Kintaŋ 21
21
Isray tón Arad woo ntèʼ wìr veé Kanan
1Fòn woó Arad nèn lò, e yù ji wír veé Israyi wiy a dzə́ə fó Atarim. A Arad‑iì dzə̀ ŋkàlaʼ wìr veé Kanan yìmòʼ é mbìv wòŋ yeé Negev foo fèy. Wù nèn fəə̀, e taàmé wír veé Isray e rə́r sí, e koòrí wír ámóʼó. 2Wír veé Israyi nèn mbaà Nyùy Tàr, e lìʼ jii, a wù wày wír vìn aáwuné kiwo, bo áwune kù yíi yiì, é ŋkà se laʼ se wír vìn si kfə́n á ji nshwǐ Nyùy Tàr,#21.2: nshwǐ Nyùy Tàr: Leéy: 18.14. aá laar ŋkuuŋkùŋ. 3Á bèy, Nyùy Tàr nèn yù tóŋ Isray, e wày wír veé Kanan vìn aáwuné kiwo, á laàr wùn à ŋkà se laʼ sév sí ŋkuuŋkùŋ. Bìʼ kee shooy, á nèn a yòŋ yír kirə̀ʼ kin ji Horma#21.3: Horma: E Lǎm Hibru, nsàv yìr rən dzə̀ jii, «kirə́ʼ ke vé‑eè màʼàn rə́r, e laàr.».
Yó yee kisha kee brons
4Wír veé Israyi lò fo Gwan Hor, a dù fo dzəə yeé Rìbà Ndzə̀v wo Baar ji á fiʼ kaàrí a nsay wìr veé Edom. Á lòo dù bèy, wíri nèn kèʼ a yu ntéŋ é dzəə, 5e nèn lò, a ghvə̀vrì, a bashí Nyùy wùn Mooser, a suúy jii, «Vèn‑eè fə̀ə́r ver fó Ejiv ji vèr wiy, e kpùkír e woʼ fen ji ka? Kirə́ʼ, a bó kifá ke yi ki yòʼ dzə̀ fó, a bó mendzə́v mè yòʼ dzə̀. Vèr yòʼ dzəə́ tíy e *manna woo viyíkìr vee là dzə́ə vin.»
6 Nyùy Tàr nèn fə̀ə́r yó se ndzəʼ si, sí wáa térí áwune. Sí té bey, wìr woó Isray kpú nyanyày. 7Wíri nèn wìy, e yèn Mooser, e sùúy sho jii, «Vèr yiì ne jay. Vèr kì sí báshi vèn Nyùy Tàr. Ku bùnrì ji Nyùy Tàr tsəʼ á yó sìn fo věr mvəm.» Á bèy, Mooser nèn bùnrì, e lòn bìʼ wíri.
8 Nyùy Tàr nèn sùúy e Mooser jii, «Fèr yó e kisha ki, e keèrì e kici ji wìr wo yò teen leeyì, é wù bónén.» 9Mooser nèn fèr yó e kisha kee *brons ki, e keèrì e kici. Wìr wo yò‑oò teen ne leeyì, wù kù nèn bònén.
Ghán yée dù, e meé e Moav
10Wír veé Israyi nèn lò fo fo, e dù, e beè e Obot. 11Áwune lò fo Obot, e beè e Iye‑Abarim e woʼ yeé ŋkìʼnìn Moav, aá kiʼ fo shùy yii tó. 12Á lò fo fo, e dù, e beè e Mboʼ Sered, 13e lò, e tùm ndzə́v yee Arnon, e beè e mbìv ye yì dzəə̀n é woʼ ye yí ràmèn fó bìíy nsay wìr veé Amor. Ndzə́v yee Arnon rə̀ne jav bìíy nsay wìr veé Moav wùn à ye wìr veé Amor. 14Á kinyo ke kí yiìn, é bo á sáŋ é ŋwàʼ woo kùm rə́r sé Nyùy Tàr#21.14: ŋwàʼ woo kùm rə́r sé Nyùy Tàr: Yì‑iì dzə̀ ŋwàʼ lùŋ se wìr veé Hibru, a wú yòʼ‑oò dzə̀ə́ sho. jii:
«Wahev, wo wù dzəə̀n é Sufa,
wùn à viwoóy veé Arnon vi,
15à bábá seé viwoóy sí,
se sí ràmèn, e dù, e mèé e laʼ yeé Ar,
e nànèn, e dù, e mèé e bìíy Moav.»
16Áwune ló fó Arnon, e dù, e mèé e Beer, a dzə̀ ji ndzə́v ye tuŋéné. Dzə̀ kirə́ʼ kin fo Nyùy Tàr‑iì yòŋèn e Mooser jii, «Bánén wíri, é m fó áwune mendzə́v.» 17Wír veé Israyi nèn a yòv luŋ fo jii:
«Éè ntòŋ ndzə̀v,
fəə́r mendzə́v mè,
é vèr yov luŋ, e səə̀sí sho.
18Ndzə́v ye wón ntoʼo tuŋen,
ndzə́v ye atǎr wòŋe tuŋen,
aá túŋ e kitoómé kí,
e tùŋ e mbàŋ sév sí.»
Áwune siíy, e lò fo woʼ fóo fèy, e dù e Mattana, 19e yiì lò fo Mattana, e dù e Nahaliel, e lò fo Nahaliel, e dù e Bamot, 20e lò fo Bamot, e dù e mboʼ ye yì dzəə̀n é nsay Moav, e ghaa Gwan Pisga wo wù kiʼ wóʼ é mbìv ròŋ.
Isray tón Fòn Sihon wùn Fòn Og
(Remrí 2.26–3.11)
21Wír veé Israyi nèn yiì lò, e tsə̀nsí aŋgàa ntum fo Fòn Sihon wùn, a dzə̀ fon wìr veé Amor. 22Á dù, e lòn jii, fòn ku biìmé a, aáwune shaa e wun nsay. Bó áwune yòʼ yíi bìn a e wír vəə́ sum sé vifa ve yi, kìn e sé vitiír vé vayin si. A bó áwune yòʼ yíi no a mendzə́v fó ndzəv se wír vəə́‑əə̀ tuŋen. Á kù yíi shaà a tìítiy, a dzə̀ fó màdzəə̀ ye dzəə̀n ye afòn, e meé mo áwune yíi tosín a kitúm ke fòn. 23Yii bèy, la Fòn Sihon yòʼ biìmé ji wír veé Israyi shaa e wun nsay. Wù báʼtí shúu rər və́, e fəə̀, e dù, e taàmé Isray e rə́r sí é Jahas, e kirə̀ʼ ké woʼ kí. Wùn à Isray fùnèn fo. 24Sí màʼ, Isray tòn áwune, e yòv nsay yev, e kèʼ fo ndzəv yee Arnon, e dù, e meé e yee Jabboki, e dù, e bàʼ e wír veé Ammoné nsay, e làa yòʼ nəə́ fo, bìʼ fo bìíy yev‑iì dzə̀, aá lím, yì táv. 25Isray ku nèn faàsì ŋkà se laʼ se wìr veé Amor sidzə̀m, a dzə fo. A vé‑eè lo faàsì sa Heshbon wùn à ntèʼ se sí kaarin fó si sidzə̀m.
26Heshbon‑eè dzə̀ ŋkàlaʼ wìr veé Amor fo Fòn Sihon‑eè sáʼá. Wù‑uù tòn ne fon woó Moav, e faàsì nsay rə rə̀y e dzə̀m, e faàsì bèy, e dù, e bàʼ e ndzəv yee Arnon. 27Á kinyo ke kí‑iì yiìn, é bo vé yòv taŋe wáa yòv, a taŋ jii:
«Vèn wiy, aá baʼri Heshbon,
e wìy, aá baʼri ŋkàlaʼ Fòn Sihon.
28Və́yí‑iì lo sàʼ fó Heshbon,
kiliímé ke və̀y fó ŋkàlaʼ Sihon,
e dù, e tòn ŋkàlaʼ yee Ar e wòŋ Moav,
e tòn vé wòŋ e virə̀ʼ vé cù veé taa Arnon.
29Yìiy Moav, lòné shòv ne ven.
Vèn ve á cu *Kemosh, á laàr ne ven.
Kemosh yiì ne, wón vén vee vilume kfə́n ji alàŋgày,
vee vikìyí kfə́n ji akwàn,
akwǎn Fòn Sihon, fon wìr veé Amor.
30Á bèy lèn, vèr laàr ne rám yév,
e kèʼ fo Heshbon, e dù, e bàʼ e Dibon.
Vèr sə̀ʼsí ne fó,
e dù, e bàʼ e Nofa woó ghaa Medeba.»
31Á mo wír veé Israyi‑iì taʼamen e wír veé Amorí nsay bèy. 32Mooser yiì lò, e tsə̀nsí vé ŋkiyi é ŋkàlaʼ Jaser ji á du, e shwèʼ, e yèn á mo dzə̀ á ghàn, e bóo tòn fó. Wír veé Israyi nèn dù, e tòn, e tòn sa ntèʼ see fó ghaŋ, e jùm wír veé Amor ve vé‑eè dzə́ fo.
33Á tòn bèy, e nèn bìnkìr, e kìʼ dzəə Bashan. Fòn Og wùn à vé rər vəə́ fəə́ adzə̀m, e taàmé áwune é Edrey e rə́r sí. 34Yii bèy, Nyùy Tàr suúy e Mooser jii, «Lá à yòʼ fàn wun. M wày ne wun e wò kiwo wùn à vé rər vəə́ adzə̀m, à nsay rə. Ku lòvtí sho lóvtín mo wò‑oò lovtin e Sihon woo fon wìr veé Amor wo wù‑uù sáʼ e Heshbon.» 35Á bèy, á nèn yùyrí wun wùn à wón və́ vee vilume, à wír vəə́ adzə̀m, la kintiʼ ke wìr ki yòʼ bèr fó, e nèn yòv nsay rə.
Currently Selected:
Kintaŋ 21: LNB
Highlight
Share
Copy
Want to have your highlights saved across all your devices? Sign up or sign in
© 2022 CABTAL
