2 Kolinito 1
1
1Mai ia Paulo, he apohitolo a Keliho Iehu e tuha ai ma te finagalo o te Atua, ma te koutou uho ko Timoteo—
Ki te Ekalehia a te Atua i Kolinito, ma nā tino o te Atua i te itūmālō kātoa o Akaia: #Gāl 18.1
2Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.
Kua Fakafetai ia Paulo ki te Atua
3Ke vīkia te Atua, te Tamana o to tātou Aliki ko Iehu Keliho, te Tamana e alofa fua ma te Atua e ala mai ai ia fehoahoaniga uma. 4E fehoahoani mai ia ki nā puapuagā uma o kimāua, ke mafai ai e kimāua oi fehoahoani ki iētahi tino e maua i te lahi o itūkāiga puapuagā kehekehe, e ala i te fehoahoani kua ki mā maua mai i te Atua. 5E vē ona kau fakatahi kimāua ma Keliho i te lahi o ona puapuagā, e vēnā foki oi maua fakatahi e kimāua te lahi o nā fehoahoaniga mai te Atua, e ala ia Keliho. 6Kāfai kimāua e maua i nā puapuagā, e mo he fehoahoani o koutou ma he fakaolataga; kāfai e ki mā maua he fehoahoani, oi ka vēnā foki oi maua e koutou he fehoahoani, vēnā ma te mālohi ke tūmau ai te onohai i nā puapuagā, e vē ona onohai ai foki kimāua. 7Ko to mā fakamoemoe la mo koutou, e hē māluelue lele; auā e iloa e kimāua e vē ona kau fakatahi koutou i o mā puapuagā, e vēnā foki oi kau fakatahi koutou i nā fehoahoaniga e maua e kimāua.
8Ko kimāua e fofou ke fakamanatu atu kia te koutou, te kau uho, nā puapuagā na pa kimāua ki ei i te itūmālō o Ahia. Ona ko te lahi ma te mamafatū o te kavega na fakauta mai ki luga o kimāua, na hēki iei ai he fakamoemoe ia te kimāua, ko kimāua e hao mai te oti.#1 Kol 15.32 9Ko kimāua e vē ni tino na fakahala i te oti. Kae na tupu te mea tēnei, ke nahe fakalagolago ai kimāua kia te kimāua lava, kae fakalagolago oioti ki te Atua, tē e ia toe fakatutūa ia tagata kua oti. 10Mai nā mea matakutia vēnei e ono iku ai ki te oti,#1.10 ki te oti ko iētahi tuhituhiga e leamai oti fakamātakutaku na ia lāveakia kimāua, ma ka ia lāveakia kimāua; ma ko to mā fakamoemoe kua tukutahi kia te ia, ka ia toe lāveakia foki kimāua, 11fakatahi ai ma te fehoahoani a koutou e ala i autou tatalo mo kimāua. Ko nā tatalo e lahi a koutou ka tali mai ki ei te Atua, ma ka maua ai e kimāua ana fakamanuiaga; ma e tokalahi ka hiki ake te fakafetai mo kimāua.
Ko te Hūiga ki te Malaga a Paulo
12Ko kimāua e mafai ke fāfifia auā ko o mā lotofuatiaifo e mamā lava. Ko a mā gāluega i te lalolagi nei, kae maihe lava i te vā ma koutou, e fai lava ma te fakamāoni ma te loto mamā mai te Atua. Ko te mana o te alofa tūnoa o te Atua te mafai ai nā mea iēnei, kae hē ona ko he poto o te tagata. 13-14Ko kimāua e tuhi atu oioti i nā mea e mafai ke faitau ma mālamalama koutou ki ei. E ui lava la ko hēki kātoatoa te koutou mālamalama, kae e fakamoemoe au ka mafai ke fakakātoatoa lelei, kae ke pa atu ai ki te Aho o to tātou Aliki, ka mafai ke fiafia koutou ona ko kimāua, ma ka vēnā foki kimāua ona ko koutou.
15Na mautinoa lelei lava e au te mea tēnei, ma ko te mea ia na fuafua ai e au ke fanatu muamua au kia te koutou, kae ke fakaluagia ai te lahi o nā fakamanuiaga e maua e koutou, i toku āhiahi atu fakalua. 16Auā ko taku fuafuaga na fai, ko au e afe atu ke āhiahi atu kia te koutou kāfai au e fano ki Maketonia, ma vēnā foki kāfai e toe taliu mai, kae ke fehoahoani mai ai koutou ki taku malaga ki Iutea. #Gāl 19.21 17E iei nei he manatu ia te koutou ko au e hēki māfaufau fakalelei muamua oi fai ai taku tonu tēnei? Ko koutou e vēakē ko te faiga o aku tonu e vē ko te faiga o tonu a tagata o te lalolagi e “Io, io” oi toe “Hēai, hēai” i te taimi e fokotahi? 18E molimau te Atua fakamāoni, ko taku folafolaga na fai atu kia te koutou, e hē he “Io” pe he “Hēai.” 19#Gāl 18.5Auā ko Iehu Keliho, te Ataliki o te Atua, tē nae folafola atu kia te koutou e kimātou—e au vēnā ma Hila#1.19 Eleni Hilivanu ma Timoteo, e hē ko he tino e “Io” ma “Hēai” i te taimi e fokotahi, kae e “Io” i taimi uma lava; 20auā ko ia ko te “Io” ki folafolaga uma a te Atua. Ko te mea ia e kui atu ai ia Iehu Keliho te tātou “Amene” mo te vīkiga o te Atua. 21Ma ko te Atua lava ia te na mafai ai kimāua ke ola fakatahi ma koutou i te māfutaga ma Keliho; ko te Atua lava ia te na ia tōfiagia kimāua, 22ma tuku maia tana fakailoga ki o mā luga, ke iloa ai ko kimāua e a ia, ma na ia tuku maia te Agaga Paia ki o mā loto, ke fakamāonia ai nā mea uma lele kua ia hāunia mo kimāua.
23E kalaga au ki te Atua ke fai ma aku molimau—e ia iloa toku loto! Na ala toku hē fanatu kia te koutou i Kolinito, ona na hēki fofou au ke toe fakaogohia nā loto o koutou. 24Ko koutou e hē fakatonu atua e kimāua ki nā mea e tatau ke talitonu koutou ki ei; e iloa e kimāua ko te koutou fakatuatua kua mautū lelei. Kae ko kimāua e gālulue fakatahi ma koutou ke fiafia ai koutou.
Currently Selected:
2 Kolinito 1: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
