Kintaŋ 27
27
Wón Tsəlofehad
1Wón Tsəlofehadi nèn kòʼtí fo mentsə̀m, aáwune‑eè dù, e fəə̀ vikìy vikìy. Tsəlofehad‑iì dzə̀ wan Hefer, a Hefer dzə̀ wan Gilead, a Gilead dzə̀ wan Makir, a Makir dzə̀ wan Manasse, a Manasse dzə̀ wan Joosev. Yír sé won vin si‑iì dzə̀ jii, Maala wùn à Noa, à Hogla, à Milka, à Tirsa. 2Á kóʼtí bey, e tìím e Mooser wùn à Eleasar woo taà cù si, aá dzə̀ é shùu *kibàn ké ntàsín wùn à vilìmbìy vi, à màŋgòŋ e dzə̀m. Á tiím, e nèn a ghay jii, 3«Tàr wor‑iì kpù é woʼ là wán woo lumèn, a bó yòʼ dzə̀ ji wù‑uù dzə̀ é ŋgoo wìr ve vé‑eè baʼtin wùn à Kora, e taàmé Nyùy Tàr. Wù‑uù kpù kfə́ a dzə̀ bìʼ və́ə woo jay. Wáa dzə cáʼ bèy, bo 4a dzə̀ yír tàr worí yèe, e bóo lày fo wun kfəə ji bìʼ fo wù yòʼ‑oò ló a ker wán woo lumèn? Fó ver nsay e tàr wór shùu yir, aàfə́r vəə́ mvəm.»
5Mooser nèn lì nsaʼ yev, e beè Nyùy Tàr shó. 6Nyùy Tàr suúy e Mooser jii, 7«Kinyo ke wón Tsəlofehadi suuy ki dzə̀ rú féyì. À kù yíi fo áwune nsay aàfə́r tàr woví mvəm, ji kifá ke kí wáa liysín aáwuné nsàn. Ku yiì bèy, e tùmér vitsə́ʼ vé tàr wov ví aáwune. 8Ke wo‑óò yoŋ e wír veé Isray ki dzə̀ jii, ‹A wìr kpù là wán woo lumèn, bo á fó vitsə́ʼ və́ e wan və woo wiíy. 9Ŋgaàŋ búŋ sá wán woo wiíy, bo vitsə́ʼ ví du aàfə́r və́ vee vilume. 10Wù búŋ afə́r vee vilum, á fò vitsə́ʼ və́ áàfə́r tàr wov vee vilume. 11Afə́r tàr wov vee vilume búŋ, bo vitsə́ʼ ví du e wìr kfəə woo fó mentsə̀m, é wù nèn yòv. Kù sì nsər bèy, wùn à ntò se vinyò se wír veé Israyi wíy a jùmrì si.› »
Á nsər ye Nyùy Tàr‑iì foon e Mooser.
Á shóʼ Joshua ji njìlaʼ Mooser
(Remrí 31.1‑8)
12 Nyùy Tàr yòŋ e Mooser jii, «Kóʼ é Gwan Abarim fèn, e lèéy woŋ wo m foon e wír veé Israyi. 13À yíi yen, áà nèn kpù mo fər wò woo Aaron‑eè kpuun. 14A dzə̀ bìʼ fo yì‑iì dzəə̀n é woʼ yee Tsin fo ndzə́ví‑iì dzəə̀n, a màŋgòŋ woó Isray káykir, báshi mo, vèn ŋwáy kinyo ke mò‑oò yòŋèn e vèn, e làa yòʼ yiì, aáwune yén vitaáví vém vee jeéy ví.» Nyùy‑iì yòŋ bey, a ndzə́v rə́ne dzə̀ yee Meriba, a yí dzə̀ é Kadesh e woʼ yee Tsin.
15Mooser suúy e Nyùy Tàr jii, 16«Nyùy Tàr, dzə̀ wò Nyùy wo wù kér viyoy ve wìr dzə̀m. Ku shòʼ ri wír wo wù wáa tsəəné màŋgòŋ və̀n. 17Wír wo wù yíi a fəə, e kfə̀n a nəə́ aáwuné mbìy, a tsəəné áwune, a fəə sho, e kfə̀n a kfən sho e bàm, é la màŋgòŋ wìr Nyùy Tàr yòʼ yiì a dzə moo njiì woo là nshìy.»
18 Nyùy Tàr nèn sùúy e Mooser jii, «Lì Joshua woo wan Nun, e neèr wó yée é kitu wo. Dzə̀ wír, a wù kér shilív shee jeéy shí. 19Tiír wun e taà cù Eleasar wùn à màŋgòŋ si, e lèm ji kilìmbìy kév, aá kiíy. 20À yíi fo wun vitaáví vé saʼ, aá kú a yu sáʼ rə́ mo vé‑eè yú yé, é wìr dzə̀m woó Isray fíʼ a yunín wun. 21Wù wíy a tiím e taà cù Eleasar si, é wù wáa sə wun, a tàr kinyo fo Nyùy Tàr e Urim wùn à Tumim.#27.21 Urim wùn à Tumim: Leéy: Fəə 28.30. Wíy a yòŋ wun woo Joshua, é bo wùn à wír veé Israyi wáa fəə e ndzə, a kù wíy a yòŋ wun, é bo á wáa kfən e bàm.»
22Mooser ku nèn yiì mo Nyùy Tàr‑iì yòŋèn e wun. Wù‑uù kòʼór Joshua e taà cù Eleasar wùn à màŋgòŋ dzə̀m mbìy, 23e nèn neèr wó rə́ é kitu wo, e lèm wun ji kilìmbìy ke wíri mo Nyùy Tàr‑iì yòŋèn e wun.
Currently Selected:
Kintaŋ 27: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
