā māfaufau o kilātou, na fakatau fehili ai lava tētahi ki tētahi vēia, “Heā te uiga o te mea tēnei?”
13Kae ko iētahi tino kua faikupu fakatauemu ma lea vē, “Ko nā tino iēnei e konanā i te uaina!”
Kua Tautala ia Petelu ki te Kaifenua
14Oi na tū ai ki luga ia Petelu fakatahi ma iētahi apohitolo e toka hefulu tahi, ma kāmata oi tautala leo lahi vēnei atu ki te kaifenua, “Oku uho Iutaia ma koutou uma iēnā e nonofo i Ieluhalema, fakalogo mai ke lea atu au i te mea tēnei. 15Ko nā tino iēnei e hē konanā e vē ko nā manatu o koutou; ko tēia fātoā ta te iva i te tāeao; 16kae ko te mea tēnei te na tautala fakatatau ki ei te pelofeta ko Ioelu:
17‘Ko tēnei te mea ka kō faia
i nā toe aho, kua vāgana te Atua:
Ka liligi atu e au toku Agaga
ki luga o tagata uma.
Ko outou ataliki ma afafine ka tālakia taku fekau;
ko outou taumalo ka kikila ki ni fakaaliga,
ma outou toeaina ka fai a lātou miti.#Ioe 2.28-32 (LXX)
18Io, e pa ki aku kaukauna, ia tāulelea ma fafine,
ka kō liligia ki luga toku Agaga i nā aho iēnā,
ma ka kilātou tālakia taku fekau.
19Ka kō faia ni vāvega i te lagi i luga
ma ni mea ofōfogia i te lalolagi i lalo;
ka iei te toto, te afi, ma te ahu māfiafia.
20Ko te lā ka fano e pōuli,
ma te māhina ka kukula e vē ko te toto,
ka ko hēki pa ki te aho lahi ma te mamalu o te Aliki.
21Ma ko ai lava e kalaga atu ki te Aliki
mo he fehoahoani ka lāveakia.’
22“Koutou nā tino o Ihalaelu, fakalogo mai ki nā kupu iēnei! Ko Iehu te Nahaleta, ko he tino na filifilia e te Atua e vē ona fakaali tino atu kia te koutou, e ala i nā gāluega mamana, nā vāvega, ma nā fakailoga na fai e te Atua kui mai ia te ia. E iloa lelei lava e koutou te mea tēnei, auā ko nā mea iēnei na tutupu lava i kinei i te mea e iei koutou. 23Ko he peleni lava e a te Atua te na tukulima atu ai ia Iehu e ia kia te koutou; ma na tāmate e koutou i te fakatagaga e koutou o nā tino agahala, ke kilātou fakahātauloa ia.#Mat 27.35; Mlk 15.24; Luk 23.33; Ioa 19.18 24Kae na toe fakatū ia Iehu e te Atua mai te oti, ma fakahaoloto mai nā tīgā mātuitui o te oti, auā e hēai he mālohi o te oti ke ia tāofia ai ia Iehu e vē he pāgotā #Mat 28.5-6; Mlk 16.6; Luk 24.5 25Auā na lea vē ia Tavita e uiga kia te ia;
‘Nae kō kitea te Aliki i mua o oku i taimi uma;
e pili mai ia ma ka hē mataku lele ai kita.#Hal 16.8-11 (LXX)
26Oi ko toku loto e fakatumulia i te fiafia,
ma aku kupu e tumu i te olioli.
Ma e ui ko au, he tagata e fano e mate,
ka nofo au ma te fakamoemoe e mautinoa,
27auā ka hē kē tīakia au i te lalolagi o tagata oti;
ka hē kē tukua tau kaukauna fakamāoni
ke pala i te tugamau.
28Kua kē fakahino maia ia ala e tau ki te ola,
ma ko tō fakatahi mai, ka tumu ai au i te fiafia lahi.’
29“Te kau uho, e tatau ke fakamanino atu e au e uiga ki to tātou tupuna takutakua, te Tupu ko Tavita. Ko Tavita na oti ma na tanu, ma ko tona tugamau e i kinei lava ke pa mai ki te aho nei. 30Nae he pelofeta ka koi ola ai, ma na ia iloa te folafolaga a te Atua na fai e uiga kia te ia: na fai te tautōga a te Atua ka ia faia he lāpuna o Tavita ke kavea ma tupu e vē foki lava ko Tavita. #Hal 132.11; 2 Ham 7.12-13 31Na kitea e Tavita te mea e tuku e fai e te Atua i he taimi i mua, ma na tautala ai e uiga ki te toetū o te Mehia mai te oti, i te leaga vē,
‘E hēki tīakia ia e te Atua i te lalolagi o tagata oti;
ko tona tino e heki pala i te tugamau.’
32Ko te Iehu lava tēnei na toe fakatū mai te oti e te Atua, ma ko kimātou uma iēnei ni molimau ki te mea tēnei. 33Kua hikitia ake ia ki te itū taumatau o te Atua tona Tamana, ma kua tuku atu kia te ia te Agaga Paia, e vēia ona folafola e tona Tamana kia te ia. Ko te mea la e kikila ma fakalogo koutou ki ei i te taimi nei, ko tana meālofa tēnā kua liligi ifo ki o tātou luga. 34#Hal 110.1Auā e hē ko Tavita te na hikitia ki te lagi; kae na lea vē,
‘Ko te Aliki na vāgana ki toku Aliki:
Nofo i toku itū taumatau,
35ke pa ki te taimi e kō faia ai ō fili,
ma nofoa e mapu ki luga ō vae.’
36“Ko te mea ia e tatau ai ke iloa ma mautinoa e koutou nā tino Ihalaelu uma, ko te Iehu tēnei, tēia na koutou fakahātauloa, ko te tino ia kua fai e te Atua ma Aliki, ma ko ia ko te Mehia!”
37Na tuia lahi lele nā loto o tagata i te kilātou lagonaga o te mea tēnei, oi na lea vē atu ai kilātou kia Petelu ma iētahi apohitolo, “Te kau uho, heā te tatau ke fai e kimātou?”
38Oi na lea atu ai ia Petelu kia te kilātou, “Ko koutou uma tau toka tahi e tatau ke liliu kehe mai autou agahala ma ke papatihogia i te igoa o Iehu Keliho, kae ke fakamāgalo ai autou agahala; ma ka koutou maua ai te Agaga Paia, te meālofa mai te Atua. 39Auā ko te folafolaga a te Atua, na fai kia te koutou ma autou fānau, ma ki nā tino uma lele e nonofo mamao—kilātou uma na kalagagia e te Atua to tātou Aliki, ke ōake kia te ia.”
40E hē ko iēnei oioti nā mea na lea ai ia Petelu kia te kilātou; na fautua mālohi lele kia te kilātou i te lahi o iētahi kupu, ma na lea vē atu ai, “Koutou la ke hao mai te fakahalaga ka pa ki ei tēnei tupulaga kino!” 41E tokalahi kilātou na talitonu ki tana fekau ma na papatihogia, ma na maua te tai toluafe o kilātou na fakaopōpo ki te vāega kua talitonu, i te aho tēnā. 42Ma na fakafano to lātou taimi lahi ke akoako ai kilātou e te kau apohitolo, ma nae māfuta fakatahi ma kilātou, kakai fakatahi, ma fai talohaga fakatahi.
Ko te Olaga o nā Tino kua Talitonu kia Iehu
43E lahi nā vāvega ma nā fakailoga na fai e te kau apohitolo, ma na mātataku lele ai ia tagata uma. 44Na tūmau pea lava te māfuta fakatahi o nā tino kua talitonu kia Iehu, ma fakaaogā fakatahi a lātou meatōtino. #Gāl 4.32-35 45Nae fai ma fakatau atu o lātou fenua ma a lātou meatōtino, ma fakahoahoa te tupe mā kilātou fakatahi, fua ki o lātou manakoga tau toka tahi. 46I aho takitahi uma, nae fakapotopoto fakatahi kilātou i loto o te Mālumalu ma kakai fakatahi fakaholoholo i nā fale o kilātou, i te agaga fiafia ma te loto maulalo, 47ma viviki ake ki te Atua, ma na talia fiafia kilātou e tagata uma. Ma ko aho uma lava nae fakaopōpo e te Aliki ki te lātou vāega, nā tino kua fakaolagia.
Currently Selected:
Gāluega 2: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust