Gāluega 1
1
1Ki taku uō ko Teofilo:
I taku tuhi muamua, na kō tākua ai nā mea uma na fai e Iehu ma na ia akoakoa, mai te aho na kāmata ai tana gāluega #Luk 1.1-4 2ke pa lava ki te aho na hikitia ake ai ki te lagi. Ka ko hēki hikitia ake la ia, na fai tana fakatonuga e ala i te mana o te Agaga Paia, ki nā tāulelea na ia filifilia ke fai ma ana apohitolo. 3Mo ni aho e fa hefulu talu te mate o Iehu, na fakakitea ia kia te kilātou i ni taimi e lahi, ma i ni auala e fakamāonia lelei ai ko ia na toe tū mai te oti. Na kilātou kitea ia Iehu, ma nae tautala ake ia kia te kilātou e uiga ki te Mālō o te Atua. 4Ka ko iei ia ma kilātou, na ia faia kia te kilātou te fakatonuga tēnei, “Ko koutou e hē olokehe ma Ieluhalema, kae fakatali ki te meālofa na lea atu ai au, te meālofa na folafola e toku Tamana. #Luk 24.49 5Na papatiho e Ioane ia tagata i te vai, kae i ni nāi aho, ko koutou ka papatiho i te Agaga Paia.” #Mat 3.11; Mlk 1.8; Luk 3.16; Ioa 1.33
Kua Hikitia ia Iehu ki te Lagi
(Mlk 16.19-20; Luk 24.50-53)
6Kua fakatahi te kau apohitolo ma Iehu, oi na fehili vē atu ai kilātou kia te ia, “Te Aliki, ka toe fōki nei e koe te Mālō kia Ihalaelu i te taimi nei?”
7Na tali mai ia Iehu, “Ko toku Tamana oioti lava te ia faia te tonu pe ko āfea te ka tutupu ai nā mea iēnei, ma e hēai lele hautou āiā ki ei. 8Kae i te taimi e fanatu ai te Agaga Paia ki outou luga, ka fakatumulia koutou i te mana ma kavea ai koutou ma molimau e uiga kia te au i loto o Ieluhalema, Iutea ma Hamalia, ma ke pa lava ki te gataga o te lalolagi.”#Mat 28.19; Mlk 16.15; Luk 24.47-48 9Na uma lava te vāgana vēnei atu o Iehu, oi na hikitia ake ai ki te lagi kae kikila atu kilātou, ma na pupuni ai ia, mai te lātou kikila, i he ao.#Mlk 16.19; Luk 24.50-51
10Ka koi kikila ake lava o lātou mata ki te lagi i te teka kehe atuga o Iehu, kae teki lava kua iei ni tāulelea e toka lua e tutū i o lātou tafa, ma nae kokofu i ni kofu paepae. 11Kua lea vē mai kilāua, “Nā tino Kalilaia, heā te tutū ai koutou i kinā ma taukikila ki te lagi? Ko te Iehu tēnei, tēia na hikitia ake mai ia te koutou, ka toe hau i te auala lava e tahi na koutou kitea na fanake ai ki te lagi.”
Ko te Tino na Hui kia Iuta
(Mat 27.3-10)
12Oi na toe foki ai te kau apohitolo ki Ieluhalema mai te Mauga o Olive, e tuha pe he āfa maila te mamao mai te kakai. 13Kua taunuku atu kilātou ki Ieluhalema, oi na olo ai ki te potu nae nonofo ai i te falealuga; ko Petelu, ko Ioane, ko Iakopo ma Anitelea, ko Filipo ma Toma, ko Patolomaio, ko Mataio, ko Iakopo te ataliki o Alefaio, ko Himona te Lotonuku, ma Iuta te ataliki o Iakopo.#Mat 10.2-4; Mlk 3.16-19; Luk 6.14-16 14Nae māopōpo ho kilātou oi tatalo fakatahi, ma nae iei ai ma ni fafine vēnā ma Malia te mātua o Iehu ma nā uho o Iehu.
15Kua teka atu ni nāi aho, oi na fai ai he fono a nā tino kua talitonu kia Iehu, na maua te toka 120 fakatahi, ma na tū ai ia Petelu ki luga ke tautala. 16Kua lea vē atu, “Te kau uho, kua tatau lava ke fakatāunuku te mea e tākua i te tuhituhiga paia e uiga kia Iuta, tē na ia takitakia nā leoleo o te Mālumalu ke kilātou pukea ia Iehu. Ko te mea tēnei na vāloia e te Agaga Paia i nā aho kua leva lele e ala ia Tavita. 17Ko Iuta nae he hoa e o kimātou, auā na filifilia ia ke gālulue fakatahi kimātou.”
18(Ko te tupe na maua e Iuta mai tana gāluega kino na fai, na ia fakataua ai he fenua, ma ko kinā te na pakū ai ki lalo ma na uma ai tona ola; na gapā tona manava oi holo ai ki fafo. #Mat 27.3-8 19Na fakalogo ki ei nā tino uma nae nonofo i Ieluhalema, oi na fakaigoa ai e kilātou te fenua tēnā i te lātou gagana, ko Akeletama, ko tona uiga, “Fenua o te Toto”.)
20“Auā e tūhia i te tuhi o nā Halamo,
‘Ke tūfua tona fale,
ma ke nahe iei he tino e nofo ai.’
E tūhia foki vēia,
‘Ke i ei hētahi tino ke kavea tona tūlaga pule gāluega.’
21-22“Ko te mea ia kua tatau ai ke iei he tino fakaopōpo ke fai ma molimau ki te toetū o te Aliki ko Iehu. E tatau ko he tino nae i te mātou vāega i te taimi kātoa nae malaga fakatahi ai te Aliki ko Iehu ma kimātou, kāmata mai i te taimi na tālaki ai e Ioane tana papatihoga,#1.21-22 na tālaki ai e Ioane tana papatihoga pe na papatiho ai ia e Ioane ke pa ki te aho na hikitia ake ai ia Iehu ki te lagi.” #Mat 3.16; Mlk 1.9; 16.19; Luk 3.21; 24.51
23Oi na fakatutū mai ai e kilātou nā igoa o ni tāulelea e toka lua ke filifili ki ei: ko Iohefa, nae fakaigoa kia Pahapa (nae igoa foki kia Iuhitu), ma Matiahi. 24Ma na fai ai te lātou tatalo, “Te Aliki, e kē iloa ia loto o tagata uma lele. Ko te mea ia, te Atua e, fakaali mai kia te kimātou pe ko ai o te toka lua tēnei kua kē filifilia 25ke fai ma apohitolo ke hui ai ia Iuta, tēia kua fano lava ki te mea e talafeagai mo ia.” 26Oi na fai ai he heki ki nā igoa iēnei e lua, ma na maua ai ia Matiahi, ma na fakaopōpo ai ki te kau apohitolo e toka hefulu tahi.
Bible Society New Zealand Charitable Trust